Saray Bilang 14 - Pangasinan Meaning-Based Bible(MBBPAN83)

Nanriklamo ray Totoo

1Sanlabin nanakis ed kaermenan iray totoo.

2Nanriklamo ra sumpad kindi Moises tan Aaron a kuanda, “Magmaung ni komun no inaatey itayo lad mad Egipto odino diad kalawakan!

3Akin et say Katawan iyakar to itayod saman a dalin? Napatey itayo ed bakal, tan nadakep iray kaasawaan tan saray anak tayo. Ag magmaung nin ompawil itayod Egipto?”

4Kanyan inkuandad sakey tan sakey, “Mamili tayo na sakey a pangulo tan ompawil itayo la ed Egipto!”

5Insan si Moises tan si Aaron dinmakmomo ra ya anggad dalin diad arap na amin a totoo.

6Et si Josue ya anak nen Nun tan si Caleb ya anak nen Jefone a kabyangan irad saramay ispia pinipilat day kawes da diad pangipanengneng day ermen da

7tan kuandad saray totoo, “Sankaabigan a dalin imay inimano mi.

8No maliket ed sikatayo so Katawan, iyakar to tayod man tan iter tod sikatayo man a mayaman tan mataban dalin.

9Ag kayo onsusumlang ed Katawan tan ag kayo ontatakot ed saray totoon manaayam diman. Mainomay tayo ran dakepen. Say Katawan kaolup to itayo tan tinalo to ray diriyos ya angyagel ed sikara; kanyan ag kayo natatakot.”

10Dawitdawit da la ran tupaken, balet kabebekta anengneng na saray totoo so kagalangan na Katawan a pinmatnag ed tagey na Tulda.

Impikasi nen Moises iray Totoo

11Say Katawan kuantod kinen Moises, “Kapigay pangangga na pangipopolisay ed siak na sarayan totoo? Kapigay pangangga na ag da panmatalek ed siak, anggaman ya amayamay iray milagron ginagawak ed arap da?

12Ipadalan kod sikaray salot tan deralen ko ra, balet pagmaliwen ta ka ya ama na sakey a bansa a lalon maawang tan makapanyari nen say sikara!”

13Balet si Moises kuantod Katawan, “Impaway mod Egipto ira yan totoo diad panamegley na pakayarim. No narengelan na saray Egipsio so ginawam ed saray totoom,

14ibaga rad saray totoon manaayam ed sayan dalin so ginawam. Nadngelan la na sarayan totoo a sika, Katawan, et kaolup mi ka, mabatabatar kan nanengneng no ontonda kan ompetek ed sikami, tan wala kad onaan mi ed nengneng na sakey a lusek a lorem no agew tan sakey a lusek ya apoy no labi.

15Natan no pateyen mo ra yan amin a totoo, saray bansan akabalita na inkabantug mo et ibaga ra

16a pinatey mod kalawakan iray totoom lapud ag mo nayarian iran iyakar ed dalin ya insipan mon iter ed sikara.

17Kanyan natan, Katawan, pikasik ed sika ya ipanengneng moy pakayarim tan sumpal mo so insipan mo nen inkuanmo,

18‘Siak, a Katawan, et aliwan maipapasnuk, tan ipanengneng ko so baleg a panangaron ag mangoman, tan pirdonaen ko so kasalanan tan say pananumlang. Balet andisaew a dusaen ko ray anak tan saray apo ya anggad kumatlo tan kumapat a kailalakan lapud saray kasalanan da ray atateng da.’

19Et natan, Katawan, onung na kabaleg na panangarom ya ag mangoman, pikasik ed sika a pirdonam pay kasalanan da ra yan totoo, a singa impamirdonam ed sikara nanlapu lad samay intaynan dad Egipto.”

20Say Katawan inmebat, “Pirdonaen ko ra onung ed kerew mo.

