1Si Ari Hiram na Tiro angibaki na totoo to ed kinen David; initdan to na saray troson sidro, tan saray karpintiro tan saray kantiro, ta igawaan day palasio si David.
2Abirbir nen David ed satan a say Katawan et pinili ton manari ed Israel, tan papaaligwasen toy nanarian to a pankaabigan na saray totoo to.
3Diad Jerusalem, angasawa ni na pigara si David tan dinmakel iray anak ton lalaki tan bibii.
4Niay kangaranan da ray anak ton nianak ed Jerusalem: Samua, Sobab, Natan, Solomon,
5Ibhar, Elisua, Elpelet,
6Noga, Nefeg, Jafia,
7Elisama, Beeliada, tan Elifelet.
Say Impanalo ray Israelita ed saray Filisteo(2 Sam. 5:17-25)8Nen nadngelan na saray Filisteo ya agawa lan arid intiron bansa na Israel si David, linma ray sondalo ran manakep ed sikato. Kanyan si David pinmaway a mibakal ed sikara.
9Akasabid Patar na Refaim iray Filisteo tan ginapwan day nandederal.
10Tinepet nen David ed Dios, “Dogpaan ko ray Filisteo? Panaloen mo ak kasi?”
Inmebat so Katawan, “On, dogpaan mo ra! Panaloen ta ka!”
11Kanyan dinogpaan ira nen David diad Baal-perazim, et tinalo to ra. Inkuanto, “Say Dios inkana to ak ya ondogpa ed saray kalaban a sondalo. Singa ra dinalan na delap.” Kanyan saman a pasen atawag na Baal-perazim.
12Tinaynan diman na saray Filisteo iray talintaoy diriyos da, tan impapopoolan ira nen David.
13Ag abayag pinawil na saray Filisteo imay patar tan ginapwan da lamet so nandederal.
14Impanon lamet nen David ed Dios, et say Dios inmebat, “Ag ka dia manlalapu no dogpaan mo ra. Saliberber ka tan dogpa kan manlapud biek a dapag, diad abay na saray kiew a balsamo.
15No narengel mod tagey na kakiewan so tanul na panaakar da ray sondalo, dogpa ka, ta wala ak ed onaan mo a mibakal ed saray sondalo na Filistia.”
16Ginawa nen David so ingganggan na Dios tan pinasoner to ray Filisteo manlapud Gabaon ya anggad Gezer.
17Binmawag ed anggan iner a pasen so inkabantug nen David, tan say Katawan pinatakot ton amin iray bansa ed kinen David.
Who We AreWhat We EelieveWhat We Do
2025 by iamachristian.org,Inc All rights reserved.
