Daniel 12 - Pangasinan Meaning-Based Bible(MBBPAN83)

Say Panaon na Kasamputan

1Samay anghil a linen so kawes to inkuanto, “Diad satan a panaon ompanengneng imay matalonggaring ya anghil Miguel a mangguaguardiad saray totoom. Insan la ondalan so panaon na ontan lan kairapan ya ag nin balut dinmalan nanlapu lad inletneg da ray bansa. No onsabiy tan a panaon, nilaban ya amin iray totoo na bansa a nisulat so kangaranan dad libro na Dios.

2Onolid bilay iray amayamay ed saray inaatey la: manliket ed bilay ya andi-anggaan iray arum balet manliknay andi-anggaan a kababaingan iray arum.

3Onsinag a singa liwaway tawen iray makabat a pangulo. Ontan met, saray ananggoyur ed saray amayamay a totoo diad panggawa ray inkatonung et anggad anggan onsinag iran singa saray bitewen.”

4Inkuantod siak, “Natan, Daniel, ikaput mo la so libro tan timbrian mo ya anggad isabiy anggaan na mundo. Legan to ya, amayamay iray mandarak na sagput dan mangamta na kabaliksan na nagagawa.”

5Insan anengneng koy duaran lalakin manalalagey ed nantopag a pandel na ilog.

6Say sakey ed sikara tinepet tod anghil a manalalagey ed bandad tulo tan akakawes na linen, “Kapigay itonda na sarayan makapakelaw a nagagawa?”

7Samay anghil inyonat tod tawen iray lima to tan nansambad ngaran na Andi-anggaan a Dios. Nadngel kon imbaga to, “Anggad onlabas so taloy taon tan kapaldua. No mansamput lay panagpairap ed saray totooy Dios, agawa la ya amin a bengatla.”

8Nadngel koy imbaga to, balet ag ko atalusan. Kanyan tinepet ko, “Balet panoy pangangga na amin a bengatla?”

9Inmebat imay anghil, “Laka la, Daniel, ta nepeg ya iyamut ira yan salita tan ag iran balut ipaamta ya anggad onsabi lay anggaan.

10Amayamay iray totoon nalinisan. Ag natalusan na saray totoon maoges, balet ituloy day panggagawa ray kaogsan; saray makabat labat so makatalus.

11“Manlapud samay panaon ya apatonda so inagew-agew a panagbagat, salantiy manlapud samay panaon na Makapataktakot a Managderal, sanlibo, duan lasus tan siamaplon agew so onlabas.

12Maliket iray totoon mansiansian matoor ya anggad kalabas na sanlibo, talon lasus tan talomplo tan lima ya agew!

13“Sika, Daniel, mansiansia kan matoor ya anggad kasamputan. Insan ka ompatey, balet onalagey kan mangawat na tumang mo diad kasamputan na panaon.”