1 Saray Arari 19 - Pangasinan Meaning-Based Bible(MBBPAN83)

Kinmalab ed Toktok na Palandey na Sinai si Elias

1Imbaga nen Ari Acab ed kinen asawa ton Jezebel iray amin a ginawa nen Elias tan say impamatey tod amin da ray propita nen Baal.

2Impaikuanen Jezebel ed kinen Elias: “Pateyen ak komun na saray diriyos no diad onyan oras nabwas et ag ko gawaen ed sika so singa ginawam ed saray propita.”

3Tinmakot si Elias, kanyan batik diad pangyagel tod bilay to; intagar tod Beerseba na Juda imay aripen to.

Intilak diman nen Elias imay aripen to

4tan nanakar a sanagew ed kalawakan. Tinmonda tan inmirung ed silong na sakey a kiew tan labay to la komun so ompatey. Nampikasi, “Alablabas la ya, Katawan. Babawim lay bilay ko, ta singa ak met la lamlamang inatey!”

5Dinmokul ed silong na kiew, insan akaogip. Kabebekta diniwit na anghil tan kuanto, “Bangon ka, ta mangan ka.”

6Ninmengneng ed kaliber-liber, et anengneng tod olowan to so sakey a tinapay tan sakey a garapon na danum. Angan tan inminom, insan dinmokul lamet.

7Pinmawil imay anghil na Katawan tan pinidwa ton binangon, insan kuanto, “Bangon ka, ta mangan ka; no ag ka mangan nairapan kad panakar mo.”

8Binmangon si Elias, angan tan inminom; angiter ed sikato na biskeg imay tagano diad impanakar to na apataplon agew tan apataplon labi ya anggad Sinai, say masanton palandey.

9Nampalabas diman na labi ed dalem na sakey ya ongib.

Kabebekta akisalitad sikato so Katawan, “Elias, antoy gagawaen mo dia?”

10Inmebat si Elias, “Katawan a Dios a Makapanyarin-amin, panlilingkuran ta ka lawas, tan sika labat so panlilingkuran ko. Balet inkaindan na saray totood Israel so impisipanan dad sika, dinederal da ray altar mo, tan pinapatey da ray propitam. Bukbukor ko lay atilak—tan labay da ak nin pateyen.”

11“Paway ka tan manalagey kad arap ko diad toktok na palandey,” inkuan ed sikato na Katawan. Insan dinmalan so Katawan, angibakiy mabiskeg a dagem a nanyegyeg ed saray palandey tan amisagpisag ed saray baton ankabaleg—balet andid man ed dagem so Katawan. Tinmonday siplug to may mabiskeg a dagem, insan walay yegyeg—balet andid man ed yegyeg so Katawan.

12Kayari to may yegyeg walay pool—balet andid man ed pool so Katawan. Kayariy pool walay makalkalnan esaes na bosis.

13Nen nadngel nen Elias insakbung tod lupa toy kolibemben to, pinmaway tan nanalagey ed wangalay ongib. Inkuan ed sikato na samay bosis, “Elias, antoy gagawaen mo dia?”

14Inmebat, “Katawan a Dios a Makapanyarin-amin, panlilingkuran ta ka lawas, tan sika labat so panlilingkuran ko. Balet inkaindan na totood Israel so impisipanan dad sika, dinederal da ray altar mo, tan pinapatey da ray propitam. Bukbukor ko lay atilak—tan labay da ak nin pateyen.”

15Inkuan na Katawan, “Pawil ka tan lakad kalawakan ya asingger ed Damasco. Loob kad siudad, lanaan mon manari ed Siria si Hazael,

16tan lanaan mo met a manarid Israel si Jehu a lakin anak nen Nimsi. Lanaan mo met ya onsalat ed sikan mampropita si Eliseo a lakin anak nen Safat a taga Abelmehola.

17Siopamay ag napatey nen Hazael pateyen nen Jehu, tan siopamay ag napatey nen Jehu pateyen nen Eliseo.

18Balet mangikera ak ed Israel na piton libon mabilay a totoo—amin da ray matoor ed siak tan ag ira dinmakmomod kinen Baal odino inmangub ed talintao to.”

Say Inkatawag nen Eliseo

19Tinmaynan si Elias, insan asabi toy Eliseo a mambabaka a kaiba toy olup na pigaran baka; walad onaan to ray labinsakey ya olup, tan pambabaka toy mikalabinduan olup. Sininggeran nen Elias, insan to inkolibemben ed kinen Eliseo so kolibemben to.

20Intilak ed satan nen Eliseo iray baka to, tan inabot toy Elias, tan kuanto, “Abuloyan mo ak pa nin onangub ed kindi amak tan inak diad pampatanir kod sikara, insan mila ak ed sika.”

Inmebat si Elias, “Sigi, pawil ka. Ag ta ka sesebelan!”

21Kayari ton nampatanir, inala to ra may baka to, pinatas to ra, tan inluto to ra. Insonglur to ray pako da ra may baka to. Inter tod saray totoo so aluton karni tan kinan da. Insan linma a tinmombuk a katambayan nen Elias ed saray kimey to.