Mikias 1 - Pangasinan Meaning-Based Bible(MBBPAN83)

1Legan na impanoley di Ari Jotam, Acaz, tan Ezekias ed Juda, say Katawan inter to yan salita ed kinen Mikias a taga baley na Moreset. Impaamta na Katawan ya amin ira yan bengatlan nipaakar ed Samaria tan Jerusalem.

Say sakey a Tagleey na Ermen a para Samaria tan Jerusalem

2Dengel yo ya, amin yon bansa;

dengel yo ya, amin yon manaayam ed tapew na dalin!

Mantasi so Katawan a Dios sumpad sikayo.

Dengel kayo! Mansasalita a manlapud mangatatawen a timplo to.

3Say Katawan et onsasabin manlapud masanton pasen to;

onakseb tan manakar ed toktok da ray kapalandeyan.

4Insan diad silong to natonaw iray kapalandeyan,

natonaw iran singa katonaw na ispirmad apoy;

onibung irad saray patar, singa danum ya onaagos a nanlapud kapokdulan.

5Nagawa ra yan amin lapud nankasalanan iray totood Israel tan sinmumpa rad Dios. Siopay natetel ed insumpa na Israel? Say Samaria a dilin manonan siudad! Siopay nankasalanan na pididios ed talintao da ray diriyos diad Juda? Say Jerusalem!

6Kanyan say Katawan kuanto, “Pagmaliwen ko a bunton na deral-deral so Samaria diad maawang a kaumaan, say pasen a taneman na saray ubas. Ibalasobus kod patar iray aderal-deral ed siudad tan paolyan kon kipaway-paway iray pundasion na siudad.

7Namisimisid kibasig-basig ya amin iray mabmablin talintao to, natemek ed apoy ya amin iray bengatlan niiter ed saray marotak a lalaki tan bibiid timplo, tan nagawan bunton na deral-deral iray imahin to. Amin da ray bengatlan atipon na Samaria lapud impangigalang ed saray diriyos a makapabona, kanyan saray kalaban ibatik da ran amin ed arum a pasen, ta ikana da rad arum a pasen para saray marotak a lalaki tan bibii ed timplo.”

8Insan inkuanen Mikias, “Lapud saya manermen ak tan mantagleey ak. Diad pangipanengneng koy ermen ko, manakar-akar ak a labus-lakseb tan kasali-sali. Managugol ak a singa asod katakelan tan mandageyem ak a singa abistrus.

9Ag naabigan iray sugat na Samaria, tan ngalngali la manirap so Juda a singa paniirap na Samaria; asabian lay deral iray puirta na Jerusalem a panaayaman da ray totook.”

Manasingger ed Jerusalem iray Kalaban

10Ag mo ibabagad saray kalaban mid Gat so inkatalo mi; ag mo ipapanengneng ed sikara so panaakis mo. Totood Bet-lefra, ipanengneng yoy paneermen yo diad panamegley na pantolin-tolin yod dabuk!

11Sikayon taga Safir, laka yon nibantak ed arum a bansa, a labus-lakseb tan nababaingan kayo. Saray manaayam ed Zaanan et ag da sasalien so ompaway ed siudad da. No narengel yon maneermen iray taga Bet-ezel, naamtaan yo ya anggapod may nasalimbengan.

12Saray totoon taga Marot et mapagpaga ran manalagar na pakainawaan da, lapud angyakar na deral ed abay na Jerusalem so Katawan.

13Sikayo ran manaayam ed Lakis, isinta yod saray kabayo iray karwahi. Inaalig yo ray kasalanan na Israel kanyan sikayoy nanlapwan na impankasalanan na Jerusalem.

14Et natan, sikayo ran totood Juda, mampatanir kayo la ed baley na Moresetgat. Saray ararid Israel et anggapoy naalagar dan tulong a manlapud baley na Akzib.

15Sikayo ran totood Maresa, paoleyan kayo na Katawan ed pakayari na saray kalaban yo, a sikaray manakep na baley yo. Onlan onamut ed ongib na Adulla iray pangulo na Israel.

16Sikayo ran totood Juda, katlian yo ray buek yo diad pangipanengneng yoy kaermenan yo, lapud saray inararo yon anak. Kiskisan yoy kaolowan yo a singa saray buitri, lapud naalad sikayo ray anak yo tan nibantak irad arum a bansa.