Jeremias 14 - Pangasinan Meaning-Based Bible(MBBPAN83)

Say Abaybayag a Tiagew

1Say Katawan kuantod siak nipaakar ed abaybayag a tiagew,

2“Say Juda et walad kaermenan,

ompapatey iray siudad to,

mandokdokul ed dalin iray totoo to lapud kaermenan,

tan onkekerew na tulong so Jerusalem.

3Saray mayaman a totoo ibabaki da ray aripen da, ta mangala ray danum;

oonla rad saray bobun,

balet ag ira makakalmoy danum;

ompapawil ira ya anggapoy karga iray pananginan da.

Sasakbungan da ray olo ra,

lapud kababaingan tan ag da amtay gawaen da.

4Nanaekalan na biskeg na linawa iray dumaralus,

lapud anggapoy oran

tan amaga-magay dalin;

iyaamut day kalupaan da.

5Diad alog tataynan na inan ulsa iray anak ton kapangyanak,

lapud anggapoy dika.

6Manalalagey ed tapew na saray pokdul iray asnod katakelan,

tan apus-apusan iran singa saray asod katakelan;

kurarap la ra lapud anggapoy nakan da.

7Ontatawag ed siak iray totook,

‘Anggaman ya aakusaen kami na saray kasalanan mi,

tulongan mo kami pa, Katawan, onung na insipan mo.

Amimpiga kamin inmarawid sika;

nankasalanan kamid sika.

8Sika labat so ilalo na Israel,

sika so mangilalaban ed sikami ed kaderalan.

Akin et singa ka sangkaili ed dalin mi,

singa biahiron sanlabi labat so pipundo to?

9Akin et singa ka toon abiglaan,

singa sakey a sondalon ag makatulong?

Andi-duaruwan wala kad sikami, Katawan!

Sikami ray totoom;

ag mo kami pa ikakaindan.’”

10Say Katawan kuanto nipaakar ed sarayan totoo, “Inaro ra so ontaynan ed siak tan ag da pokpokan so sikaran dili. Kanyan sirin, ag ak manliket ed sikara. Nunoten ko ray maoges a ginagawa ra tan dusaen ko ra lapud saray kasalanan da.”

11Inkuan na Katawan ed siak, “Ag mo kekerewen a tulongan ko ra yan totoo.

12Anggan manayuno ra ag ko dengelen so ikekerew day tulong; ag ak manliket ed sikara anggaman a mangisaklang irad siak na saray bagat a popoolan tan saray bagat a trigo. Ingen, pateyen ko ra diad panamegley na bakal, eras tan salot.”

13Insan inkuanko, “Katawan a Dios, amtam ya ibabaga da ray propita ed saray totoo ya anggapoy ondalan a bakal odino eras, ta kuandan insipan mo a manari labat so kareenan ed dalin tayo.”

14Balet inmebat so Katawan, “Saray propita mantitila ra ed ngaran ko; ag ko ra imbaki, odino ingganggan, odino akisalitaan. Ag nanlapud siak iray pasingayew a sasalitaen da; andi-kakanaan iray pasakbay a ninudnunot da.

15Siak, say Katawan, ibabagak ed sika so gawaen kod sarayan propita ya ag ko ra imbaki, balet mansasalita ra ed ngaran ko tan ibabaga ran anggapoy ondalan a bakal tan eras ed sayan dalin. Pateyen ko ra ed panamegley na bakal tan eras.

16Saray totoon angibagaan dad sarayan bengatla et napatey met ira ed panamegley na bakal tan eras. Nibantak ed saray dalan na Jerusalem iray bangkay da, tan anggapoy toon mangipompon ed sikara. Nagawa ya ed sikaran amin—pati saray kaasawaan da, saray lalakin anak da, tan saray bibiin anak da. Pambayaren ko rad saray kaogsan da.”

17Ingganggan ak na Katawan ya ibagak ed sikaray nipaakar ed kaermenan ko. Ikuanko,

“Onagos komun ed agew tan labi so luak,

ag ak komun ontondan onakis,

lapud mapalaloy inkasugat na saray totook,

tan ontan lay inkasakitan da.

18No ompaway ak ed saray kaalogan,

nanengneng ko ray bangkay na saray totoon inaatey ed bakal;

no onla ak ed saray baley,

nanengneng ko ray totoon ompapatey ed eras.

Itutuloy na saray propita tan saray papari so kimey da,

balet ag da amta so gagawaen da.”Akikasid Katawan

iray Totood Juda

19 Katawan, sigput so impangipolisay mod saray totood Juda?

Kabosul mo ray totood Sion?

Akin et mapalaloy impanugat mod sikami,

kanyan ag kami la naabigan?

Nampilalekan min nagamuray kareenan, balet anggapoy maabig a sinmabi;

inilaloan min onabig kami, balet makapasinagem lalaingey sinmabi.

20 Katawan, nankasalanan kamid sika;

ipatwa mi ray kasalanan mi

tan saray kasalanan da ray lalaki mi.

21Nunot mo pa ray sipan mo, tan ag mo kami pa babalawaen;

ag mo pa ipepelag ed kababaingan so Jerusalem

say pasen a kawalaay mapagalang a tronom.

Sumpal mo pa may impisipanan mod sikami,

tan ag mo pa dederalen.

22Anggapod saray diriyos na saray bansa so makapaoran;

anggan say tawen ag to makapangipelag na mayamaya.

Sikay paniilaloan mi, Katawan a Dios mi,

ta sikay manggagawa na sarayan bengatla.”