Saray Bilang 27 - Pangasinan Meaning-Based Bible(MBBPAN83)

Saray Bibiin Anak nen Zelofehad

1Di Mala, Noa, Hogla, Milca, tan Tirza so bibiin anak nen Zelofehad a lakin anak nen Hefer a lakin anak nen Galaad a lakin anak nen Makir a lakin anak nen Manases a lakin anak nen Jose.

2Linma ran nanalagey ed arap di Moises, Eleazar a pari, saray pangulo, tan amin ya Israelita diad lolooban na Tuldan Ayamay Katawan tan inkuanda,

3“Inatey ed kalawakan si ama mi tan anggapoy anak ton laki. Aliwa ran kabyangan na saray mananumbok nen Core a sinmumpa ed Katawan; inatey ira lapud kasalanan dan dili.

4Akin et naandid Israel so ngaran di ama mi lapu labat ya anggapoy anak dan laki? Patawir yo kami pa met a singa saray lalakin kakanayon di ama mi.”

5Sayan kerew da et inyapireng nen Moises ed Katawan,

6et say Katawan kuantod sikato,

7“Manepeg ya iter so kerew na saray bibiin anak nen Zelofehad; patawir mo met ira a singa saray lalakin kakanayon nen ama ra. Say tawir to et nepeg a niiter ed sikara.

8Ibagam ed saray Israelita a no ompatey so sakey a laki ya anggapoy anak ton laki, say anak ton bii so manawir na kayaryan to.

9No anggapoy anak to bii, saray agagi ton lalaki so manawir na kayaryan to.

10No anggapoy agi ton laki, saray lalakin agagi nen ama to so manawir na kayaryan to.

11No anggapoy agi ton laki odino pangamaen to, say sankaasinggeran a kanayon to so manawir na kayaryan to tan ipasen ton kayaryan to la. Saray totood et nepeg a sumpalen da ya, onung na ingganggan ko, siak a Katawan, ed sika.”

Apili si Josue ya Onsalat ed kinen Moises(Deut. 31:1-8)

12Say Katawan kuantod kinen Moises, “Kalab kad Palandey na Abarim tan bantagan mo so dalin ya iter kod saray Israelita.

13Kayarim a nabantagan, ompatey ka a singa impatey nen agim ya Aaron,

14lapud sinumlang yon dua so ganggan ko diad kalawakan na Zin. Nen nanriklamon amin iray Israelita sumpad siak diad Meriba, ag yo binirbir so masanton pakayarik ed arap da.” (Say Meriba et sikatoy sobul dimad Cades diad kalawakan na Zin).

15Nampikasi si Moises,

16“Katawan a Dios, a panlalapwan na amin a bilay, pikasik ed sika a manoro ka na sakey a lakin nayarian ton iwanwan iray totoo

17tan nayarian ton ipangulo rad bakal, pian say olup na totoom et ag ira magmaliw a singa saray karniron anggapoy pastol da.”

18Say Katawan kuantod kinen Moises, “Tawag moy Josue a lakin anak nen Nun, tan itapew mo ray liman ed olo to ta sikatoy lakin nayarian toy mangipangulo.

19Paalagey mo ed arap nen Eleazar a pari tan saray amin ya Israelita, insan mo ibawag ed arap dan amin a sikatoy onsalat ed sika.

20Iter mod sikato so arum a pakaoley mo, et onuren na amin a totood Israel.

21Diad kinen Eleazar a pari, diad pangikana to na Urim tan Tummim so pakaamtaan toy linawak. Onya so pangiwanwan nen Eleazar ed kinen Josue tan amin ya Israelita diad amin a gawaen da.”

22Ginawa nen Moises so ingganggan ed sikato na Katawan. Impanalagey toy Josue ed arap nen Eleazar a pari tan saray amin ya Israelita.

23Onung na ingganggan na Katawan, intapew nen Moises iray lima to ed olo nen Josue tan imbawag to a sikatoy onsalat ed sikato.