1Inkuanen propita Elias a taga Tisbe na Galaad ed kinen Ari Aca, “Diad ngaran na Katawan a mabilay a Dios na Israel a panlilingkuran ko, ibagak ed sikan anggapoy napelag a linaew o oran ed loob na arapen a duara odino taloy taon ya anggad ag ko pangibagan onoran la.”
2Insan inkuan na Katawan ed kinen Elias,
3“Taynan mo yan pasen tan lakad bokig, insan ka onamut ed Kolus na Carit a nibokig na Jordan.
4Diad kolus ka manalay inomen mo, tan ingganggan kon maniter ed sikay taganom iray wawak.”
5Inonur nen Elias so ganggan na Katawan; linman nanayam ed abay na Kolus na Carit.
6Naniinom ed danum na kolus, tan kabwasan tan labi ya inyaakaran na saray wawak na tinapay tan karni.
7Ag abayag nakatan imay kolus, lapud anggapoy oran.
Si Elias tan say Biin Balo ed Sarepta8Insan inkuan na Katawan ed kinen Elias,
9“Lakad baley na Sarepta, diad asingger ed Sidon tan manayam kad man. Ingganggan koy sakey a biin balo a tagad man a pakanen to ka.”
10Kanyan linmad Sarepta si Elias; nen manasingger lad puirta na baley akanengneng na sakey a biin balo a mandodokdok na kiew ya itotongo. Inkuantod sikato, “Itdan mo ak pay danum ya inomen.”
11Nen oonla lan mangala may balo na inomen, impaabot ton inkuan, “Iyalaan mo ak pa met na pigaran tinapay.”
12Inmebat imay bii, “Diad ngaran na mabilay a Katawan a Dios mo, sambaan kod sikan anggapoy tinapay ko. Sankaakup labat so arinak a walad pasig tan dagdaiset a larak na oliban walad garapon. Linma ak diad mandokdok na itongo, insan ko isempet, ta iparaan ko may arinak a para siak tan say anak kon laki. Kaonuran la man a kanen mi, insan ompatey kami lad eras.”
13“Ag ka mapaga,” kuanen Elias ed sikato. “Laka la, ta iparaan moy kanen yo. Balet igawaan mo ak ni ed satay walad sikan arina na sakey a tinapay, insan mo dia iyakar. Kayarim iparaan moy kera para sika tan say anak mon laki.
14Ta onyay inkuan na Katawan a Dios na Israel, ‘Ag naandian na arina so pasig, tan ag naandian na larak so garapon anggad ed agew a siak, say Katawan et mangipelag ak na oran.’”
15Anempet imay balo tan ginawa toy onung na imbagad sikato nen Elias, et awalaan iran amin na nakan ed amayamay ya agew.
16Onung na insipan na Katawan, diad panamegley nen Elias, ag naandian na arina so pasig tan ag naandian na larak so garapon.
17Nen ontombuk iran agew, akainagem imay lakin anak na samay balo; dinmenden lan dinmenden so sakit to, insan diad kaonuran inatey.
18Inkuantod kinen Elias, “Too na Dios, akin et ginawam ed siak ya? Linma ka dian mangipanunot ed Dios na kasalanan ko, pian onsabiy patey ed anak ko?”
19“Iyakar mod siak itay anak mo,” kuanen Elias. Sinakloy nen Elias imay ogaw, inyakar tod kuartod tagey a panaayaman to, tan imparokul tod katri.
20Insan maksil so bosis ton nampikasi, “O Katawan kon Dios, akin et onya lan makapasinagem so ginawam ed samay balo? Pinatuloy to ak tan pinagaan to ak; akin et binabawim lad bilay so anak to?”
21Insan amitlon inyonat toy laman to ed tapew na samay ogaw, tan nampikasi, “O Katawan a Dios ko, pabilay mo pa yan ogaw!”
22Inebatan na Katawan so pikakasi nen Elias; pinmawil so kamarerwa to may ogaw, et abilay.
23Impawil nen Elias imay ogaw diad leksab na abung ed kinen ina to tan kuantod sikato, “Nengneng mo, mabilay so anak mo!”
24Inmebat imay balo, “Amtak la natan a sakey kan too na Dios, tan tuan mansasalitay Katawan diad panamegley mo!”
Who We AreWhat We EelieveWhat We Do
2025 by iamachristian.org,Inc All rights reserved.
