2 Samuel 17 - Pangasinan Meaning-Based Bible(MBBPAN83)

Apalingo nen Cusai si Absalom

1Aminsan ya agew, inkuanen Ahitofel ed kinen Absalom, “Abuloyan mo ak pan mamili na labinduan libon lalaki, ta osilan miy David ed sayan labi.

2Dogpaan mi no naksawan tan nanaekalan lay biskeg na linawa. Nataktakot ed satan, tan ombatik iray totoo to. Say ari labat so pateyen ko,

3insan ko papawilen ed sika iray amin a totoo to; singa rad satan sakey a bii ya ompapawil ed asawa to. Saksakey a too so labay mon pateyen, kanyan ag ko diwiten iray arum a totoo.”

4Akaliket si Absalom tan amin da ray pangulo na Israel ed sayan simbawa.

5Inkuanen Absalom, “Tawag yo diay Cusai, ta dengelen tayoy nibaga to met.”

6Nen sinmabiy Cusai, inkuanen Absalom ed sikato, “Niay simbawa nen Ahitofel; tombuken mi kasi? No andi, ibagam ed sikami no antoy gawaen.”

7Inmebat si Cusai, “Say simbawa natan nen Ahitofel et aliwan maung.

8Amtam a si amam a David tan saray totoo to et maung iran mibakal; masebeg iran singa uson kabatyan ya imbatik iray anak to. Likud nid saya, abayag lan mibabakal si amam, kanyan no labi ag onoogip a kaiba to ray totoo to.

9Nayarin manaamut natan ed ongib odino diad arum a pasen. Diad oras a dogpaan nen David iray totoom et nabalitaan na anggan siopa, ibaga ton atalo ray totoom.

10Diad satan anggan saray sankasebegan a totoo, ya anggapoy takot da a singa saray lion, et ontakot ira, ta amta na amin a totood Israel a matalonggaring a sondalo si amam tan maung a mibakal iray totoo to.

11Say simbawak sirin et say panipon mod amin ya Israelita, manlapud baley na Dan ya anggad baley na Beer-seba, a singa ra karakel na buer ed dayat; insan sikan dili so mangipangulod pibakal da.

12Anapen tayoy David ed anggan iner a kawalaan to, insan tayo biglaan a dogpaan. Anggapod satan so anggan sakey a manilay ed sikara.

13No ombatik ed sakey a siudad, mangalay lobir iray totoo tayo tan biraen tayod patar so siudad! Diad satan, anggapoy anggan sakey a baton natilak diman ed toktok na pokdul.”

14Inkuanen Absalom tan amin da ray Israelita, “Maung so simbawa nen Cusai nen si Ahitofel.” Ginetma na Katawan ya ag natombuk so maung a simbawa nen Ahitofel, pian walay maoges ya onsabi ed kinen Absalom.

Akabatik si David

15Insan imbaga nen Cusai ed kindi Sadoc tan Abiatar a papari so simbawa tod kinen Absalom tan saray panguloy Israelita, tan say simbawa met nen Ahitofel.

16Inyarum nen Cusai ya inkuan, “Ganatan yo! Paibaga yod kinen David a diad sayan labi ag ira manaayam ed saray babaliwan ed ilog diad kalawakan, no ag ingen baliwen ton tampol so Jordan, pian sikato tan saray totoo et ag ira naerel tan ag ira napatey.”

17Si Jonatan a lakin anak nen Abiatar tan si Ahimaaz a lakin anak nen Sadoc et manaalagar irad En-rogel, diad asingger ed Jerusalem, ta ag da labay a nanengneng iran onloob ed siudad. Mabetbet ya onlad may sakey a biin aripen tan ibaga tod sikaray nagagawa, insan ira onlad satan a mangibalitad kinen Ari David.

18Balet aminsan nibanan anengneng ira na sakey ya ogaw a laki, insan to imbagad kinen Absalom, kanyan maganat iran linman onamut ed abung na sakey a lakin taga Bahurim. Walay bobun tod abay na abung to, tan diman ira linmasur.

19Angalay sakub so asawa to may laki, inyan tod sangab na bobun, tan tinayakan toy trigo, pian anggapoy makaimano na antokaman.

20Sinmabi ray opisyal nen Absalom ed samay abung tan tinepet dad samay bii, “Kawalaan di Ahimaaz tan Jonatan?”

“Binaliw day ilog,” ebat to.

Inanap da ra balet ag da ra narumog, kanyan amawil la rad Jerusalem.

21Kasiput da, pinmaway ed bobun si Ahimaaz tan si Jonatan, insan ira linmad kinen David. Imbaga rad sikatoy plano nen Ahitofel sumpad sikato, insan da inkuan, “Ganatan yo; baliw ki lad ilog.”

22Kanyan binaliw nen David tan saray totoo to so Jordan; akabaliw iran amin kasakbayay kabwasan.

23Nen anengneng nen Ahitofel ya ag atombuk so simbawa to, kinabayoan toy asno to, insan pinmawil ed dilin baley to. Kayari ton inapiger so kipapasey kayaryan to, imbitay toy laman to. Nipompon ed lobuk na pamilya to.

24Nen akasabid baley na Mahanaim si David, abaliw la nen Absalom tan saray totoo to so Jordan. (

25Si Absalom insalat toy Amasa ed pasen nen Joab a pangulo na saray sondalo. Si Amasa lakin anak nen Itra ya Ismaelita; say ina to si Abigail ya anak nen Nahas tan agi na ina nen Joab a si Sarvia.)

26Si Absalom tan saray Israelita nankampo ra ed dalin na Galaad.

27Nen sinmabid Mahanaim si David, inabet nen Sobi a lakin anak nen Nahas a taga siudad na Rabba ed Ammon, tan si Makir a lakin anak nen Amiel a taga Lodebar, tan si Barzillai a taga Rogelim ed Galaad.

28-29Angawit ira na saray yaung, saray banga, tan saray ikakanad kakaogip; nanawit met iray kakanen a para si David tan saray totoo to: trigo, sibada, arina, insanglil a trigo, agayep, bokebokel, dilo, kiso, gatas, tan pigaran karniro. Amta ra a si David tan saray totoo to et narasan, napgaan, tan naksawan ira ed kalawakan.