Say Kakabatan nen Solomon 3 - Pangasinan Meaning-Based Bible(MBBPAN83)

Say Pansumpalan da ray Totoon Matonung

1Balet iyaagel na Dios iray totoon matonung tan ag iran balut manliknay kairapan.

2Inaambagel a lingo so pannunot ya ompapatey iray totoon matonung tan makapasinagem a kaogsan so ipapatey da.

3Tataynan da itayo, balet aliwa yan sakey a desyang. Diad tuay tua, walad kareenan iray totoon matonung.

4Nayarin singa ra adusa, balet walay malet ya ilalo ra a mansiansia ran mambilay.

5-6Anggapoy wala iray kairapan da no ipara rad saray bindision ya awaten da. Sinubok ira na Dios, a singa say balituk ed palbaan, tan nalmoan to ran manepag a mikasakey ed sikato. Inawat to ra, a singa pangaawat tod saray bagat a popoolan ed altar na saray manangigalang ed sikato.

7No onsabi so Dios a mangiter na tumang ed saray totoon matonung, onliab iran sumpad saray totoon maoges a singa ra apoy ed dayami.

8Manoley irad saray bansa tan saray totoo, tan anggad anggan ari ra so Katawan.

9Saray manmamatalek ed Dios naamtaan da so katwaan na kagagawa to. Saray matoor mambilay irad sikato ed aro, ta mapangasi tan maabagey ed saray totoon pinili to.Say Pansumpalan da ray Totoon Maoges

10Balet nadusa iray totoon maoges onung na kanepegan na saray maoges a kanunotan da, lapud linmaban irad Katawan tan ag da inkabilangan so inkatonung.

11Makapasinagem a bilay so akaparaan ed toon ag to ikakanay kakabatan odino aral. Anggapoy bengatlan nailaloan to. Andi-kakanaan iray kimey to, tan anggapoy nagawaan ton makabaliksan.

12Magmaliw ya ag napampiaan so biin asawaen to, tan aliwliway pansumpalan na saray anak to.

13Nisamba ya amin iray kabyangay boleg to.

Say Kaabigay Masimpit a Panagbilay

No Agew na Okum, tumangan na Dios so biin ag balut nananak, dapot no ag akikaloguran. Diad ontan, sikatoy manliket.

14Diad satan ya agew, natumangan na liket so anggan say lakin akapun, no inonur toy Ganggan tan ag to amokuk na sakit na linawa sumpad Katawan. Lapud sikatoy matoor, awaten toy tumang a mabli ni nen say nawalaan na saray anak: sakey a pasen ed mangatatawen a Timplo na Katawan.

15Saray maung a gawa et singa ra kiew a mambubunga na makapakelaw iran prutas. Singa mabilay a lamut so Kakabatan, ta makapatubo lawas na balo ran simit.

16Balet ompatey a masakbay iray anak na saray mikakaloguran odino saray ag da kanepegay manakdul.

17Anggaman bilang mambilay ira na andokey, anggapoy maung lamlamang a kasumpalan da. Ag ira napagalangan ed inkatakken da,

18tan no ompatey iran malangwer, anggapoy ilalo ra odino ligliwa ra no Agew na Okum.

19Manlilikna na makapasinagem a kapalaran iray anak na saray ag da kanepegay manakdul.