Ezekiel 3 - Pangasinan Meaning-Based Bible(MBBPAN83)

1Inkuan na Dios, “Sika a toon ompatey, akan mo yan nilokut a babasaen; insan ka onlan mansalita ed saray totood Israel.”

2Kanyan sinmangi ak tan initdan to ak na kanen kon nilokut a babasaen.

3Inkuanto, “Akan mo yan babasaen ya iiter kod sika; panom so eges mo na saya.” Kinan ko, et masamit a singa dilo.

4Insan inkuan na Dios, “Sika a toon ompatey, lakad saray totood Israel tan salitam ed sikara so antokaman a paibagak ed sika.

5Ag ta ka ibabakid saray totoon mansasalita na mairap a salita na arum a bansa, no ag ingen ibabaki ta kad saray Israelita.

6No ibaki ta kad saray ankakabaleg a bansan mansasalita na saray mairap a salitan ag mo natalusan, ondengel irad sika.

7Balet anggapod saray totood Israel so ondengel ed sika; ag da ak anggan dengelen. Anawet so olo tan puso ran amin.

8Natan gawaen ta kan singa sikara ya anawet so puso tan olo ra.

9Gawaen ta kan anawet a singa bato odino diamanti; ag ka ontatakot ed saraman a mananumpa.”

10Intuloy na Dios ya inkuan, “Sika a toon ompatey, dengel kan maung tan tandaan moy ibagak ed sika.

11Insan kad satan onla ed saray kaparam a Judio a nibantak ed arum a bansa tan salitam ed sikara so ibabagak ed sikara, siak a Katawan a Dios, dengelen da ka man odino andi.”

12Insan intagey ak na ispiritu na Dios, tan nadngel kod nibeneg ko so maksil tan manungol a bosis a kuanto, “Nadayew komun ed tawen so kagalangan na Katawan!”

13Nadngel kon mamparakpak ira may payak na saray pinalsan mabilay, tan say ungol da ra may dalig a singa ungol na yegyeg.

14Linmoob ed siak so mabiskeg a pakayari na Katawan, tan diad pangaawit ed siak na ispiritu, akapasnuk ak tan ansakit so linawak.

15Kanyan linma ak ed Tel Abib ed gilig na Ilog na Kebar a dimay panaayaman na saray nibantak ya Israelita, tan diad loob na pitoy agew ya impanayam kod man, ag ak akaskasel lapud saramay anengneng tan nadngel ko.

Tinoro na Katawan

a Managbantay si Ezekiel(Ez. 33:1-9)

16Kalabas na pitoran agew say Katawan akisalitad siak.

17Inkuanto, “Sika a toon ompatey, gawaen ta ka a managbantay ed bansa na Israel. Ipasabim ed sikara iray pasakbay ya ibabagak ed sika.

18No ibagak ed sakey a toon maoges ya ompatey balet et ag mo pinasakbayan a mangoman ed bilay to pian nipaliis ed patey, sikakasalanan ya ompatey, balet singilen ta ka lapud impatey to.

19No pinasakbayan moy sakey a toon maoges et ag to tondaay pankakasalanan to, ompatey a sikakasalanan, balet nilaban moy bilay mo.

20“No manggaway kaogsan so sakey a toon peteg a matonung tan ipapasen kod maatap a kipapasen, ompatey no ag mo pasakbayan. Ompatey lapud saray kasalanan to—ag ko nunoten iray kamaungan a ginagawa to—tan singilen ta ka lapud impatey to.

21No pasakbayan mon ag mankasalanan so sakey a toon matonung, et dengelen to ka tan ag mankasalanan, mansiansian mambilay, tan nilaban moy bilay mo.”

Ag Makasalita si Ezekiel

22Aliknak so pakayari na Katawan tan nadngel kon kuantod siak, “Alagey ka tan lakad patar. Mitongtong ak ed sikad man.”

23Linma ak sirin ed patar, tan anengneng kod man so kagalangan na Katawan, a singa samay anengneng kod gilig na Ilog na Kebar. Tinmikleb ak ed dalin,

24balet linmoob ed siak so ispiritu na Dios tan pinaalagey to ak. Inkuan na Katawan ed siak, “Sempet ka la tan mankolung kad man ed abung mo.

25Nabalur ka, sika a too, tan ag ka makakar ed kawalaan da ray totoo.

26Patalkeren koy dilam, pian ag mo napasakbayan ira man a totoon mananumpad sika.

27Insan no misalita ak ed sika lamet tan ipawil kod sikay pakapansalita, ibagam ed sikaray sasalitaen ko, siak a Katawan a Dios. Pigarad sikaray ondengel, balet pigara met ed sikaray ag ondengel ed sika lapud totoo ran mananumpad siak.”