Ezekiel 38 - Pangasinan Meaning-Based Bible(MBBPAN83)

Say Pangikana na Dios ed Gog

1Say Katawan akisalitad siak.

2Inkuanto, “Sika a toon ompatey, mansalita ka na sumpad Gog a manonan manoley na saray bansa na Mesec tan Tubal diad dalin na Magog. Mansalita ka na sumpad sikato

3tan ibagam ed sikato a siak a Katawan a Dios et kalaban to.

4Papoliktaren ko, insan ko tagaan so songut to, tan igayugoy kon iyarawi a pati amin a sondalo to. Sarayan sondalo ton amayamay a kaiba ray kabayo ra et akasamper tan akaispada so balang sakey ed sikara tan wala ray akakabayo a nampaparay kawes dan para bakal.

5Kaiba to ray lalakin taga Persia, Sudan, tan Libia ya akasamper tan akahilmit ira.

6Kaolup to met ya amin iray mibabakal a lalakin taga saray dalin na Gomer tan Bettogarma diad baybay; ontan met a kaiba to ray lalakin taga amayamay a bansa.

7Ibagam ed sikato a mamparaan tan pamparaanen to ray sondalo ton ipangulo to.

8Kalabas na amayamay a taon iganggan kon looban toy sakey a bansan saray totoo to et pinmawil iran nanlapud saray amayamay a bansa tan manaayam iran arawid kaatapay bakal. Looban to ray kapalandeyan na Israel ya abayag iran apaolyan tan ataynan, balet panaayaman la ra na amin da ray totoon arawid kaatapan.

9Sikato tan saray amayamay a sondalo to a pati saray amayamay a bansa et dogpaan dan singa ra kaloreman ya onlaknab ed saman a dalin.”

10Sikato yay kuan na Katawan a Dios ed kinen Gog: “No onsabiy tan a panaon igapom so mannunot na sakey a maoges a plano.

11Getmaen moy onloob ed sakey a bansan ag to niagel so sikaton dili, a mambibilay iray totoo ed kareenan tan arawi rad kaatapan diad saray baley ya anggapoy padir tan makapangyagel.

12Samsaman yo ray totoon manaayam ed saray siudad a nen saman aderal-deral. Nen saman atiptipon irad nanlapud saray bansa, tan natan manaayam irad pegley na mundo a wala ray ayayep tan arum a kayaryan da.

13Saray totoon taga Seba tan Dedan tan saray nigosiantin taga baley na Espanya et tepeten dad sika, “Tinipon mo ray sondalom ta ondogpa kayo tan mansamsam kayo, anto? Gagalam so manala na saray pilak tan balituk, saray baka tan saray kayaryan, insan mo ibatik ira yan asamsam mo anto?”

14Kanyan say Katawan a Dios imbaki to ak a mangibagad Gog na sayan labay ton ibagad sikato: “Natan legan a saray totook ya Israel et mambibilay iran arawid kaatapan, mamparaan kan

15ondago manlapud arawin pasen mo diad baybay, ta ipangulom iray amayamay a makapanyarin sondalon taga amayamay a bansa ya akakabayo ran amin.

16Dogpaan mo ray totook ya Israel a singa ka bagyon ondadalan ed dalin. No onsabiy tan a panaon, ibaki ta kan onloob ed dalin ko, pian nipanengneng kod saray bansa no siopa ak, pian nipanengneng koy kasantosan ko diad panamegley mo.

17Sika so sinalitak la nen abayag lan panaon, nen imbawag ko diad panamegley na saray aripen kon propita ed Israel, ya onsabi ray agew a mangibaki ak na toon ondogpad Israel.” Say Katawan a Dios so nansalita.

Dusaen na Dios so Gog

18Say Katawan a Dios kuanto, “Diad agew a looban nen Gog so Israel, mampasnuk ak na mapalalo.

19Ibabawag ko a diad gaway pasnuk ko, nagawad satan ya agew so mabiskeg a yegyeg ed dalin na Israel.

20Balang sira tan manok, balang ayep, baleg may melag, tan balang too onggiwgiw ed takot tod siak. Nakusbo iray kapalandeyan, nabosbos iray pandel, kelas, tan nageban amin iray padir.

21Taktakoten koy Gog diad panamegley na saray nandoroman desyang. Siak a Katawan a Dios so nansalita. Mandodoyukan na ispada iray totoo to.

22Dusaen ko diad panamegley na salot tan pateyan. Say makmaksil ya oran a nantarok na yilo, apoy, tan asupri, et ipelag kod sikato, saray sondalo to, tan saray amayamay a bansan akigampid sikato.

23Diad onya ipanengneng kod amin a bansa a siak so matalonggaring tan masanto. Diad satan naamtaan da a siak so Katawan.”