Probirbio 11 - Pangasinan Meaning-Based Bible(MBBPAN83)

1Kabosul na Katawan so masaol a simbangan, balet maliket ed dugan simbangan.

2Ag mabayag napelag ed kababaingan iray totoon mapaatagey. Makabat so toon mapaabeba.

3No maung ka iwawanwan ka na kaptekan. Saray totoon ag napampiaan dederalen ira na inkasaol da.

4Anggapoy kakanaan so kayamanan mo no asabi lay agew na ipatey mo, balet say kaptekan nilaban toy bilay mo.

5Say kaptekan papainomayen toy bilay na maung a too, balet say toon maoges deralen toy sikaton dili.

6Say inkatonung iyaagel toy toon maptek so panagbilay to, balet say toon ag napampiaan nanaerel na dilin inkaagom to.

7No ompatey so toon maoges, naandipat lay ilalo to. Anggapoy kabaliksan so panmatalek ed kayamanan.

8Niaarawid gunigon iray totoon matonung; ingen saray totoon maoges lalaen to.

9Nayarin deralen ka na saray totoon anggapoy Dios, balet nayarin ilaban ka na kakabatan na saray totoon matonung.

10Maliket so siudad no saray totoon matonung et maaligwas ira, tan no ompatey iray totoon maoges wala ray eyag na liket.

11Magmaliw a matalonggaring so siudad no saray totoon matonung et bibindisionan da; balet naderal so siudad lapud panaglabir da ray totoon maoges.

12Makulang-kulang so toon mambabalaw ed kapara ton too. No makabat ka mandeen ka.

13Ag nipiya so sikrito ed toon managtalabutob, balet nipiya so antokaman ed toon napanmatalkan.

14Naderal so bansa no anggapoy panangiwanwan, balet arawid kaatapan no dakel iray sumisimbawa.

15No isipan mon bayaran so utang na toon ag mo kabat magbabawi kad kaonuran. Maung niy kipapasen mo no ag ka mibabali.

16Napapagalangan so biin masimpit, balet mangiiter na kabaingan so biin maoges.

Ag nawalaay kuarta so toon mangiras, balet onyaman so toon makoli.

17Say toon mapangasi iitdan toy kaabigan so sikaton dili, balet say toon maruksa papasakitan toy sikaton dili.

18Saray totoon maoges anggapon tuay nagonggona ran kaabigan, balet no gawaen moy kaptekan andi-saew sikay natumangan.

19Mambilay so toon pilalek to lawas so manggaway katonungan, balet ompatey so toon ipasoot toy manggaway kaogsan.

20Kabosul na Katawan iray totoon walay maoges a kanunotan, balet inaro to ray manggagaway kaptekan.

21Andi-saew a nadusa iray totoon maoges, balet makapaliis iray totoon matonung.

22Say biin maganggana ya aliwan maptek so panagnunot to, aliling toy balituk a singsing a walad songut na baboy.

23Say pilalek na saray totoon matonung mansumpal lawas ed kamaungan; no naala na saray totoon maoges so pilalek da, ampetang so olo na amin a totoo.

24Wala ray totoon magastos, balet onyayaman met ni ran siansia. Wala ra met so mapeget a manggastos, balet mandenden so kairapan na bilay da.

25Onaligwas so toon mabonluk a mangiter. Say toon matulong makaawat na tulong.

26Isasamba na katoowan so toon mangisisinup na ilik to, lapud panaalagar toy itagey na bili to, balet idadayew da so toon mangilalako lay ilik to.

27No kamaungan iray getmam, sikay napagalangan, balet no goloy anapen mo, sikatoy narumog mo.

28Saray totoon manmamatalek ed kayamanan da et nalemay ira a singa nalnes a tanaman, balet saray totoon matonung onaligwas ira a singa mabonabonan tanaman.

29Say toon mangiiter na gunigon ed dilin pamilya to et anggapoy naala to diad kaonuran.

Say makulang-kulang a too aripen lawas na makabat a too.

30Bilay so iiter na katonungan, balet eekalen na inkaruksa.

31No natumangan diad tapew na dalin iray totoon matonung, andi-saew a nadusa iray totoon maoges tan makasalanan.