Tobit 5 - Pangasinan Meaning-Based Bible(MBBPAN83)

Say Impanparaan na Pambiahi

1Insan inmebat si Tobias ed kinen ama to, “Sumpalen kon amiy imbaga yod siak.

2Balet panoy pakalak ed kinen Gabael na satay kuarta? Ag ka mi ni akapannengnengan itan a too. Panon kon paneknekan no siopa ak, pian sisiaen to ak tan iter tod siak so kuarta? Sakey ni, ag ko amtay onlad Media.”

3Inmebat si Tobit, “Walay pinirmaan mi nen Gabael a kasulatan. Pinilat kon impankadwa so kasulatan tan sansakey kami na kapaldua. Inyan kod samay kuarta so kapaldua to. Duamploy taon la so linmabas! Laka, ta mananap kay toon napanmatalkan mo a kaiba ya onlad Media tan ompawil dia, tan bayaran ta no kapawil mo. Nakaukolan ya alaen mo may kuartan intilak kod Gabael.”

Say Impanabet nen Tobias tan si Rafael

4Pinmaway sirin si Tobias a mananap na toon amta toy onlad Media tan kaiba ton mambiahi. Kapaway tod abung da, nabet toy Rafael. Ag amta nen Tobias a sakey ya anghil na Dios si Rafael,

5kanyan tinepet nen Tobias no taga iner si Rafael.

“Sakey ak ya Israelita,” ebat nen Rafael, “sakey ed saray arawin kanayon mo, tan linma ak diad Ninive a mananap na kimey.”

“Amtam so dalan a mamaarap ed Media?” tepet nen Tobias.

6“On, amtak,” ebat nen Rafael. “Amimpiga ak lan akakar diman, tan amtak a maung iray dalan. Naynay ak a mampundo ed kanayon tayon Gabael a manaayam ed baley na Rages. Taloy agew ya akaren manlapud Ecbatana, say manonan siudad, ta walad kapalandeyan so Razes.”

7Insan inkuanen Tobias ed kinen Rafael, “Alagar ka dia, kaaro, ta onloob ak tan salitaen ko ya ed amak. Labay kon sikay kaibak a mambiahi; bayaran ta kad pangibam ed siak.”

8“On, sigi,” inkuanen Rafael, “Manalagar ak dia, balet magano ka.”

9Kaloob nen Tobias inkuantod kinen ama to, “Akalmo ak na sakey a kapara tin Israelita a kaibak a mambiahi.”

“Paloob mo dia,” ebat nen Tobit. “Labay kon amtaen no dinan a boleg tan tribu so pikakabyangan to, tan labay ko met ya amtaen no napampiaan a kaibam ed pambiahim.”

Say Impanabet nen Tobit tan si Rafael

Pinmaway sirin si Tobias tan tinawag toy Rafael, “Loob ka, ta labay to kan napinengnengan nen amak.” Kaloob nen Rafael, inmonan angilugay si Tobit.

Insan angilugay met si Rafael. “Oy la komun ta maung ya amiy kipapasen ed bilay mo!”

Balet inmebat si Tobit, “Panon a maung ya amiy kipapasen ed bilay ko? Bulag ak tan ag kon balut makanengneng. Singa ak la inatey tan ag ko la nanengneng so anggan liwawa. Narengel ko ray totoon mantotongtong, balet ag ko ra nanengneng.”

“Manliket ka!” inkuanen Rafael. “Ag ka mapaga, ta magano lan paabigen kay Dios!”

Insan inkuanen Tobit, “Labay nen anak kon Tobias so onlad Media. Nayarian mo kasin ibaan tan ibasbas ed dalanen to? Andi-saew a bayaran ta ka.”

Inmebat si Rafael, “On, nayarian kon ibaan. Amimpiga ak lan nambiahid man; amtak ya amin iray dalan ed kapalandeyan tan diad saray patar.”

10Tinepet nen Tobit, “Ibagam ed siak, kaaro, anton pamilya tan tribu so pikakabyangan mo?”

11Inkuanen Rafael, “Akin et oopapeten mo niy tan?”

“Ibagam so tua,” kuanen Tobit. “Antoy ngaran mo tan siopa ka?”

12“Azarias so ngaran ko,” ebat nen Rafael. “Siak so pangulowan ya anak nen Ananias a kanayon mo.”

13Insan inkuanen Tobit ed sikato, “Maliket kamin mangawat ed sika! Bindisionan ka komuy Dios, anak ko. Ag mo komun liliknaen so impangopapet koy katwaan a nipaakar ed sika tan say pamilyam. Natan amtak la; maung so pamilyam tan kanayon ta ka ni! Kabat koy Ananias tan si Natan; anak ira nen masiken a Semaya. Matoor ira lawas ed rilihion da. Sikaray kaolup kon naynay no onla kamid Jerusalem a mangigalang diman ed Katawan. Maung a totoo iray kakanayon mo, tan nanlapu kad maung a boleg. Maung komun so pambiahim.”

14Intuloy nen Tobit so nansalita, “Itdan ta kay kaogaliyan ya inagew-agew ya upa, tan iter ko niy gastos yon dua.

15Asikasom a maung si Tobias, et aruman koy upam.”

16“On, olupen koy Tobias,” ebat nen Rafael. “Ag ka mapaga; onla kamid man tan ompawil kami dian anggapoy maoges a nagawad sikami. Arawid kaatapan iray dalan.”

“Milay Dios komun ed sikayo!” ebat nen Tobit. Insan tinawag toy Tobias tan binilin to, “Anak, iparaan mo ray nakaukolan mod pambiahim, pian makabwat kayo lan dua. Bantayan kayon dua komun na Dios tan say anghil to tan ipawil to kayo dian ag naano.”

Kasakbayan ya onla rad Media, inanguban nen Tobias iray ateng to. “Maung komun so pambiahi yo,” inkuan lamet nen Tobit ed sikara.

17Insan ginmapon manakis si ina to. Inkuanto, “Akin et ibakim so anak ko? Sikato labat so manaanap na pambilay ta. Siopay mangasikaso natan ed sikata?

18Akin, mabmabli lan tuloy ed sika tan a kuarta, et isusubam so anak mod kaatapan, pian naala to tan a pilak?

19Akin et ag tayo la anosan so iiter na Dios a pambilay tayo?”

20“Mandeen ka,” inkuanen Tobit ed asawa to. “Ag naano ya onla tan ompawil, tan nanengneng na duaran matam so ipawil na anak mon ag balut naano.

21Ag mo la ra pampapagaan, akolaw. Olupen na maung ya anghil si Tobias. Maung so kasumpalay pambiahi to tan ompawil dia a maksil so laman to.” Diad onya, nandeen si Ana tan tinmondan nanakis.