Say Kakabatan nen Solomon 12 - Pangasinan Meaning-Based Bible(MBBPAN83)

1Walad balang sakey ed sikara so ag ompatey ya ispiritum,

2kanyan mauyamon pepeteken mo ray mankakasalanan ed sika. Ipapanunot mod sikara so gagawaen da, tan papasakbayan mo ra nipaakar ed gagawaen da, pian nikaindan da so maoges a kagagawa ra tan manmatalek irad sika, Katawan.

Say Kasalanan da ray Cananeo

3-4Binosul mo ray totoon nanayam ed masanton dalin mo nen saman, lapud nanggagawa ra na saray makapasinagem a bengatla: nansasalamangka ra tan nanggagawa ray aliwan masanton panangigalang;

5andi-panangasin nampapatey iray ogogaw tan nanaakan ira na laman tan dala na too. Diad saray maamut a sirimonya ra a pangawat ed saray balon kabyangan,

6pinatey na saray atateng iray anak dan ag makapangyagel ed sikaran dili. Linawam so impamatey na saray lalaki mi ed saraman a totoo,

7pian say dalin ya ipapasen mon sankablian ed amin da ray dalin et onnepeg a panayaman na saray totoom.

8Balet anggan diad saya, impanengneng moy panangasim ed saray kalaban da, bangta totoo met labat ira. Angibaki ka na saray ampingilan diad onaan da ray sondalom, ta kalkalnaan dan pateyen iray kalaban.

9Nayarin inyabuloy mo komun a pateyen ed bakal na saray totoon matonung iray totoon maoges; nayarin pinaandipat mo ran tampol komun diad panamegley na saray ayayep ed takel odino diad panamegley na sakey a mapasang a ganggan.

10Balet kinalkalnaan mon sinumpal so sintinsiam, pian naitdan mo ray panaon a magbabawi, anggaman amtam a maoges so sengeg da, amtam a maoges la ra nanlapud inkianak da, tan ag iran balut mangoman ed panagnunot da.

11Manlapud gapo nisamba so intiron bansa ra, et anggaman ya ag mo ra dinusa lapud saray kasalanan da, aliwan lapud antakot kad siopaman.

Say Dios so Sankategeyan

12Pinalsam ira man a totoon maoges, et anggapoy toon makapansalita a mangyagel ed sikara odino makapangakusad sika lapud impamatey mod sikara. Anggapoy makapanriklamod ginawam odino makasumpad sintinsiam.

13Walad silong na panangasikasom iray amin a bengatla, tan anggapoy arum a dios a nepeg mon pangipaliwawaay inkatonung na saray sintinsiam.

14Anggapoy ari odino manoley ed mundo a makapangakusan aliwan maptek so impanusam ed saraman a totoo.

15Matonung ka, tan matonung so panooley mod amin a bengatla. Ag mon balut inkana so pakayarim a panusad sakey a toon ag to kanepegay dusaen.

16Say biskeg mo so panlalapwan na inkatonung. Nayarian mon ipanengneng so panangasi ed balang too, ta sika so Katawan na amin.

17Ipapanengneng moy biskeg mo no panduaruwaan na saray totoo ya ayadyari so pakayarim, tan dudusaen moy siopaman a makaamta na pakayarim balet et ag to bibirbiren.

18Anggaman ya anggapoy anggaan na pakayarim, mapangasi kan huis. Nayarian moy onggalaw sumpad sikami kapag labay mo, balet mapalalon maanos so panooley mod sikami.

19Diad panamegley na saray bengatlan ginawam, imbangat mod saray totoom a say sakey a toon matonung et nepeg met a mapangasi. Initdan mo na daakan ya ilalo iray totoom diad impangyabuloy mod sikaran magbabawi ed saray kasalanan da.

20Maadya tan mapangasi ka ed impanusam ed saray kalaban na saray totoom; anggan kanepegan day ompatey, initdan mo ray amin a pankanawnawa a mangikaindan ed saray maoges a kagagawa ra.

21Balet mapeget so impanintinsiam ed saray dilin totoom, anggaman ya akisipanan kad saray lalaki ra tan sinambaan mon itdan ira na maabig iran bengatla.

22On, dudusaen mo kami, balet dakel ni na samplon libo so panudusam ed saray kalaban mi, pian no sintinsiaan mi ray arum a totoo, nanunotan miy kaabigan mo, tan no sikamiy nasisintinsiaan, mananap kami na panangasi.

Say Inkadusa na saray Egipsio

23Kanyan pinairap mo ira may totoon diad inkakulang-kulang da et nambilay iray maoges—pinairap mo ra diad panamegley na saray makapataktakot a bengatlan inggagalang da.

24Inmarawi rad katwaan tan inggalang da ray makapaingungot tan makapataktakot ya ayayep. Mainomay iran apalikdo a singa ra ogogaw.

25Kanyan dinusam irad inkaambagel da, tan say sintinsiam et impagmaliw to ran singa makulang-kulang.

26Anlemew iman a dusa, balet saray ag mangasasikasod saraman a pasakbay et kanepegan day naitdan na intiron belat na sintinsiay Dios.

27Nen adusa ran kaiba da ra may pinalsa ya impasen dan diriyos, ampait a kinmapoy so linawa ra tan abirbir dan say tuan Dios et samay ag da lawas labay a birbiren. Sikato yay makasengeg a niiter ed sikaray sankabelatan a dusa.