Sirac 44 - Pangasinan Meaning-Based Bible(MBBPAN83)

Say Kagalangan na Dios ed Awaran

1Kanyan natan, mangiter tayoy dayew ed saray totoon masanto,

saray lalaki tayod linmabas iran kailalakan,

2saray totoon inikdan day Katawan na baleg a kagalangan,

a diad sikaray akanengnengan na inkatalonggaring na Katawan

manlapud gapo na panaon.

3Wala ray manoley na saray nanarian,

tan wala ray bibirbiren lapud biskeg da.

Wala ray makabat a sumisimbawa,

tan wala ray nansalita na saray propisiya.

4Wala ray manoley a saray paakseb da so angiwanwan ed saray totoo,

saray manoley ya angipaakseb na saray ganggan,

saray totoon maotek ya angibalikas na saray salitan napnoy kakabatan,

tan saray angikanay aralem a probirbio,

5saray gumagaway anlong, tan saray gumagaway musika,

6saray mayaman tan makapanyarin totoon nambibilay a mareen ed kaabungan da.

7Bantug ya amin ira yan totoo ed dilin panaon da,

tan pinagalangan ira na saray totoo ed agew da.

8Wala ray totoon angitilak na maung a ngaran,

et idadayew ni ran anggad natan na saray totoo.

9Wala ray arum a totoon ag la ra nanununotan,

a singa ag iran balut nambilay;

inaatey ira tan alingwanan ira,

sikara tan saray anak dan sinmalat ed sikara.

10Balet idayew tayo ra yan masanton totoo,

ya ag balut alingwanan iray matonung a ginagawa ra.

11Niiter ed saray anak da so kagalangan da,

tan sikato yay tawir da.

12Itutuloy na saray kabyangay boleg da a sumpalen so sipanan

tan ag da tondaan, lapud sikato yay ginawa na saray lalaki ra.

13Mansiansia ya anggad angga so kiwawala na pamilya ra,

tan ag balut onkupas so inkabantug da.

14Mampapainawa la iray bangkay da,

balet mansiansian mabilay so kagalangan da.

15Salitaen na saray bansa so nipaakar ed kakabatan na sarayan totoo,

tan idayew ira na saray totoo na Dios.

Si Enoc

16Pinaliket nen Enoc so Katawan tan niakar ed tawen. Nagmaliw a pangaligan ed pagbabawi para amin a panaon ya onsabi.

Si Noe

17Ayadyariy inkatonung nen Noe. Kayari na insabiy deral, sikatoy angigapo na balon kailalakan na katoowan. Lapud sikato, wala ray totoon atilak ed mundo kayari na delap.

18Andi-anggaan ya akisipanan ed sikato so Katawan, tan insipan na Katawan a say bilay et ag lan balut deralen na delap.

Si Abraham

19Matalonggaring ya ama na amayamay a bansa si Abraham; anggapoy pakabalawan ed inkatoo to.

20Inonur toy Ganggan na Sankatageyan tan akisipanan ed sikato, sakey a sipanan a nitanda ed laman to. Nen sikatoy asubok, nalmoan a matoor.

21Kanyan sinambaan ed sikato na Katawan a magmaliw a bindision ed mundo iray kabyangay boleg to; a magmaliw ya ag nabilang so karakel da, a singa dabuk ed dalin; a sikaray napagalangan a mapalalo nen saray arum a totoo ed tapew na dalin; tan onlaknab so dalin da manlapud sakey a dayat ya anggad sananey a dayat, manlapud Eufrates ya anggad saray samput na dalin.

Si Isaac tan si Jacob

22-23Pinasimbalo na Katawan ed kinen Isaac iman a sipanan, insan dia lamet ed kinen Jacob; inolit toy sipanan a magmaliw a bindision ed amin a katoowan iray kabyangay boleg nen Abraham. Impasiguro na Katawan a bindisionan toy Jacob; initdan toy dalin a nakayaryan to, a pankalabinduaen ton parti, sakey so para kapag tribu.