Sirac 22 - Pangasinan Meaning-Based Bible(MBBPAN83)

Inkangiras tan Inkakulang-kulang

1-2Anggapoy pidomaan na totoon mangiras ed tai na ayep; manangipolisay ira tan anggapoy malabay ya onabay ed sikara.

3Kababaingan na ama a walay anak ton ag napetek, lautla no sakey a bii.

4Makapiasawa so makalakal a biin anak, balet say andi-baing ya anak a bii mangiter na ermen ed ama to.

5Say biin aliwan masimpit ipelag tod kababaingan so asawa to tan say ama to; anggapod sikaran duay ag ombaing ed sikato.

6No maminsan say pansalita ed saray anak nayarin aliwan manepeg a singa say pankanta ed saray maneermen, balet kakabatan a kapiganman so panlewet lapud panametek.

7Say pambangat ed sakey a toon makulang-kulang et singa pangikula ed nabtag a banga, singa pamangon ed sakey a toon malmalet so ogip to.

8Say pangipaliwawa na bengatla ed sakey a toon makulang-kulang et singa pangipapaliwawa na bengatla ed sakey a toon makakaogip; no asumpal mo lan impaliwawa, ikuanto, “Anto man so ibabagam?”

11Eermenan tayo ray totoon makulang-kulang ta kulang so liwawa ed sikara. Nepeg tin ermenan iray makulang-kulang, ta kulang so pakatalus a walad sikara. Diad tuay tua, nepeg a mapalaloy panermen tayod sikara, lapud makapasinagem ni nen say patey so bilay da. Maung labat ta mamapainawa la ray inatey.

12Pitoy agew a lalamayan tayo ray inatey, balet ermen ed intiron bilay so iiter na toon makulang-kulang odino anggapoy Dios.

13Ag mo bibisitaen iray totoon makulang-kulang odino pitongtongan iran mabayag. Paliisan mo ra; diad ontan, ag da ka natanggoyur ya onalig ed sikara, et makapambilay ka ed kareenan ya ag ka nagunigon odino naingungotan lapud kalukowan da.

14Ambelat nin sakbaten ira tan a totoo nen say mital; tan say saksakey labat a salitan onnepeg ed sikara et “makulang-kulang.”

15Anlemew nin awiten so kargan buer, asin, tan balatyang nen say toon makulang-kulang.

16Nayarin diad inkaelet na pangipeket na tablan panuksolan ed sakey a paalagey et ag naekal anggan ondalan so yegyeg, nayarin diad inkamaung na pangipasal ed sakey a too a mangikana na isip tan kalakal to et maseksekder ya akatalindeg no panaon na kairapan.

17Say panagnunot a maung tan malinew et singa malmalet a padir tan marakep iray dikorasyan to.

18Say melag a baton walad tapew na padir et ag mansiadsiad kawalaan to no onsiplug so dagem, tan say toon mabaing lapud saray andi-kabaliksan a kanunotan to et ag makatalindeg no onsabi ray makapataktakot a panaon.

Pikakaaro

19No toruken moy matam, onlua; et no nasakisakitan moy liknaan na sakey a too, naamtaan moy petepeteg a liknaan to.

20No tupaken mo na bato iray manok, nasibwak mo ra; et no pabaingan moy sakey a kaaro, deralen moy pankaaro yo.

21-22Anggaman ya ampetang so pisangsangan mod sakey a kaaro, tan ansakit so pansalitam, ag ni abalang ya amin. Nayarian mo niy mipulangan ed sikato. Balet taynanan ka na anggan siopan kaaro no pabaingan mo, no mapaatagey ka, no ipaamtam iray iyaamut to, odino pabenegan mon dogpaan.

23No mairap so bilay na kaabay mo pikaaroan mo; diad ontan makapinabang kad liket to no onaligwas so bilay to. Ag mo papaolyan no walad gunigon, no labay mon makapinabang ed sikato no onsabid sikato so panaon na inawa.

24Asewek nin onona so ompaway kasakbayay apoy; panamabaing nin onona so nagawa kasakbayay pamatey.

25Ag ak balut ontakot a mangyagel ed sakey a kaaro, tan ag kon balut taynan so kaaron nakaukolan to ak.

26No manlikna ak na kairapan lapud sikato, manalwar ed sikato so balang sakey a makapikabat ed agawa.

Sakey a Pikekerew na Tulong Sumpad Kasalanan

27Oy la komun a walay niiyan a mambantay ed sangik, pian maung so kapepetan na saray bibil ko. Napaer ak ed satan a nalingo tan nipaliis ak ed pakaderal koy siak a dili diad panamegley na dilak!