Ester (Grigo) 6 - Pangasinan Meaning-Based Bible(MBBPAN83)

Pinagalangan na Ari si Mardokeo

1Diad saman a labi ag makaogip so ari, kanyan impaala tod sikritario to so libro na saray awaran tan impabasa to.

2Binasa toy nipaakar ed impangipaamta nen Mardokeo ed komplut a pamatey ed ari, say komplut ya implano na saray duaran yunuko a guardiad palasio.

3Tinepet na ari, “Panoy impangiter tayod kinen Mardokeo na galang tan tumang, lapud saman a ginawa to?”

Inmebat iray aripen to, “Anggapoy inter mod sikato.”

4Legan a tetepeten na ari so nipaakar ed maung a ginawa nen Mardokeo, linmoob ed solar si Haman. Linmad man, ta kerewen tod ari ya ibitay si Mardokeo, ed panagbitayan ya imparaan to.

Tinepet na ari, “Siopa may walad solar?”

5Inmebat ira may aripen, “Si Haman; manaalagar, ta mitongtong ed sika.”

“Paloob yo,” kuanen ari.

6Linmoob sirin si Haman, et inkuan na ari ed sikato, “Walay toon labay kon pagalangan. Antoy nepeg a gawaen kon para sayan too?”

Ninunot nen Haman ed sikaton dili, “Siopa niy toon labay na ari a pagalangan no ag say siak?”

7-8Kanyan inmebat ed ari, “Paiyakaran mod saray aripen na palasio na kawes a pinon linen—say kawes ya isosolung mo. Paalam ed sikara so sakey a kabayon lologanan mo.

9Insan mo paisolung so kawes ed satay toon labalabay mo. Kayari to, iganggan mod sakey ya atagey ya opisyal mo ya ipakabayo to tan tengtengan to may kabayo ya iliber ed plasa na siudad. Paimbandom ed samay atagey ya opisyal mo legan dan onliliber, ‘Nengneng yoy tumang na toon labay a pagalangan na ari!’”

10Insan inkuanen ari ed kinen Haman, “Maung! Gawam itan ya amin ed kinen Mardokeo a Judio, ya atagey so betang tod palasio; ag mo kukulangay gawaen mod sikato.”

11Inala sirin nen Haman imay kawes tan samay kabayo. Insolung tod kinen Mardokeo imay kawes. Kinmabayo si Mardokeo, tan tinengteng nen Haman imay kabayo. Inliber to ed plasa na siudad, tan imbabando to legan dan onliliber, “Nengneng yo so tumang na toon labay a pagalangan na ari!”

12Pinmawil si Mardokeo ed solar na palasio; balet si Haman magangganat a sinmempet a sinakuban toy lupa to, lapud kababaingan to.

13Imbaga tod asawa to tan amin a kakaaro to iray amin ya agawad sikato. Insan kuandan amin ed sikato, “Nababalang mo lay pakayarim tan niyaalis ed kinen Mardokeo. Sakey a Judio, kanyan ag mo nalabanan. Andi-duaruwan taloen to ka, ta kaiba toy mabilay a Dios!”

Nibitay si Haman

14Legan ni ran mantotongtong, sinmabi ray yunukod palasio, ta awiten day Haman ed ponsia ya imparaan nen Ester.