2 Saray Arari 22 - Pangasinan Meaning-Based Bible(MBBPAN83)

Si Ari Josias na Juda(2 Awa. 34:1-2)

1Waloy taon nen Josias nen nagmaliw ya ari na Juda, tan nanoley ed Jerusalem na talomplo tan sakey taon. Si Jedida ya anak nen Adayas a taga baley na Boskat so ina to.

2Ginawa nen Josias so makapaliket ed Katawan; inalig to ray ginagawa nen laki ton Ari David, ta mapeget ton inonur ya amin iray ganggan na Dios.

Say Impakarumog ed Libro na Ganggan(2 Awa. 34:8-28)

3Nen kumalabinwaloy taon na panooley nen Ari Josias, imbaki tod Timplo so sikritario na palasio a si Safan a lakin anak nen Azalia tan apo nen Mesullam, tan ingganggan to:

4“Lakad kinen Pangulon Pari a si Helcias, ta nengneng mo no pigara lay kuartan nanlapud saray totoo ya atipon na saray paparin nipasen ed lolooban na Timplo.

5Ibagam ed sikato ya iter toy kuarta ed saray totoon makaoley ed panaapiger na Timplo,

6pian nabayaran da ray karpintiro, saray managpaalagey, tan saray kantiro, tan makasaliw iray tabla tan saray baton ikana ed panapiger na Timplo.

7Napanmatalkan a sigput iray totoon makaoley ed kimey, kanyan ag la kaukolan ya iyosaosa ray kuartan nanaawat da.”

8Imbaga nen Safan ed kinen Helcias so ganggan na ari, tan imbaga nen Helcias ed sikato a nalmo tod dalem na Timplo so Libro na Ganggan. Inter nen Helcias ed kinen Safan so libro, tan binasa to.

9Insan pinmawil ed kinen ari tan inkuanto: “Inala na saray aripen mo so kuarta a walad Timplo, insan da inyawat ed saray totoon makaoley ed panapiger na Timplo.”

10Inkuanto ni, “Niay libron inter ed siak nen Helcias.” Insan maksil ton imbasa imay libro ed ari.

11Nen nadngel na ari so impangibasad libro, ginebyas toy kawes to lapud ermen to.

12Ingganggan to ra di Helcias a pari, Ahicam a lakin anak nen Safan, Acbor a lakin anak nen Micaya, Safan a sikritario na korti, tan si Asaya a mananulong na ari:

13“Laka yo, ta ipanonan yo ak ed Katawan, tan amin a totood Juda nipaakar ed saray bangat na sayan libro. Mamapasnuk so Katawan ed sikatayo, lapud ag ginawa na saray lalaki tayo iray ibabaga na sayan libro.”

14Di Helcias, Ahicam, Acbor, Safan tan Asaya et linma ran angipanon ed sakey a biin manngaran na Hulda, sakey a propita a manaayam ed balo nin kabyangan na Jerusalem. (Say asawa to yan bii a si Sallum ya anak nen Tocat tan apo nen Hasra et sikatoy makaoley ed saray kawes ya isosolung na saray papari no manlingkur irad Timplo.) Imbaga rad kinen Hulda iray agawa,

15insan imbaga tod sikara ya ompawil irad ari tan inkuandad

16sikatoy onggendan a salita na Katawan: “Dusaen koy Jerusalem tan amin da ray totoo to onung na nisulat ed libron binasa na ari.

17Impolisay da ak tan nambabagat irad saray arum a diriyos, kanyan impanpasnuk da ak lapud amin a ginagawa ra. Pinmetang so olok ed Jerusalem, tan ag ombetel.

18No nipaakar ed ari, siak, say Katawan a Dios na Israel, kuanko: Dinengel moy nisulat ed samay libro,

19nampatauli ka tan nampaabeba kad siak ginebyas moy kawes mo tan manakakis ka nen nadngel mo no panoy panusak ed Jerusalem tan saray totoon manaayam diman. Gawaen kon makapasinagem a nengnengen, sakey a pasen a say ngaran to et ikana na saray totoo a sakey a samba. Balet nadngel koy pikakasim,

20kanyan no inatey ka la so panusak ed Jerusalem. Iyabuloy kon mareen so ipatey mo.”

Pinmawil ed kinen Ari Josias ira may totoo tan imbaga ra yan salita.