Deuteronomio 12 - Pangasinan Meaning-Based Bible(MBBPAN83)

Say Saksakey a Pasen a Pangigalangan ed Dios

1“Saraya so ganggan a pampelengan yo ya onuren legan a manaayam kayod dalin ya iiter ed sikayo na Katawan a Dios na saray lalaki yo. Dengel yo ra!

2Diad dalin a kayaryanen yo, deral yo ray amin a pasen a pangigagalangan na saray totoo ed saray diriyos da diad saray atagey a palandey, diad saray pokdul, tan diad silong na saray malambut a kiew.

3Igeba yo ray altar da tan mekmek yo ray masanton lusek da. Poolan yo ray tanda na diosan Asera tan batang yo ray talintaoy diriyos da, pian ag la ran balut nigalang ed saraman a pasen.

4“Ag yo igagalang so Katawan a Dios yo a singa panangigalang na sarayan totoo ed saray diriyos da.

5Diad dalin na amin da ray tribu yo, say Katawan mamili na sakey a pasen a panayaman to a sikatoy laen na saray totoo a pangigalangan ed sikato.

6Diman yo iyakar iray isaklang yon bagat a popoolan tan saray arum a bagat, say kakaplo na saray kayaryan yo, tan saray bagat yo, saray rigalon isipan yon iter ed Katawan, saray bagat yon manlapud mabolus a linawa yo, tan saray besag ya anak na saray baka tan saray karniro yo.

7Dimad saman a pasen, diad arap na Katawan a Dios yo ya amindision ed sikayo, sikayo tan saray kabyangay pamilya yo et kanen tan panliketan yo ray maabig a bengatlan nansasagputan yo.

8“No onsabiy tan a panaon, ag yo gagawaen so singa gagawaen yo ni ya anggad natan. Mangigagalang kayo nin amin onung na kaliktan yo,

9lapud ag kayo ni akaloob ed dalin ya iiter ed sikayo na Katawan a Dios yo, a diman kayo makapambilay ya arawid kaatapan.

10No nabaliw yo lay Ilog na Jordan, say Katawan pasakop tod sikayo so dalin tan manayam kayod man. Ag to kayo la pasigen-sigen ed amin a kalaban yo, tan manayam kayod man ya arawid kaatapan.

11Say Katawan mamili na saksakey a pasen a pangigalangan ed sikato, tan iyakar yod man ed sikato iray amin ya ingganggan kod sikayo: saray isaklang yon bagat a popoolan tan saray arum a bagat, say kakaplo na saray kayaryan yo tan saray bagat yo, tan saray nidoma-doman rigalo ya insipan yon iter ed Katawan.

12Manliket kayod man ed arap to, pati saray anak yo, saray aripen yo, tan saray Levitan manayam ed saray baley yo; nunot yo a saray Levita et anggapoy dilin dalin da.

13Ag nepeg a mangisaklang kayo na saray bagat ed inerman a pasen a labay yo;

14nepeg yo ran isaklang labat ed saksakey a pasen a pilien na Katawan ed dalin na sakey ed saray tribu yo. Diman labat so pangisaklangan yo na saray bagat a popoolan tan diman so panggawaan yod amin ya ingganggan kod sikayo.

15“Nayarian yoy mamatas tan mangan na saray ayep yo diad iner may panayaman yo. Nayarin kanen yo so anggan anton karakel ya iter ed sikayo na Katawan. Malinis may marotak kayo onung ed ganggan, nayarian yo ran kanen a singa pangan yo na karniy gasila tan ulsa.

16Balet ag yo nepeg a kanen so dala ra; nepeg yon ikalbo ed dalin a singa say danum.

17Ag yo kakanen ed pasen a panayaman yo so dinan man ya ibagat yod Katawan: saray kakaplo na trigo yo, say alak yo, odino say larak na oliba yo, odino saray besag ya anak na saray baka tan saray karniro yo, saray rigalon isipan yon iter ed Katawan, saray bagat yon manlapud mabolus a linawa, odino saray arum a bagat.

18Sikayo tan saray anak yo, a pati saray aripen yo tan saray Levitan manayam ed saray baley yo, et kanen yo ra yan bagat dia labat ed arap na Katawan a Dios yo, diad saksakey a pasen a panangigalangan a pilien na Katawan a Dios yo. Panliketan yod man iray saray ginagawa yo.

19Ag yon balut papaolyan iray Levita legan na panayam yod dalin yo.

20“No apaawang la na Katawan a Dios yo so dalin yo onung na insipan to, nayarian yoy mangan na karni kapag nanunotan yo.

21No arawdawin tuloy ed kawalaan yo so pasen a panangigalangan, nayarian yoy mamatas, kapag nanunotan yo, na baka odino karniro ya inter ed sikayo na Katawan, tan nayarin kanen yo yan karni ed abung yo onung na imbagak ed sikayo.

22Siopamay malinis odino marotak onung ed ganggan, nayarin mangan na sayan karni, a singa pangan to na karniy gasila tan ulsa.

23Balet ag yo kakanen so karnin nandala, ta say bilay wala ed dala, tan ag yo nepeg a kanen so bilay a walad karni.

24Ag yo kakanen so dala; ikalbo yo ingen ed dalin a singa say danum.

25No onuren yo yan ganggan, napaliket so Katawan, et maung lawas so kipapasen yo tan saray kabyangay boleg yo.

26Iyakar yo samay saksakey a pasen iray bagat yo tan saray rigalon insipan yon iter ed Katawan.

27Isaklang yod man ed altar na Katawan iray bagat yon popoolan. Isaklang yod man met iray bagat a kanen yoy karni ra tan ikalbo yod altar so dala ra.

28Pampelengan yon onuren iray amin ya ingganggan kod sikayo, et anggad angga a maung lawas so kipapasen yo, sikayo tan saray kabyangay boleg yo, lapud matonung tan makapaliket ed Katawan a Dios yo so gawaen yo.

Say Pasakbay a Sumpad Pangigalang ed Talintaoy Diriyos

29“Say Katawan a Dios yo et deralen to ray bansa legan na pankukurang da, tan kayaryanen yo tan panayaman yo.

30Kayarin deralen na Katawan ira yan bansa, manalwar kayo, ta ompan napatitan kayon mangigalang ed saray diriyos da. Ag yo oosisaen no panoy panangigalang da, ompan aligen yo ra.

31Ag yo ipapara so panangigalang yod Dios yo ed panangigalang da ed saray diriyos da, ta diad panangigalang dad saray diriyos da gagawaen da ray amin a makapaingungot a kabosul na Katawan. Ibabagat da ni ingen ed apoy na saray altar da iray anak da.

32“Onur yo ray amin ya ingganggan kod sikayo; ag yo ra pasosolukan odino babawasan.