Ezekiel 35 - Pangasinan Meaning-Based Bible(MBBPAN83)

Say Dusa ya Iter na Dios ed Edom

1Say Dios akisalitad siak.

2Inkuanto, “Sika a toon ompatey, mansalita ka na sumpad Edom.

3Ibagam ed saray totood man so ibabagak, siak a Katawan a Dios:

“Siak so kalaban yo, sikayon kapalandeyan na Edom!

Pagmaliwen ta kayon andi-kakanaan tan begtebegtew a dalin.

4Taynanan kon aderal-deral iray siudad mo

Tan say dalin mo a begtebegtew;

Diad satan naamtaan mo a siak so Katawan.

5“Sikay mabetbet a kalaban nen saman na Israel tan impapapatey mo ray totoo to diad samay panaon na inkaderal to, salanti samay kaonuran ya impakadusa to lapud saray kasalanan to.

6Lapud saya, legan a siak so mabilay a Katawan a Dios, andi-duaruwan say patey so pansumpalan mo, tan ag mo ya nibatikan. Nankasalanan kad impanpatey mod saray totoo, kanyan osilan ka met na patey.

7Pagmaliwen kon andi-kakanaan so dalin mo, Edom, tan pateyen kon amin iray manakar diman.

8Tayakan ko na bangkay iray kapalandeyan mo, tan saray bangkay da ray napatey ed bakal et nitaytayak irad kapokdulan tan diad saray patar.

9Pagmaliwen ta kan begtebegtew ya anggad angga, tan anggapo lay manayam lamet ed saray siudad mo. Naamtaan mod satan a siak so Katawan.

10“Imbagam a kayaryan mo ra may duaran bansa, say Juda tan say Israel, tan saray dalin da, tan sakopen mo ra, anggaman a siak a Katawan so Dios da.

11Lapud saya, legan a siak so mabilay a Katawan a Dios, andi-duaruwan singilen ta ka lapud samay impanpasnuk mo, impangimon mo, tan samay impanbosul mod saray totook. Naamtaan da a dudusaen ta ka lapud saramay ginagawam ed sikara.

12Diad satan, nakabatan mo a siak a Katawan et nadngel ko may mapaatagey mon impansalita a begtebegtew iray kapalandeyan na Israel tan nayarian mon gawaen so labalabay mo ed sikara.

13Nadngel koy mapalalon mapaatagey ya impansasalitam sumpad siak.”

14Say Katawan a Dios kuanto, “Pagmaliwen ta kan begtebegtew pian manliket so intiron mundo ed inkaderal mo,

15a singa samay impanliket mod inkaderal na Israel a kayaryan ko. Say kapalandeyan na Seir, on, say intiron dalin na Edom, magmaliw a begtebegtew. Diad satan naamtaan na amin a katoowan a siak so Katawan.”