Deuteronomio 10 - Pangasinan Meaning-Based Bible(MBBPAN83)

Inawat Lamet nen Moises iray Ganggan

1“Insan say Katawan kuantod siak, ‘Manabas ka na duaran tapyak a bato a singa saramay inmona tan manggawa ka na kiew a Kaban a panginan ed sikara. Laen mo ak dimad tagey na palandey,

2ta itatak kod saray pagagawak ed sikan tapyak a bato iray intatak kod saramay imbetag mo, insan mo ra ikarga ed Kaban.’

3“Kanyan nanggawa ak na Kaban ya akasia tan duaran tapyak a bato a singa saramay inmona tan inawit ko ra ed tagey na palandey.

4Insan say Katawan intatak tod saramay bato iray salitan intatak to la ed saramay inmonan bato, salanti saray Samploran Ganggan ya inter tod sikayo nen akisalitad sikayo manlapud apoy diad samay agew a nantitipon kayod palandey. Inter ed siak na Katawan ira may tapyak a bato,

5insan inmakseb ak nanlapud palandey. Insan onung na ingganggan na Katawan, inkargak ira ed samay Kaban a ginawak, et wadman ni ra ya anggad natan.”

(

6Saray Israelita nampikal ira a manlapud saray bobun a kayaryan na saray totood Jaakan, tan linma rad Mosera. Inatey diman si Aaron tan diman met nipompon, tan say anak ton laki a si Eleazar so sinmalat ed sikaton pari.

7Manlapud man linma rad Gudgoda, insan diad Jotbata a daakan so danum diman.

8Diad palandey say Katawan tinoro to ray lalakin kabyangay tribu nen Levi a sikaray makaoley ed Kaban na Sipanan, manlingkur irad sikato, tan sikaray mamindision ed ngaran to. Saraya ni so kimey da ya anggad natan.

9Sikato yay makasengeg a say tribu nen Levi et ag ira angawat na parti na dalin ya aliwan singa saray arum a tribu; say inawat da et samay pankanawnawa ran manlingkur ed Katawan, onung na insipan na Katawan a Dios yo.)

10“Apataploy agew tan labi a nanayam ak ed tagey na palandey, a singa samay ginawak nen inmonan inyakar ko. Dinengel ak ni na Katawan tan inmabubon ya ag to kayo pateyen.

11Insan imbaga tod siak ya ipangulo to kayo, pian nakayaryan yo so dalin ya insipan ton iter ed saray lalaki yo.

Saray Labay a Pagawa na Dios

12“Natan, sikayon totood Israel, dengel yo ray labay a pagawa ed sikayo na Katawan a Dios yo: Takotan yo so Katawan tan onur yo ray amin a labay ton pagawad sikayo. Aro yo, panlingkuran yo ed intiron puso yo,

13tan tombuk yo ray amin a ganggan to. Iiter ko natan ira yan ganggan ed sikayo ya onkanan pankaabigan yo.

14Kayaryan na Katawan so anggan saray sankatageyan a katawenan; kayaryan to met so mundo, tan amin a logan to.

15Balet balbaleg so panangaro na Katawan ed saray lalaki yo kanyan pinili to kayo, aliwan saray arum a totoo, tan sikayo ni ya anggad natan iray apilin totoo to.

16Kanyan sirin, manlapud natan toluk kayod Katawan tan ekal yoy inkaawet na olo yo.

17Say Katawan a Dios yo et makapanyari nen saray amin a diriyos tan walad silong to ray amin a pakayari. Sikato so matalonggaring tan makapanyari, tan sikato so nepeg a toluken. Anggapoy lalabien to, tan ag to mangaawat na pasoksok.

18Iyaalagey toy pankatonungan da ray olila tan saray balo; inaro to ray sangkaili a manaayam ed kawalaan da ray totoo tayo, tan iitdan to ra na tagano tan kawes.

19Kanyan sirin, aro yo ra yan sangkaili, ta sangkaili kayo met nen saman ed Egipto.

20Takotan yoy Katawan a Dios yo tan sikatoy panlingkuran yo. Mansiansia kayod sikato tan mansipan kayo ed ngaran to labat.

21Idayew yo—sikatoy Dios yo, tan anengneng na dilin mata yo iray ankakabaleg tan makapakelkelaw a ginagawa ton para sikayo.

22Nen linmad Egipto iray lalaki yo, pitpitomplo ra labat. Balet natan say Katawan a Dios yo et impagmaliw to kayon singa karakel na bitewen ed tawen.