1Kayari to ya, tinepet nen David ed Katawan, “Onla ak a manakop ed sakey ed saray baley na Juda?”
“On,” ebat na Katawan.
“Dinan ey?” tepet nen David.
“Say Hebron,” kuay Katawan.
2Kanyan linmad Hebron si David a sankaawit to ray duaran asawa to a si Ahinoam a taga Jezreel, tan si Abigail, say balo nen Nabal a taga Carmel.
3Inawit to met iray totoo to tan saray pamilya ra, tan nanayam irad saray baley a kaliber-liber na Hebron.
4Insan saray lalakid Juda linma rad Hebron tan nilanaan day David a manarid Juda.
Nen nadngelan nen David a si Saul et impompon na saray totood Jabes, diad Galaad,
5angibakid man na pigaran lalaki tan impaikuanto: “Bindisionan kayo komuy Katawan lapud impangipanengneng yoy inkatoor yod Saul ya ari yo diad impangipompon yod sikato.
6Et natan ipanengneng komun na Katawan so panangasi tan inkatoor tod sikayo. Maung met so ipanengneng kod sikayo, lapud sayan ginawa yo.
7Mampabiskeg tan mampasebeg kayo! Inatey lay ari yon Saul, tan saray totood Juda et nilanaan da ak a manari ed sikara.”
Agawan Arid Israel si Isboset8Say pangulo da ray sondalo nen Saul a si Abner ya anak nen Ner et akabatik a kaiba toy Isboset a lakin anak nen Saul. Batik irad Mahanaim a nibaliw na Jordan.
9Si Abner ginawa tod man si Isboset a manarid saray lugar na Galaad, Aser, Jezreel, Efraim, tan Benjamin—diad intiron Israel.
10Apataploy taon to nen agawan ari ed Israel, tan nanoley na duay taon.
Balet say tribu nen Juda matoor ed kinen David,
11tan diad Hebron nanoley ed Juda na pitoy taon tan kapaldua.
Say Bakal na Israel tan say Juda12Manlapud Mahanaim, si Abner tan saray opisyal nen Isboset linma rad siudad na Gabaon.
13Linma met diman si Joab a lakin anak nen Sarvia tan saray arum ya opisyal nen David, tan nanaabet irad samay dipositoy danum diman. Say sakey a grupo inmirung ed sakey a dapag tan say sakey a grupo diad basil.
14Inkuanen Abner ed kinen Joab, “Panlalabanen tayo ray pigaran lalaki na balang dapag.”
“On, sigi!” ebat nen Joab.
15Kanyan saray labindua ed lalakin walad dapag nen Isboset tan tribu nen Benjamin et nilabanan da ray labindua ed saray lalakin walad dapag nen David.
16Balang sakey binembenan toy olo na kalaban to tan dinoyuk tod diking, kanyan nambabansag iran atumban inatey. Kanyan saman a pasen ed Gabaon tatawagen na “Alog na saray Ispada.”
17Insan tinmerak so pinasyan bakal, et saray totoo nen David tinalo da ra di Abner tan saray Israelita.
18Akibakal iray taloran lalakin anak nen Sarvia a di Joab, Abisai, tan Asael. Si Asael, a mabatik a singa ulsad katakelan,
19inosilan toy Abner. Inosilan ton andi-lingawan.
20Linmingaw si Abner tan kuanto, “Si Asael ka?”
“On,” ebat to.
21“Tondaan mo ak lan osilan!” kuanen Abner. “Osilan mo lay sakey ed saray sondalo tan alam so antokaman a walad sikato.” Balet ag tinondaan nen Asael.
22Inkuan lamet nen Abner, “Tondaan mo ak lan osilan! Akin et papatey kad siak? Panoy piarapan kod agim a si Joab?”
23Balet ag tondaan nen Asael; kanyan dinoyuk nen Abner na pika ed pabenegan et nakna tod eges tan tinmalus ed beneg to. Alokbub ed dalin si Asael, tan inatey. Tinmonda tan nantanyareg so balang sakey a makasabid abaktaran nen Asael.
24Balet sinmoblay ya inmosil ed kinen Abner ira di Joab tan Abisai, et nen onseselek lay agew nakar day pokdul na Amma a nibokig na Gia diad dalan a mamaarap ed kalawakan na Gabaon.
25Saray totoon nanlapud tribu nen Benjamin nantitipon ira lamet ed kawalaan nen Abner, tan nanalagey iran akaparaan ed toktok na sakey a pokdul.
26Kinolyaotan nen Abner si Joab, “Akin, ag itayo la ontondan manlalaban? Ag yo ta nanengneng a kapaitan labat so pansumpalan tayo? Kabaleyan yo kami. Kapigay pangiganggan mod saray totoom a tondaan da kami lan osilan?”
27Inmebat si Joab, “Sambaan kod ngaran na mabilay a Dios a no ag ka labat nansalita, osilan ka na saray totook ya anggad kabwasan.”
28Insan pinaknul nen Joab so trumpita et saray totoo tinondaan da lan osilan iray Israelita. Kanyan tinmonda met la so bakal.
29Sanlabin bineltang di Abner tan saray totoo to so Patar na Jordan; binaliw day Ilog na Jordan, tan kayariy impanakar da nin sankabwasan na ontombuk ya agew akasabi rad Mahanaim.
30Nen tinondaan la nen Joab so inmosil, tinipon to ray amin a totoo to tan arumog ton labinsiam so inatey, andi-baliy Asael.
31Saray totoo nen David akapatey iray talon lasus tan anemaplon totoo nen Abner a kabyangan iray tribu nen Benjamin.
32Inala nen Joab tan saray totoo to so bangkay nen Asael tan impompon dad lobuk nen ama to diad Betlehem. Insan sanlabi ran nanakar et diad palbangon akasabi rad Hebron.
Who We AreWhat We EelieveWhat We Do
2025 by iamachristian.org,Inc All rights reserved.
