1Legan to met ira man ya agew, nansakit si Ari Ezekias tan ngalngali inatey. Linmad sikato si propita Isaias a lakin anak nen Amoz tan kuantod sikato, “Ibabaga na Katawan ya oksuy mo lan amiy bengatla, ta ag ka la onabig. Mamparaan kan ompatey.”
2Inyarap nen Ezekias so lupa tod padir, insan nampikasi:
3“Nunot mo pa, Katawan, a matoor tan masimoon so impanlingkur kod sika, tan sinumpal ko lawas iray nilabay mon pagawad siak.” Kayari ton nampikasi nanakis na ampaipait.
4Insan ingganggan na Katawan si Isaias
5ya ompawil ed kinen Ezekias ta ikuantod sikato, “Siak, say Katawan a Dios na lakim a David, et nadngel koy pikakasim tan anengneng koy interter na luam; pambilayen ta ka ni na labinlimay taon.
6Iyagel ta ka tan sayan siudad na Jerusalem ed impirador na Asiria tan ituloy kon iyagel so siudad.”
21 Insan imbaga nen Isaias ed ari a tapalan toy pinitpit a bungay igos so pelsa to, pian onabig.
22Tinepet nen Ari Ezekias, “Antoy pakapatnagan a mamaneknek a makaonla ak ed Timplo?”
7Inmebat si Isaias, “Say Katawan itdan to ka na sakey a tanda a mamaneknek a sumpalen toy sipan to.
8Diad saramay balitang na takayan a ginawa nen Ari Acaz, say Katawan paseneren to na samploran balitang so anino.” Sinmener a tua na samploran balitang so anino.
9Kayariy inyabig nen Ezekias ed sakit to, insulat to yan kantan panangidayew:
10Ninunot ko a diad kakkaksilay bilay ko,
Onla ak lad pasen a panaayaman da ray inaatey,
Et naandian ak lay pankanawnawan mambilay.
11Ninunot ko a diad tapew na dalin a kawalaan da ray mabilay,
Ag ko lan balut nanengneng lamet so Katawan
Odino siopaman a mabilay a too.
12Apoltut so bilay ko tan nansamput la.
Singa sakey a tuldan inkusbo,
Singa abel ya apaksut ed panaginarameyan.
Abaloan kon pansasamputen la na Dios so bilay ko.
13Sanlabi ak a manayay ed sakit,
Singa tetemeken na lion iray pokel ko.
Abaloan kon pansasamputen la na Dios so bilay ko.
14Melmelag tan makapkapoy lay bosis ko,
Tan managlem ak a singa malapati.
Diad kanenengneng kod tawen naksawan lay matak.
Katawan, agwat mo ak pad sayan gunigon.
15Balet antoy nibagak? Say Katawan so angiter ed sayan sakit.
Ansakit so pagew ko kanyan ag ak makaogip.
16Katawan, mambilay ak para sika, tan para sika labat;
Paabig mo ak pa tan pambilay mo ak ni.
17Say kapaitan na bilay ko et nasalatan na inawa.
Iyaagel moy bilay ko ed amin a kaatapan;
Pipirdonaen moy amin a kasalanan ko.
18Diad pasen a panaayaman da ray inaatey,
Anggapoy siopaman a makapangigalang ed sika;
Ag makapanmatalek ed inkatoor mo iray inaatey.
19Saray mabilay so mangidadayew ed sika,
A singa pangidadayew kod sika natan.
Ibaga na saray kaamaan ed saray anak da so ontan lan inkatoor mo.
20 Katawan, pinaabig mo ak.
Manogtog kami na saray arpa tan mankanta kamiy dayew mo.
Diad Timplom mankanta kamiy pangidayew legan na pambilay mi.
Who We AreWhat We EelieveWhat We Do
2025 by iamachristian.org,Inc All rights reserved.
