Sirac 12 - Pangasinan Meaning-Based Bible(MBBPAN83)

1No manggawa kay maung a bengatla, sigurom ya amtam no siopay makakagamur na kaabigan; diad ontan ag nadarak so gagawaen mo.

2Nabayaran ka lapud antokaman a panangasin ipanengneng mo ed matonung a too. No ag to ka bayaran, say Sankatageyan so mambayar.

3Anggapoy kaabigan ya onsabi ed sakey a toon maliligliwa ed saray totoon maoges; aliwan matonung itan a gawa.

4Mangiter ka ed saray relihioson totoo, balet ag mo tutulongan iray makasalanan.

5Manggawa kay maung ed saray mapaabeban totoo, balet ag kan balut mangiiter na antokaman ed saray aliwan matonung. Ag mo ra iitdan na kakanen, ta ikana ran sumpad sika so panangasim. Mamidway karakel na gunigon ya iter ed sika na balang maung a bengatlan gagawaen mod saratan a totoo.

6Kabosul a dili na Sankatageyan iray makasalanan, tan dusaen to ra.

7Mangiter kad saray maung a totoo, balet ag mo tutulongan iray makasalanan.

8No panaon na inawa, mairap ya ibaga no siopa ray petepeteg a kakaaro, balet no panaon na kairapan nabirbir mo no siopa ray kalaban;

9taynan ka na anggan saray kakaarom. Balet no maaligwas ka, saray kalaban mo pagmaliwen day sikaran dili a singa kakaarom.

10Ag mon balut panmamatalkan so kalaban mo; manderal a singa lati so kaogsan to.

11Alwaran mo, tan asikasom so sikan dili, anggan ipanengneng ton mapaabeba lawas. Sikatoy singa metal ya ispiho ya onlati no ag mo ponasan a naynay.

12Payorung mod nikawanan mo so kabosul mo, et ag mabayag naamtaan mo ya aalaen to lay pasen na kagalangan mo. Iliram ed abay mo, et gawaen toy polaing a taloen to ka. Diad ontan na birbir moy katwaan na saray salitak, et mapalaloy pagbabawim no nanunotan mo ra.

13Anggapoy toon panermenan to ray aketket a totoon managpaamo na oleg odino saray ayayep ed katakelan;

14anggapo met so toon panermenan to ka no mioolup kad saray makasalanan tan mibabali kad panggagawa ray makapoy.

15Miolup a magano ed sika so kalaban, balet arawi la no onsabi lad sikay gunigon.

16Marakep iray salitaen tod sika no papatitan to ka. Mankonkonwarin midadamay ed saray ermen mo, balet pateyen to ka no nawalaan na pankanawnawa.

17No onsabid sikay gunigon, naalmoan mon manaalagar a mamater ed sika legan a mankonkonwarin tutulongan to ka.

18Sikatoy nidoman too, lirliren to ray lima to, itangertanger toy olo to, tan iwakwakawak to ray aliwan tuan balitan nipaakar ed sika.