1“Igawaan mo so dalem na Tuldan Ayamay Katawan na samploran kurtina a pinon linen. Asul, purpura, tan ambalanga so tinebey da tan bordaan mo ra na saray kirubin.
2Gawam a nampapara so kabaleg da; labinapat a yarda so dokey da tan duaran yarda so benlag da.
3Pansasaip mon daiten so limara tan ontan met so gawaen mod saray limara.
4Manggawa kad gilig na samput na kapag saramay impansasaip mo na panagkawitan ya asul ya abel.
5Peketan mo na limamplon panagkawitan so onaan a kurtina ya impansasaip tan limamplo met so samput a kurtina ed samay sakey; tan pampepetekan mo ra.
6Manggawa ka na limamplon balituk a panagkawit a sikaray mamakasakey ed saramay duaran impansasaip a kurtina.
7Labinsakey a kurtina a bagoy kanding so gawaen mo a sakbung na Tulda.
8Gawam iran nampaparay kabaleg da, labinliman yarda so dokey da tan duaran yarda so benlag da.
9Pansasaip mon daiten so limara, tan ontan met so gawaen mod saray anemira. Itopim ya idobli so kumanem a kurtina diad tagey na arap na Tulda.
10Peketan mo na limamplon panagkawitan so gilig na samput a kurtina ed sakey ya impansasaip tan limamplo met so samput a kurtina ed samay sakey.
11Manggawa ka na limamplon gansan panagkawit tan ikawit mod saray panagkawitan, pian magmaliw a saksakey a sakbung ira may impansasaip.
12Ipaloyloy mo so soluk a kapalduan kurtina diad tagey na beneg na Tulda.
13Say soluk a kapalduay yarda na dokey na samay sakbung et ipaloyloy mod kapag dapag na Tulda, pian nasakbungan to.
14“Manggawa ka ni na duaran sakbung, sakey so pinabalanga tan pinamagan katat na karniron kalakyan, tan say sakey pinon katat; saraya so sakbung ed tapew.
15“Manggawa ka na saray tablan akasia a pamaalagey na Tulda.
16Limaran mitro so dokey na kapag tabla tan duamplo tan piton pulgada so lapar to.
17Nepeg a walay duaran kagur to, pian makapantetekep ira yan tabla. Amin a tabla nepeg a wala ray kagur dan amin.
18Manggawa kay duamplon tabla a para bandad abalaten na Tulda,
19tan manggawa ka na apataplon pilak a dapan na tabla, duaran dapan ed silong na kapag sakey a tabla a peketan ira na saramay duaran kagur.
20Manggawa ka na duamplon tablan para bandad baybay na Tulda,
21tan manggawa ka na apataplon pilak a dapan na tabla, duaran dapan ed silong na kapag sakey a tabla.
22Manggawa kay anemiran tabla ed bandad sagur a beneg na Tulda.
23Manggawa ka na duaran tablan para saray sokung.
24Sarayan tabla ed sokung et asangal ira manlapud leksab ya anggad tagey. Nepeg ya onyay pakagawa na duaran tabla a sikaray duaran sokung.
25Ontan sirin, walay waloran tabla a walay labinanem a pilak a dapan da, duara ed silong na kapag tabla.
26“Manggawa ka na labinliman balewet ya akasia, limara so para saray tabla ed sakey a diking na Tulda,
27limara so para saray tabla ed sananey a diking tan limara so para saray tabla ed bandad sagur na Tulda diad beneg to.
28Nepeg a say karokey na pegley a balewet ya ilira ed pegley da ray tabla et manlapud sakey a samput ya anggad sakey a samput na Tulda.
29Okupan mo na balituk iray tabla tan peketan mo ra na saray balituk a liken a mangegnad saray balewet a naokupan met na balituk.
30Ipaalagey moy Tulda onung na samay planon impanengneng kod sika ed tagey na palandey.
31“Manggawa ka na kurtina a pinon linen. Asul, purpura, tan ambalanga so tinebey da tan bordaan mo na saray kirubin.
32Ibitin mo rad apatiran lusek ya akasia a naokupan na balituk, apeketan ira na saray panagkawit, tan nilira ra ed apatiran dapan a pilak.
33Sayan kurtina so ibitin mod saray panagkawit a nipeket ya arasig ed tarung na Tulda, tan iliram ed sanib to so Kaban na Sipanan a nankarga na duaran tapyak a bato. Say kurtina so ketegan na Masanton Pasen tan say Sankasantosan a Pasen.
34Iliram ed tapew na Kaban na Sipanan so sakub to.
35Diad paway na Sankasantosan a Pasen iliram ed pireg na baybay a dapag na Tulda so lamisaan tan iliram ed pireg na abalaten a dapag na Tulda so panangipatoonan na lamparaan.
36“Say lolooban na Tulda et igawaan mo na sakey a kurtina a pinon linen; asul, purpura, tan ambalanga so tinebey da tan bordaan mo.
37Para sayan kurtina manggawa ka na limaran lusek ya akasia ya inokupan na balituk tan wala ray nipeket a balituk a panagkawit; manggawa ka met na limaran gansan dapan a toonan na sarayan lusek.
Who We AreWhat We EelieveWhat We Do
2025 by iamachristian.org,Inc All rights reserved.