Judit 4 - Pangasinan Meaning-Based Bible(MBBPAN83)

Nanplano ray Israelita ya Ilaban so Dalin da

1Nadngelan na saray Israelita so ginagawa nen Holofernes, say pangulo na saray sondalo nen Ari Nabucodonosor ed saray arum a bansa. Nadngelan day impansasamsam tan impandederal tod amin a timplo ra,

2et mapalaloy inkataktakot dad sikato tan mapaga rad nayarin gawaen tod Jerusalem tan say Timplo na Katawan a Dios da.

3Agano niy impawil dad Juda manlapud saray inkibantakan dan bansa tan kasumsumpal dan pinasimbalon insaklang so Timplo tan saray kagawaan to tan say altar to, ya adotakan ira onung ed ganggan.

4Kanyan pinasakbayan day intiron dalin na Samaria tan saray baley na Kona, Bethoron, Belmain, Jerico, Choba, Esora tan saray Patar na Salem.

5Nanayaman dan tampol iray toktok na saray palandey, nanggagawa ray tirinsira diad saray bariod kapalandeyan, tan nantitipon iray abaston para saray sondalo. Mapalar ira ta kasumsumpal na impanani ra.

6Si Joakim a Pangulon Pari, a walad Jerusalem diad saman a panaon, et sinulat to ray totood saray baley na Betulia tan Betomistaim, a wala rad arap na Patar na Jezreel ya asingger ed Dotan.

7Ingganggan tod sikara a guardiaan da ray dalan a mamaarap ed Juda, ta mainomay dian labanan iray sondalon ondodogpa, bangta sanderwa labat a too so makaloob ed sarayan dalan.

8Sinumpal na saray Israelita iray ganggan ed sikara nen Joakim a Pangulon Pari tan say Konsiho a nantongtong ed Jerusalem.

Pikakasi Kasakbayan na Bakal

9Masimoon a nampikasid Dios iray lalaki na Israel tan nanayuno ra.

10Nansosolung ira na sako—sikara tan saray kaasawan da, saray anak da, saray ayayep da, tan balang sangkailin manaayam diman, balang aripen tan kumikimey.

11-12Sinakbungan da met na sako so altar. Insan tinmikleb ed dalin diad arap na Timplo iray amin a lalaki, bibii, tan ogogaw; akasolung iran amin na sako, tan napno na dapul so kaoloan da. Nankakasakey iran masimoon a nampikasi ed Dios na Israel; kinerew dad sikato ya ag to iyabuloy a nadakep iray anak da, naala ray kaasawaan da, odino naderal iray nianakan dan baley. Akikasi rad sikato ya ag to panliketen iray Hintil diad pakaderal tan pakadotak dad Timplo onung ed ganggan.

13Dinengel na Katawan iray pikakasi ra tan anengneng toy kakairapan da. Abayag ya intuloy na saray totood Juda tan Jerusalem so impanayuno ra ed arap na Timplo na Katawan a Makapanyarin-amin.

14Akakawes na sako so Pangulon Pari a si Joakim, saray papari, tan amin da ray arum a manlilingkur ed Timplo na Katawan, nen angisaklang ira na inagewagew a bagat a popoolan, saray bagat a pinalapud mabolus a linawa, tan saray bagat a panumpal na samba.

15Iniinan da na dapul iray turban da tan mannangis iran akikasi ed Katawan, tan kinerew dad sikaton kasian toy intiron bansa.