Ecclesiastes 5 - Pangasinan Meaning-Based Bible(MBBPAN83)

Ag ka Bengatbengat Mansisipan

1Apiger moy kakaonlam ed Timplo. Say iyakar mon manaral ed Timplo et magmaung ni nen say pangisaklang na saray bagat a singa gagawaen na saray makulang-kulang ya ag da amtan ibiig so maung ed maoges.

2Mannunot ka ni kasakbayan a mansalita ka, tan ag ka bengatbengat a mansisipan ed Dios. Walad tawen so Dios tan wala kad tapew na dalin, kanyan ag mo la pasosolukan so kanepegan mon salitaen.

3No magunigon ka, lalon dakel so nakogip mon aliwaliwa; no masalita ka, lalon dakel so nasalitam ya andi-kana.

4Kanyan no mansipan ka ed Dios, ganatan mon sumpalen. Aliwan makapaliket ed sikato so toon makulang-kulang. Sumpal mo so insipan mon gawaen.

5Maung nin ag ka mansisipan nen say mansipan ka ya ag mo sumpalen.

6Ag mo aabuloyan ya ipelag kad kasalanan na saray salitam, pian ag ka la onlan mangibagad pari ya ag mo ginagalay nankasalanan. Akin et labay mon makapasnuk so Dios ed sika? Akin et labay mon deralen na Dios iray nansagputan mo?

7Anggaman ya amayamay iray kogip mo tan saray andi-kanan gawam tan salitam, nepeg mon pagalangan nin siansia so Dios.

Andi-kakanaan so Bilay

8Ag mo pankelawan no nanengneng mon papairapen na gobirno iray mairap-bilay tan ag to iter ed sikara so katonungan da tan say kanepegan da. Ta balang opisyal iyaagel na opisyal ya atagey nen say sikato, tan iyaagel iran dua na saray opisyal ya atagtagey nen say sikaran dua. Say ari so sankatageyan ed amin ya opisyal tan napanoleyan toy amin a dalin a sakop to.

9Anggan say ari manmamatalek ed panagani.

10No maaro kad kuarta ag kan balut napenek; no mampilalek kan onyaman ag mon balut nagamuran so amin a pilalek to. Sakey met yan andi-kakanaan.

11No onyayaman ka, ondadakel so pakanen mo. Say nagunggonam labat et say pakaamtam a mayaman ka.

12Malet so ogip na toon kumikimey, daiset may dakel so kinan to. Balet say toon mayaman dakel so kayaryan to, kanyan ag makaogip lapud kapagaan to.

13Saya niy makapasinagem a kaogsan ya anengneng kod sayan mundo; saray katoowan mantitipon ira na kayamanan ya ikana ra ed panaon a pankaukolan da.

14Balet lapud makapoy a kipaakaran nabalang day amin a kayamanan da; kanyan anggapoy anto a nipatawir da ed saray anak da.

15Anggapoy awit tayo nen pinmaway tayod eges na ina tayo tan anggapo met so naawit tayo no ontaynan tayod sayan mundo. No ontaynan tayo anggapoy anggan anto a naawit tayo ed saray nansagputan tayo.

16Sikato ya met so sakey a maoges. Ontaynan tayo a singa insabi tayo. Et antoy nagunggona tayo no mankikimey tayon singa manisingkat na dagem?

17Nagunggona tayoy mambilay a walay bilonget tan ermen, magunigon, mapasnuk, tan walay sakit.

18Saya so arumogan ko: say sankaabigan a nagawaan na too et say pangan tan say iyinom to, tan say panliket to ed nansagputan to legan na antikey a pambilay ton inter ed sikato na Dios; sikato yay kapalaran na too.

19No say sakey a too et initdan na Dios na kayamanan tan kayaryan tan inabuloyan to a panliketan to ra, nepeg a misalsalamat tan panliketan toy nansagputan to. Rigalo ya na Dios.

20Bangta inabuloyan na Dios a manliket ed bilay to, ag to la nepeg a kagunigonan a mapalalo so katikey na panayam to diad tapew na dalin.