1 Saray Arari 11 - Pangasinan Meaning-Based Bible(MBBPAN83)

Inmarawid Dios si Solomon

1Amayamay si bibiid arum a bansa so naibegan nen Solomon. Likud ed samay inasawa ton anak na ari ed Egipto, angasawa ni na saray bibiin Moabita, Ammonita, Edomita, Sidonia, tan Hetea.

2Inasawa to ra, anggaman ya ingganggan na Katawan ed saray Israelita ya ag ira mangasawa o miasawa ed sarayan totoo, ta tanggoyuren dan mangigalang ed arum a diriyos iray Israelita.

3Angasawa na piton lasus a prinsisa tan angyamung ni na talon lasus ya arum iran bibii. Tinanggoyur dan onarawi ed Dios,

4et masiken la nen naayat dan mangigalang ed saray diriyos na arum a bansa. Ag to naaligay ama ton David a matoor ed Katawan a Dios to.

5Inggalang nen Solomon si Astarte a diosa na Sidon, tan si Milcom a makapaingungot a dios na Ammon.

6Nankasalanan ed Katawan, kanyan ag to naaligay ama ton David a matoor ed Katawan.

7Diad tapew na palandey ed nibokig na Jerusalem, nanggaway pasen a pangigalangan ed kinen Cemos a makapaingungot a dios na Moab. Nanggawa met na pasen a pangigalangan ed kinen Milcom a makapaingungot a dios na Ammon.

8Nanggawa met ni na arum iran pasen a panangigalangan, a dimay pakapampoolan na insinso na saray asawa ton sangkaili tan dimay pakapangisaklangan da na saray bagat dad saray diriyos dan dili.

9-10Anggaman ya amidwan pinmayawar ed kinen Solomon so Katawan a Dios na Israel tan ingganggan tod sikaton ag mangigalang ed saray diriyos na arum a bansa, ag tinmoluk si Solomon ed sikato; inarawian to ni ingen. Kanyan akapasnuk so Katawan ed kinen Solomon,

11tan kuantod sikato, “Lapud ginagalam a dineral so impisipanan mod siak tan ag mo inonur iray ganggan kod sika, ekalen kon ekalen so nanarian ed sika tan iter kod sakey ed saray opisyal mo.

12Anggaman ontan, lapud kinen amam a David ag ko ya gawaen legan mon mambibilay, no ag ingen legan na panooley na anak mon laki.

13Ag ko ekalen ed sikatoy intiron nanarian; ingen mangikera ak na sakey a tribu, lapud kinen aripen kon David tan lapud Jerusalem a pinilik a siudad ko.”

Saray Kalaban nen Solomon

14Kanyan tinanggoyur na Katawan si Hadad a kabyangay pamilya na ari ed Edom ya onlaban ed kinen Solomon.

15-16Nen saman a panaon kasakbayan to ya, nen tinalo nen David so Edom, linmad may Joab a pangulo na saray sondalo to, ta ipompon to ray inaatey. Nanayam na anem bulan ed Edom si Joab tan saray totoo to. Legan to yan panaon pinapatey da ray lalakin taga Edom

17likud ed kinen Hadad tan saray pigaran aripen nen ama to a taga ra Edom, ta akabatik irad Egipto. (Ogaw nid saman si Hadad.)

18Manlapud Madian, linma rad Paran a walad sayan lugar so pigaran lalakin akikasakey ed sikara; insan ira tinmuloy ed Egipto. Linma rad ari, tan initdan to ray sakey ya abung, tagano, tan dalin.

19Nala nen Hadad so maung a linawa na ari na Egipto, et impaasawa na ari ed kinen Hadad so ayro ton agi nen Riyna Tapenes.

20Akaanak ed sikato na sakey a laki a si Genubat, a pinabaleg na riyna ed palasio a dimay nanayaman ton kaiba to ray lalakin anak na ari.

21Nen nadngelan nen Hadad ed Egipto so balitan inatey lay David tan si Joab a pangulo na saray sondalo, inkuantod kinen ari, “Abuloyan mo pan ompawil ak ed dilin bansak.”

22Balet tinepet na ari, “Akin? Walay kinulangan kod sika, kanyan labay mo lay onsempet?”

“Abuloyan mo ak labat ya onla,” ebat nen Hadad ed ari. Kanyan pinmawil ed dilin bansa to si Hadad.