21Balet isipan ko a legan a mabilay ak tan legan a papanoen na kagalangan ko so mundo,

22anggapod sarayan totoo so makaloob ed saman a dalin. Anengneng da so kagalangan ko tan saray milagron ginagawak dimad Egipto tan diad kalawakan, balet sinusubok da ak ya amimpigapiga tan ag da ak inonur.

23Anggapod sarayan angipolisay ed siak so makaloob ed saman a dalin.

24Balet lapud domay liknaan nen Caleb tan nansiansian matoor ed siak, abuloyan kon makakar ed dalin a nila ton ninengneng, tan kayaryanen na saray kabyangay boleg to iman a dalin

25a saray patar et panaayaman natan na saray Amalecita tan saray Cananeo. Poliktar kayo nabwas ta laka yod kalawakan a mamaarap ed Dayat ya Akaba.”

Dinusa na Katawan

iray Israelita Lapud Impanriklamo ra

26Say Katawan kuantod kindi Moises tan Aaron,

27“Kapigay itondan manriklamo sumpad siak ira yan maoges a totoo? Alabas lay nadngel kon riklamo ra!

28Natan ibagam ed sikara yan ebat: ‘Isipan ko a legan a mabilay ak, gawaen ko so kerew yo. Siak a Katawan so nansalita.

29Ompatey kayo tan nataytayak ed sayan kalawakan iray bangkay yo. Lapud nanriklamo kayo sumpad siak, anggapod sikayo so makaloob ed saman a dalin a say taon to et onsoluk ed duamplo.

30Insipan ko a panayamen ta kayod man, balet anggapo la natay makapanayam diman likud ed kindi Caleb tan Josue.

31Imbaga yo a nadakep iray anak yo, balet iyakar ko rad saman a dalin ya ag yo labay, tan sikatoy panayaman da.

32Ompatey kayo dia ed kalawakan.

33Apataploy taon a manakar-akar ed kalawakan iray anak yo, manirap ira lapud aliwa kayon matoor ed siak; manakar-akar ira ya anggad ompatey so kaonuran a mabilay ed sikayo.

34Apataploy taon a manirap kayo lapud kasalanan yo; sakey taon so kasimbang na balang sanagew na samay apataploy agew ya impannengneng yod samay dalin. Naamtaan yod satan so kabaliksan na pasnuk kod sikayo!

35Isipasipan kon gawaen ya ed sikayo, sikayo ran maoges a totoon nantitipon ya onsumpad siak. Ompatey kayon amin dia ed kalawakan. Siak a Katawan so nansalita.’”

36-37Saramay lalakin imbaki nen Moises a manispia ed dalin et aliwan tua so imbalita ra kanyan saray totoo nanriklamo ra sumpad Katawan. Lapud saya, impadalan na Katawan so salot ed saray totoo et inaatey ira.

38Diad saramay labinduan ispia di Josue tan Caleb labat so akapaliis ed patey.

Sinali ray Onloob ed Dalin na Canaan(Deut. 1:41-46)

39Nen sinalita nen Moises ed saray Israelita so imbaga na Katawan, mapalaloy impanermen da.

40Diad kabkabwasan ed ontombuk ya agew ginapwan dan looban iray kapokdulan a dalin. Inkuanda, “Akaparaan kami la natan ya onla ed pasen ya insipan ed sikatayo na Katawan. Birbiren mi a nankasalanan kami.”

41Balet inkuanen Moises, “Akin sirin et susumlangen yo natan so Katawan? Ag kayo manalo!

42Ag kayo ontutuloy. Ag kayo olupen na Katawan, tan taloen kayo na saray kalaban yo.

43No mibakal kayod saray Amalecita tan saray Cananeo, napatey kayo; ag kayo olupen na Katawan lapud ag kayo tinmoluk ed sikato.”

44Balet impasoot day linma ed kapokdulan iran pasen, anggaman ya ag inmalis ed kampo si Moises tan say Kaban na Sipanan na Katawan.

45Insan saray Amalecita tan saray Cananeo a manaayam ed saraman a pasen dinogpaan da ra tan tinalo da ra, tan inosilan da ra ya anggad Horma.