Sirac 49 - Pangasinan Meaning-Based Bible(MBBPAN83)

Si Josias

1No nunoten si Josias, singa samit na balingit na dugarugan inkalauk na insinso, masamit a singa dilo ed taway, singa musikan kaibay alak ed sakey a ponsia.

2Tinombuk toy dugan totontonen nipaakar ed pangapiger ed kipapasen na bansa tan inekal toy makapaingungot a panangigalang ed saray talintaoy diriyos.

3Sikatoy sigput a matoor ed Katawan tan pinabiskeg toy tuan rilihion ed saraman a maoges a panaon.

Si Jeremias

4Mapalaloy impankasalanan da ray amin ya arari likud ed kindi David, Ezekias, tan Josias, lapud inkaindan da so Ganggan na Sankatageyan ya anggad impangangga na nanarian.

5Insuko ray pakayari tan kagalangan da ed saray totood arum a bansa

6ya amool ed masanton siudad tan anaynan a begtebegtew ed saray dalan, onung na impasakbay nen Jeremias.

7Aliwliway impanggagawa rad sikato, anggaman a sikatoy apili lan sakey a propita kasakbayan na inkianak to, “a mamagut tan mangitumba, maneral tan manalo,” balet “mamaalagey tan mantanem,” met.

Si Ezekiel

8Si Ezekiel so akapangipanengnengan na pasingayew na kagalangan na Dios. Anengneng to ya diad tagey na karwahi tan saray mabilay a pinalsa.

9Binitla to met si Job a maung lawas so ginagawa to.

Saray Labinduan Propita

10Ombangon komun ed balon bilay iray pokel na labinduan propita, lapud pinabiskeg na sarayan totoo so linawa da ray totood Israel tan inlaban da ra diad panamegley na ilalon malet.

Si Zerubabel tan si Josue

11Panoy pangidayew tayod Zerubabel? Sikatoy singa singsing a panagtimbri na ari a walad kawanan na limay Katawan,

12a singa si Josue a lakin anak nen Josadak. Pinasimbalo ran impaalagey so masanton Timplo na Katawan, ya ingganan para andi-anggaan ya inkabantug.

Si Nehemias

13Baleg met so pakanudnunotan ed kinen Nehemias. Pinasimbalo ton impaalagey iray aderal a padir na Jerusalem, tan inyan to ray puirta tan saray balewet. Pinasimbalo to met ya impaalagey iray kaabungan tayo.

Saray Patriarka

14Anggapoy miparad kinen Enoc a nankurang ed tapew na dalin, ta mabilay a niatagey ed tawen.

15Anggapoy singa si Jose ed saray nianak a totoo; apagalangan iray anggan pokel to.

16Mapalalon apagalangan ira di Sem, Set, tan Enos, balet baleg niy kagalangan nen Adan nen say siopaman a too.