Sirac 34 - Pangasinan Meaning-Based Bible(MBBPAN83)

Anggapoy Kabaliksan na saray Kogip

1Napapalikdo iray totoon makulang-kulang diad panamegley na saray andi-kanan ilalo, tan pabibilayen na saray kogip so olat da.

2Say toon panaabalaan toy kogip et singa toon manisingkat na anino odino mangoosil na dagem.

3Say nanenengneng mo ed kogip et singa labat aninoy lupam ed salming.

4Ag napapaway ed tila so katwaan a singa ag pakapapaaway ed marotak so malinis.

5Anggapoy kabaliksan iray kogip, panagparles, tan tanda. Nanenengneng mod saraya labat iray labay mon nanengneng.

6Likud ya inter na Sankatageyan so kogip, ag yo panaabalan.

7Amayamay la ray totoo ya imbalang na saray kogip; nanmatalek irad saraya, et adismaya ra labat.

8Ayadyari so Ganggan, anggan anggapo yan tila. Ayadyari met so Kakabatan a sasalitaen na saray matonung, anggan anggapo yan tila.

Panagbiahi

9Say toon mabiahi a dakel iray salsali tod bilay et amayamay iray bengatlan amta to tan makabaliksan iray sasalitaen to.

10Daiset so amtam no aliwan dakel iray salsalim ed bilay, balet say panagbiahi napagmaliw to kan lalon masilib.

11Diad saray dilin panagbiahik dakel iray bengatlan anengneng ko tan akaaral ak na amayamay ni nen say nayarian kon ibalikas.

12Amimpigapigan dinalan ak na kaatapan na patey, balet aliktaran ko ran amin diad panamegley na panagmatalek ed apalabas iran salsalid bilay.

Takotan so Katawan

13Mambilay iray totoon tatakotan day Katawan, lapud nanmatalek irad makapangilaban ed sikara.

14Takotan moy Katawan, et anggapo lay nepeg mon takotan. No manmamatalek kad sikato, aliwa kan patakyut anggan kapigan.

15Mapalar iray totoon tatakotan day Katawan, lapud amta ray napananapan day tulong.

16Babantayan na Katawan iray mangaarod sikato; sikatoy mabiskeg a manangyagel da tan malet a mananulong da. Tatarungan to rad petang, sasaniban to rad petang na kaagwan, tan ag to aabuloyan a natiror tan natumba ra.

17Pagagayagaen to ra tan pakikirlapen toy kamataan da. Bibindisionan to ra na bilay tan abig-laman.

Panangisaklang na saray Bagat

18No mangisaklang ka na bagat ya ayep a nalad saol, wala so deral to tan ag naawat.

19Ag pakaliliketan na Sankatageyan iray bagat ya insaklang na saray totoon maoges; ag nasakuban na anggan anton karakel na bagat iray kasalanan da.

20Say toon manakew na ayep ed toon mairap so bilay to, insan to isaklang a bagat et singa toon mamatey na ogaw a laki ed arap na ama to.

21Bilay a dili so kabaliksan na kakanen ed saray mairap-bilay, tan say pangalad sikaray kakanen et pamatey na too.

22Pamatey na too so pangalay pambilay to odino panaol ed suildo na sakey a kumikimey.

23No mamaalagey so sakey a too tan mangigeba so sananey, walay agawaan no ag labat say mairap a kimey?

24No mamindision so sakey a too tan mangisamba so sananey, siopad sikaray dengelen na Katawan?

25No diwiten moy bangkay, insan moy linisay sikan dili diad panoras mo, balet ompawil kan ondiwit lamet ed samay bangkay, antoy kaabigan a nagawaan na panoras mo?

26No manayunu ka lapud saray kasalanan mo, insan ompaway ka tan gawaen mo lamet ira may kasalanan a ginawam, antoy nagunggonam ed panayunom? Siopay abaloan mon ondengel na saray pikakasim?