Ezekiel 27 - Pangasinan Meaning-Based Bible(MBBPAN83)

Sakey a Kantan para Tolur na Tiro

1Say Katawan inkuantod siak,

2“Sika a toon ompatey, kantaan mo na para tolur so Tiro,

3samay siudad a walad bungangay dayat tan manninigosio ed saray totoon manaayam ed kapag gilig na dayat. Ibagam ed sikato no anto so ibabagak, siak a Katawan a Dios:

“Tiro, inkinon mo so nagnap a gangganam.

4Say dayat so abung mo.

Saray nanggawad sika ginawa da kan singa marakep a barko.

5Inkana da ray saleng

a nanlapud Palandey na Hermon.

Say inkana ran palom et sakey a sengeg na sidro a nanlapud Libano.

6Kiew iran robli a nanlapud Basan iray ginawa ran begsay;

Saleng a nanlapud Chipre iray inkana ra ed impanggawa rad kuartoy barkom,

Inokupan da na garing.

7Linen iray layag mo,

Abordaan iran linen a nanlapud Egipto,

Mainomay iran nabirbir anggan diad arawi.

Sankaabigan ya abel so tarung mo,

Ya ambalbalangan abel a nanlapud isla na Chipre.

8Taga siudad na Sidon tan Arvad iray sumasakay mo.

Saray marunong a lalakin totoom iray marinirom.

9Saray karpintiro na barko

Et saray marunong a lalakin taga Biblos.

Saray marinirod balang barkon mambiabiahid dayat

Et manninigosio rad saray tindaan mo.

10“Taga Persia, Lidia, tan Libia iray sondalom. Insasabit dad kampom iray samper tan saray hilmit da. Sikaray lalakin angiter ed sika na kagalangan.

11Saray sondalon taga Arvad so nangguardiad saray padir mo, tan saray lalakin taga Gamad so nangguardiad saray torim. Insasabit dad saray padir mo iray samper da. Sikaray lalakin nampagangganad sika.

12“Nannigosio ka ed Espanya tan nansempet ka na pilak, balatyang, lata, tan ismay a bayar na saray dakel a lakom.

13Nannigosio ka ed Grecia, Tubal, tan Mesec tan insumbat mo na saray aripen tan saray kagawaan a gansa iray bengatlan lakom.

14Say nanlakuan mod saray lakom et insasaliw mo na saray kabayon para kimey, saray kabayon para bakal, tan saray mulon nanlalapud Bet-togarma.

15Saray totood Rodes et akinigosio rad sika; saray totood saray dalin a walad gilig na dayat et insusumbat dad saray lakom iray garing tan pasingil na ilipanti ra.

16Sinaliw na saray totood Siria iray amayamay a lakom. Imbabayar dad saray kagawaan mo iray ismiralda, saray purpuran abel, saray binordaan ya abel, saray pinon linen, saray baton koral, tan saray baton rubi.

17Saray taga Juda tan Israel et imbayar dad saray lakom iray trigo, dilo, larak na oliba, tan saray rikado.

18-19Saray taga Damasco et imbayar dad saray lakom tan saray bunga na saray tanaman mo, iray alak a nanlapud Helbon tan say abel a lana a nanlapud Sahar. Insumbat dad saray bengatlan lakom iray kagawaan a balatyang tan saray rikado.

20Saray taga Dedan et insumbat dad saray bengatlan lakom iray abel a sapin na beneg na kamilyo tan asno.

21Saray taga Arabia tan saray manoley ed dalin na Kedar et imbayar dad saray lakom iray kordiro, karniro, tan kanding.

22Saray nigosiantin taga Seba tan Raama et insumbat dad saray bengatlan lakom iray alahas, balituk, tan saray sankaabigan a rikado ra.

23Akinigosio ed sika iray siudad na Haran, Cannel, Eden, Seba, Assur tan Kilmad.

24Angilako rad sika na saray mabmablin kawes, saray purpuran abel, saray binobordaan a kawes, saray alpombra a malmaltaw so kolor da, tan saray malet a lobir tan kordon.

25Nilogan ed saray sankabalgan a barko iray bengatlan lakom.

“Aliling mo nen saman so sakey a barko ed dayat

A napno na saray ambebelat a karga.

26Nen saray managbegsay mo et inyakar da kad pegley na dayat,

Dineral ka na dagem a nanlapud bokig.

27Nen aderal ed dayat so barkom,

Abalang ya amin ed dayat

Iray amin a kayamanan mod bengatlan lakom,

Amin da ray marinirom ya ontotoon ed barkom

Saray karpintiro na barkom tan saray nigosiantim

Tan balang sondalon akalogan ed barko.

28Makbaw a nadngel ed gilig na dayat

So eyag da ray nalelener a marinirom.

29“Ataynan la ya amin natan so barko

Sinmakbit lan amin iray mariniro.

30Ampait so impanermen da ed sika,

Tinupak day dabuk so kaolowan da tan nantitiblak irad dapul.

31Lapud sika kinikiskisan day olo ra

Tan nankakawes iray sako.

Maninget so pagew da legan dan onaakis.

32Kinantaan da ka na sayan kanta a para tolur:

‘Siopay mipara ed Tiro ya aderal ed pegley na dayat?

33Nen imbiahim ed dayat iray bengatlan lakom,

Inter moy nakaukolan dan amin iray bansa.

Minmayaman iray arari lapud kayamanan na saray bengatlan lakom.

34Natan aderal-deral ka ed pegley na dayat;

Linmereg kad kaaralman na dayat.

Kaibam a naandipat ed dayat

Iray bengatlan kayaryan mo tan amin da ray kumikimey mo.’

35“Nikelawan ed inkagawam so balang toon manaayam ed gilig na dayat. Ataktakot iray anggan arari ra, tan mapatpatnag ed lupa ra so takot da.

36Naandipat ka ya anggad angga; ataktakot ya amin iray nigosianti ed intiron mundo, natatakot ira ompan nadamay irad makapasinagem a nansumpalan mo.”