Isaias 51 - Pangasinan Meaning-Based Bible(MBBPAN83)

Saray Salitan Makaligliwa ed Jerusalem

1Say Katawan kuanto,

“Dengel yo ak, sikayon malabay a nilaban,

sikayo ran onsisingger ed siak ya onkerew na tulong.

Nunot yoy baton-dampay a nanlapwan yo,

say panagtabasan na bato ya akatabasan ed sikayo.

2Nunot yoy laki yon Abraham,

tan si Sara a sikaray sengeg na boleg yo.

Anggapoy anak nen Abraham nen tinawag ko,

balet binindisionan ko tan initdan ko na saray anak;

pinarakel ko ray kabyangay boleg to.

3“Kasian ko so Jerusalem

saray amin a manaayam ed saray deral-deral to.

Anggaman a kalawakan so dalin to, gawaen ko a sakey a tanamanan,

singa samay tanamanan a ginawak ed Eden.

Niwalad man so liket tan gayaga,

tan saray kantan pangidayew tan pisalamat ed siak.

4“Dengel yo ak, sikayo ran totook,

dengel yoy ibabagak:

Iter koy bangat ko ed saray bansa;

mangiter ed sikara na liwawa iray ganggan ko.

5Masiglat ak ya onsabi ta ilaban ko ra;

asingger lay agew na panalok;

Siak a dili so manoley ed saray bansa.

Saray arawin dalin aalagaren da ak ya onsabi:

siilalo ran manaalagar ed siak a mangilaban ed sikara.

6Tangay kad katawenan; nengneng kad mundo!

Naandipat a singa asewek so katawenan;

nabuyak a singa daan a kawes so mundo,

tan ompatey a singa apangat iray totoo to.

Balet mansiansia so kilalaban ya iter ko,

ag mangangga so pananalok.

7“Dengel yo ak, sikayon makaamta na inkatonung,

sikayo ran mabmabli ed puso, yoy bangat ko.

Ag kayo natatakot no balbalawen tan pabpabaingan kayo na saray totoo;

8naandipat iran singa ataboney a kawes!

Balet mansiansia so kilalaban ya iter ko;

say pananalok nasungdoan toy amin a panaon.”

9Liing ka pa, Katawan, ta tulongan mo kami!

Ikanam pa so pakayarim ta ilaban mo kami;

ikanam pa a singa ginawam nen saman.

Sika so nantetegteg ed Rahab a dragon ed dayat.

10Sika met so amaekat ed dayat

tan nanggawa kay dalan a binmeltang ed dayat,

pian makadalan ira may iyaagel mo.

11Onsabin magaygayaga ed Jerusalem

ira may inyagel mo,

mankanta tan maneyag ira lapud liket.

Manliket ira ed ando lan ando,

naandi lad bilay da so ermen tan dageyem.

12Say Katawan kuanto,

“Siak so mamapabiskeg ed sikayo.

Akin et takotan yoy too ya ompatey,

ya ag mambayag a mambilay a singa dika?

13Alingwanan yo lay Katawan a nanggawad sikayo,

ya angipanat ed katawenan

tan angiletneg na saray pundasion na mundo?

Akin et antakot kayo lawas ed

pasnuk da ray mamapairap ed sikayo,

saray sipaparaan a maneral ed sikayo?

Ag kayo la nadiwit na ontan lan pasnuk da.

14Ag mabayag nabolus la ray priso;

mambilay ira na andokey

tan nawalaan ira na amin a nakaukolan dan kanen.

15“Siak so Katawan a Dios yo;

kikimbogen koy dayat

tan panuungolen ko ray daluyon to.

Yahweh a Makapanyarin-amin so ngaran ko!

16Impanat koy katawenan tan

inlirak iray pundasion na mundo;

kuankod saray totood Jerusalem, ‘Sikayo ray totook!

Iter kod sikayo ray salitak,

tan iyaagel ta kayo diad panamegley na dilin limak.’”

Say Kasamputan na Kairapan na Jerusalem

17Jerusalem, liing ka!

Molagat ka tan bangon ka!

Inminom kad kupa na dusa

a diad pasnuk na Katawan et inter tod sikan inomen mo;

ininom mo, et nampadongilngil ed sika.

18Anggapoy mangiwanwan ed sika,

anggapod saray totoom

so mangitabin ed sika.

19Duaran deral so dinmalan ed sika:

dineral na bakal so dalin mo

tan naerasan iray totoom.

Anggapoy siopaman a mangabagey ed sika.

20Diad suyok na balang dalan

mamparogsod kapoy iray totoom;

singa ra ulsan narel ed iket na umaanop.

Alikna ray sulit na pasnuk na Dios.

21Sikayon maniirap a totood Jerusalem,

sikayon mandongilngil a singa kayo abuek,

22iyaagel kayo na Katawan a Dios yo tan kuanto,

“Eekalen koy kupan inter kod sikayo lapud pasnuk ko.

Ag yo la nepeg ya inomen so alak a makapadongilngil ed sikayo.

23Iter ko lad saray nampapairap ed sikayo,

saray amarokul ed sikayo ed saray dalan,

insan da kayo ginagatinan a singa kayo dotak.”