1Diad saman met lamlamang ya agew, anunotan nen Tobit imay kuartan impaisinup tod kinen Gabael diad Rages na Media.
2Inkuantod sikaton dili, “Natan ta kinerew ko lad Katawan ya abuloyan to ak lan ompatey, tawagen koy anak kon Tobias tan ibagak ed sikato so nipaakar ed samay kuarta.”
3-4Tinawag to sirin si Tobias tan binilin to, “Anak ko, no ompatey ak, ipompon mo ak na manepeg. No anggapo ak lad sayan bilay, igalang moy inam. Asikasom legan ton mambilay; et no sikato met lay ompatey, ipompon mo ed abay ko. Ag mo lilingwanan ya imposta toy bilay tod impangyanak tod sikad sayan mundo, kanyan paliket mo tan ag mon balut gagawaen so antokaman a pakagunigonan to.
5“Nunot mo lawas so Katawan a Dios tayo legay bilay mo. Ag mo gagagalaen so mankasalanan odino onsumlang ed saray ganggan to. Say matonung lawas so agamilen mo, tan ag ka mibabalid antokaman a maoges.
6Mambilay kan malinis, et maung so kasumpalan na amin a gawaen mo.
7“Mabonluk kan mangiter ed siopaman a matoor a mangoonur ed Dios. No gimperan moy iter mod saray mairap-bilay, gimperan met na Dios so iter tod sika.
8Mangiter ka onung ed walan kayaryan mo. No dakel so kayaryan mo, dakel met so nepeg ya iter mo. Anggan daiset so kayaryan mo, ag mo lilingwanan so mangiter na bengatla.
9No saya so agamilen mo, singa ka mantitipon na kuarta ya onkanad sika no panaon na gunigon.
10-11Say pantalima ed saray mairap-bilay et sakey a bagat a makapaliket ed Dios a walad tawen. Agamil mo ya, et nipaliis kad ambilonget a pasen a panaayaman da ray inaatey.
12“Anak ko, manalwar kad saray marotak a bibii. Manona yan tantandaan mo: mangasawa ka na biin kabyangay tribu tayo, ta kabyangan itayo na boleg da ray propita. Ag ka mangaasaway ag tayo kanayon. Ag mo lilingwanan a saray inmonan lalaki tayo a di Abraham, Isaac, tan Jacob et angaasawa ray kakanayon da. Say Dios binindisionan to ra na saray anak, kanyan tawiren na saray kabyangay boleg da so dalin na Israel.
13Anak ko nepeg a matoor kad saray kakanayon mo. Ag ka mapalalon mapaatagey ya ag mo labay ya asawaen so kanayon mo. Satan a panagpaatagey et iwanwan to kad kapoy na linawa tan deral, a singa say ngiras et iwanwan to kad mapalalon kairapan na bilay tan kaerasan.
14“Bayaran mon inagew-agew iray kumikimey mo; ag mo aabalaen ya anggan sanlabi so suildo ra. Ontan so pamagalang mod Dios, et tumangan to ka. Agamil mo lawas so kamaungan.
15Ag mon balut gagawaen ed kaparam a too so ag mo labay a nagawad sika.
“Ag mo kapalabasen so oninom na alak pian ag ka nabuek, tan ag mo oogalien so maninom na alak.
16“Mangiter kay nakan ed saray narasan tan kawes ed saray totoon mankaukolan. No maaligwas so bilay mo, mangiter kan mabonluk tan maliket.
17“No inatey so sakey ed saray matoor a totoo na Dios, mangiparaan kay kanen na pamilya to, balet ag mo yan balut gagawaen no maoges so toon inatey.
18“Dengel kad simbawa na saray totoon makalakal, tan ag mo lelemlemewen so makanan simbawa.
19“Anamut mo so amin a pankanawnawam a mangidayew ed Katawan a Dios mo. Kerew mod sikato a paaligwasen to kad amin a ginetmam a gawaen. Ag to iitdan na kakabatan iray totoo na arum a bansa. Sikatoy sobul na ganaganay kaabigan, balet nayarian to ka met a deralen tan pateyen no labay to.
“Ag mo lilingwanan ya amin iray bilin ko, tan nunot mo ra lawas.
20“Tobias, labay kon ipaamtad sika a nen saman walay dakerakel a kuartan impaisinup kod kinen Gabael ya anak nen Gabrias diad Rages na Media.
21Mairap so bilay tayo natan, balet ag ka mapaga. No arawian moy kasalanan tan toluken moy Dios, pakaliketan to ka tan paaligwasen toy bilay mo.”
Who We AreWhat We EelieveWhat We Do
2025 by iamachristian.org,Inc All rights reserved.
