Deuteronomio 6 - Pangasinan Meaning-Based Bible(MBBPAN83)

Say Manonan a Ganggan

1“Saraya so ganggan ya imbilin ed siak na Katawan a Dios yo ya ibangat kod sikayo. Onur yo ra ed dalin a ngalngali yo la looban tan panayaman.

2Legan na pambilay yo, sikayo tan saray kabyangay boleg yo et nepeg a takotan yo so Katawan a Dios yo tan onur yo ray amin a ganggan to, pian andokey so pambilay yo ed saman a dalin.

3Dengel yo ra, sikayo ran totood Israel, tan sumpal yo ra! Diad satan maung lawas so kipapasen yo, tan magmaliw kayon baleg bansa tan manayam kayod saman a mayaman tan mataban dalin onung na insipan na Katawan a Dios na saray lalaki tayo.

4“Sikayo ran Israelita, tandaan yo ya! Bukor na Katawan a Dios tayo so Katawan.

5Aro yo so Katawan a Dios yo ed intiron puso yo, intiron kamarerwa yo, tan intiron biskeg yo.

6Ag yo lilingwanan ira yan ganggan ya iiter kod sikayo natad sayan agew.

7Ibangat yo rad saray anak yo. Salita yo ra no wala kayod kaabungan yo tan no wala kayod arawin pasen, no mampapainawa kayo tan no mankikimey kayo.

8Ibariber yo rad saray taklay yo tan iberber yo rad muling yo pian nanunotan yo ra.

9Isulat yo rad saray lusek na kaput na kaabungan yo tan diad saray puirta yo.

Say Pasakbay a Sumpad saray Mananumlang

10“Onung na insipan na Katawan a Dios yo ed saray lalaki yon di Abraham, Isaac, tan Jacob, itdan to kayo na dalin a walaan na saray ankakabaleg tan maaligwas a siudad ya ag yo ra impaalagey.

11Saray kaabungan et napano ra na maabig iran bengatla ya ag yo ra inkarga, tan wala ray bobun ya ag yo ra kinotkot, tan wala ray kaubasan tan kaolibaan ya ag yo ra intanem. No say Katawan et niyakar to ka yod sayan dalin tan walay amin a labay yon kanen,

12ag yon balut lilingwanan so Katawan ya angipaway ed sikayod Egipto ya akaaripenan yo.

13Takotan yoy Katawan a Dios yo, sikato labat so igalang yo, tan mansipan kayo ed ngaran to labat.

14Ag kayo mangigagalang ed arum a diriyos, anggan dinan a diriyos na saray totood kaliber-liber yo.

15No mangigalang kayod arum a diriyos, ondalang a singa apoy so pasnuk na Katawan ed sikayo tan sigput to kayon pateyen, ta say Katawan a Dios yo a kaolup yo et maimon.

16“Ag yo susuboken so Katawan a Dios yo a singa ginawa yod sikato diad Masa.

17Pampelengan yon onuren iray amin a ganggan ya inter tod sikayo.

18Gawa yoy amin a maung tan matonung ed arap na Katawan, et maung lawas so kipapasen yo. Nayarian yon kayaryanen so mataban dalin ya insipan na Katawan ed saray lalaki yo,

19tan pataynan yo ray kalaban yo, onung na insipan to.

20“Diad arapen a panaon saray anak yo tepeten dad sikayo, ‘Akin et say Katawan a Dios tayo et ingganggan ton onuren tayo ra yan amin a ganggan?’

21Ibaga yod satan ed sikara, ‘Aripen kami nen saman na ari na Egipto, et say Katawan impaway to kamid Egipto lapud baleg a pakapanyari to.

22Anengneng na dilin mata mi so impanggagawa to na saray milagro tan saray makapataktakot a bengatla ed saray Egipsio, say ari ra, tan diad amin ya opisyal to.

23Imbolus to kami manlapud Egipto tan inyakar to kami dia tan inter tod sikami yan dalin, onung na insipan tod saray lalaki tayo.

24Insan say Katawan a Dios tayo ingganggan to ya onuren mi ra yan ganggan tan sikatoy takotan mi. No sumpalen mi ra ya, asikasoen to lawas so bansa tayo tan paaliguasen to.

25Makaliket ed sikatayo so Dios, no matoor tayon onuren iray amin ya ingganggan tod sikatayo.’