Maoges tan mapalalon kalaban na Israel si Hadad ya ari na Edom.

23Tinanggoyur met na Dios ya onlaban ed kinen Ari Solomon si Rezon a lakin anak nen Eliada. Imbatikan nen Rezon si amo ton Ari Hadadezer na Zoba,

24tan nagmaliw a pangulo na grupoy tutulisan. (Agawa ya nen tinalo nen David si Hadadezer tan pinapatey to ray Sirianon kakaiba to.) Linman nanayam ed Damasco si Rezon tan saray totoo to, tan ginawad man na totoo to ya arid Siria.

25Kalaban na Israel si Rezon legan a mabilay si Solomon.

Say Sipan na Dios ed kinen Jeroboam

26Say sakey nin linmaban ed kinen Ari Solomon et say sakey ed saray opisyal to, si Jeroboam a lakin anak nen Nebat tan taga Sereda na Efraim. Balon manngaran na Zerua so ina to.

27Onyay makasengeg na insumpa tod kinen Solomon.

Mampapatabun na dalin nen saman si Solomon diad bokig na Jerusalem tan itutuloy ton pagaway padir na siudad.

28Wala nid kalangweran si Jeroboam tan walay ibabaga ton too. Nen naimano nen Solomon so inkakoli to, ginawa ton makaoley ed amin da ray pinasoot a mankimey diad lugar da ray tribu di Manases tan Efraim.

29Aminsan ya agew, nen manaakar a nanlapud Jerusalem si Jeroboam, inabet nen propita Ahias a taga Silo; bukbukor dan dua ed dalan diad maawang a bario. Akasolung na balon kawes si Ahias;

30nilakseb to, impankalabindua to,

31insan to inkuan ed kinen Jeroboam, “Ala kay samploran pinglis para sika, ta say Katawan a Dios na Israel kuantod sika, ‘Ikalen toy nanarian ed kinen Solomon, tan iter kod sikay samploran tribu.

32Natilak ed kinen Solomon so sakey a tribu lapud aripen kon David tan lapud Jerusalem, say siudad a pinilik ed intiron dalin na Israel.

33Gawaen ko ya, ta impolisay ak nen Solomon tan angigalang ed Astarte a diosa na Sidon, Cemos a dios na Moab, tan Milcom a dios na Ammon. Ag ak inonur nen Solomon; ag to inalig si ama ton David a nanggaway katonungan tan angonur ed saray ganggan tan saray bilin kod sikato.

34Balet ag ko ekalen so intiron nanarian ed kinen Solomon, tan pansiansiaen kon manoley legan ton mambibilay, lapud kinen pinilik a David ya aripen kon angonur na saray ganggan tan saray bilin ko.

35Ekalen koy nanarian ed anak ton laki, insan ko iter ed sikay samploran tribu.

36Iter koy sakey a tribu ed lakin anak nen Solomon, pian nawalaan ak lawas na kabyangay boleg nen aripen kon David a manoley ed Jerusalem, say pinilik a siudad a pangigalangan ed siak.

37Gawaen ta ka, Jeroboam, ya ari na Israel, tan manoley ka ed amin a lugar a labay mo.

38Wala ak lawas ed sika no sigput ya onuren mo ak tan gawaen moy linawak diad panumpal mod saray ganggan tan saray bilin ko a singa ginawa nen David ya aripen ko. Gawaen ta kan ari na Israel tan pansiansiaen ko a saray kabyangay boleg mo so onsalat ed sikan manoley, a singa samay ginawak ed kinen David.

39Lapud kasalanan nen Solomon dusaen ko ray kabyangay boleg nen David, balet aliwan ando lan ando so panusak.’”

40Lapud saya, labay a pateyen nen Solomon si Jeroboam, balet batik ed Ari Sisak na Egipto tan nanayam diman ya anggad impatey nen Solomon.

Say Impatey nen Solomon(2 Awa. 9:29-31)

41Nisulat ed libron Say Awaran nen Solomon iray arum nin gawgawa tan say nipaakar ed kakabatan nen Solomon.

42Nanayam ya ari ed Jerusalem legan ton nanoley ed intiron Israel na apataploy taon.

43Inatey tan nipompon ed Siudad nen David, insan sinmalat ed sikaton nanari si Roboam a lakin anak to.