Probirbio 17 - Pangasinan Meaning-Based Bible(MBBPAN83)

1Magmaung niy amagaan a tinapay a dongoan a walay kareenan, nen say baleg a ponsia a dongoan diad magolon abung.

2Say aripen a masilib naoleyan to so andi-kakanaan a lakin anak na amo to, et makapiapag ed tawir.

3Say balituk tan say pilak susuboken na apoy, tan say puso na too susuboken na Katawan.

4Saray totoon maoges ondedengel ed saray maoges a kanunotan tan saray matila ondedengel ira ed saray tila.

5No ludlureyen mo ray mairap-bilay ludlureyen moy Dios ya amalsad sikara. Nadusa ka no panliketan moy segsegang a sinmabid sakey a too.

6Saray mamasiken ikikinon da ray apo ra, a singa saray anak a lalaki ikikinon da ray kaamaan da.

7Mantitila ray totoon gagalangen, tan anggapoy makabaliksan ya ibabaga na saray makulang-kulang.

8Walay totoon abaloan da a singa salamangka so gagawaen na pasoksok; sisiaen dan nagawaan toy amin a bengatla.

9No labay mon aroen ka na kaparam a too, pirdonam ira no mankasalanan irad sika. Say ag pakalingwan ed saray kakapoyan, makaderal na pankakaaro.

10Say toon walay pakatalus, dakel niy naaral to ed sakey a pasnuk nen say naaral na toon makulang-kulang ed sanlasus a lewet.

11Singa maruksan manangibalita so isabi na patey ed saray totoon maoges a naynay a manangigapo na golo.

12Magmaung niy makasabat na uson imbatik da ray anak to nen say makasabat na toon makulang-kulang a walay getma ton maoges a gawaen.

13No kaogsan so ibales mod kamaungan, ag naandian na kaogsan so abung mo.

14Say gapo na sangsangan et singa abut ed diki; kanyan patondam kasakbayan ya ombaleg ni.

15Makapaingungot ed Katawan so panusa ed toon anggapoy kasalanan tan say pangibolus ed toon maoges.

16Anggapoy kakanaan na panggastos na makulang-kulang ed pakagamur toy aral, ta ag to ikakanay olo to.

17Saray kakaaro ipanengneng da lawas so panangaro ra. Antoy kana na sanaagi no ag ira mantatambayan ed gunigon?

18Say too labat ya ag to ikakanay olo to, so mangisipan a sikatoy makaoley ed utang na kapara ton too.

19Say panlabay ed kasalanan et panlabay ed golo. No malastug ka lawas, goloy aanapen mo.

20Ag onaligwas so siopaman a toon mannununot tan mansasalitay kaogsan; kaderalan labat so pansumpalan to.

21Baleg ya ermen na ama so anak a manggagaway kalokowan.

22Say gayaga pansiasiansiaen toy abig na laman mo. Say ermen mankalkalnan mansumpal ed patey.

23Saray maoges a huis mangaawat ira na maamut a pasoksok; napikewet ed satan so inkatonung.

24Say toon ikakana toy olo to gawan napnoy kakabatan so gegetmaen to, balet say toon makulang-kulang amayamay a bengatlay gegetmaen to.

25Say anak a makulang-kulang mangiiter ed ama to na kaermenan tan diad ina to say makapasinagem a liknaan.

26Sumlang ed katonungan so panmulta na toon anggapoy kasalanan; napikewet so katonungan no nadusa ray maung a totoo.

27Say toon madangka ed panagsalita amta toy gagawaen to, tan say toon popokpokan toy sikaton dili walay pakatalus to.

28Ta nayarin ipasen a makabat tan walay pakatalus so sakey a toon makulang-kulang no mandeen tan pepetan toy sangi to.