Isaias 19 - Pangasinan Meaning-Based Bible(MBBPAN83)

Dusaen na Dios so Egipto

1Sikato yay propisiya a nipaakar ed Egipto.

Akalogan ed lorem so Katawan tan maples a mamapaarap ed Egipto. Manggiwgiw ed arap to iray talintaoy diriyos na Egipto, tan nanaekalan na biskeg na linawa iray Egipsio.

2Say Katawan kuanto, “Panlalabanen ko ray Egipsio; mankakabilan iray sanaagi tan saray sanaabay. Mambabakal iray siudad tan mansasamsaman na pakayari iray arari.

3Pagmaliwen kon andi-kakanaan iray plano na Egipsio tan deralen koy kalakal da. Kerewen dan tulongan ira na saray talintaoy diriyos da tan mangipanon irad saray midyum tan mikerew irad saray inaatey na simbawa.

4Ipalimak iray Egipsio ed pakayari na sakey a masebeg tan maruksan ari a manoley ed sikara. Siak, say Katawan a Makapanyarin-amin so nansalita.”

5Onkati so Ilog na Nilo, insan mankalkalnan naekatan.

6Ombanget iray kolus na ilog legan iran nanaekatan. Nalenes iray tanobung,

7tan namagaan ya amin iray tanaman ed gilig na Ilog na Nilo insan ira nitikyab.

8Onngesnges tan onakis ya amin iray totoo a say anapay bilay da et diad Ilog na Nilo; magmaliw ya andi-kakanaan iray banwit tan saray iket da.

9Manermen iray managgaway abel a linen;

10nalemay iray marunong a mankimey tan saray managinaramey.

11Makulang-kulang iray pangulo na siudad na Soan! Andi-kakanaan iray isisimbawa na saray sankakabatan ya Egipsio! Panon dan nitepel ya ibagad ari a sikaray kasalat na saray gendat a makabat tan arari?

12Arid Egipto, iner so kawalaan da ray masilib mon sumisimbawa? Nayarian da angankon ibaga iray plano na Katawan a Makapanyarin-amin nipaakar ed Egipto.

13Makulang-kulang iray pangulo na Soan tan Memfis. Nepeg komun ya ipangulo day bansa, balet pinalikdo ra.

14Ginolo na Katawan so kaisipan da, kanyan makagewgew iray simbawa ra. Lapud saya, nanggagaway maoges so Egipto tan mandongilngil a singa abuek a mankaronyas ed dilin ota to.

15Anggapoy Egipsion makatulong, mayaman may mairap-bilay, abeba may atagey so kipapasen to.

Mangigalang ed Katawan

so Egipto

16Onsabiy panaon a magmaliw a singa mabaing a bibii iray Egipsio. Onggiwgiw irad takot no nanengneng dan akaonat a manusad sikara so taklay na Katawan a Makapanyarin-amin.

17Ontakot ed Juda iray Egipsio kapag nipanunot ed sikara so pansumpalan da ya imparaan na Katawan a Makapanyarin-amin.

18No onsabiy tan a panaon, say salitan Hebreo so ikana na saray totoo ed saray limaran siudad ed Egipto. Mansamba ra ed ngaran na Katawan a Makapanyarin-amin. Say sakey a siudad natawag na “Siudad na Agew.”

19No onsabiy tan a panaon, nawalaan na altar a para Katawan so Egipto tan say sakey a masanton lusek a nisaklang ed sikato diad Egipto.

20Sikara yay tanda na kiwawalay Katawan a Makapanyarin-amin ed Egipto. No napapairap iray totood man tan onkerew irad Katawan na tulong, say Katawan et mangibaki na mangyagel ed sikara.

21Ipaamta na Katawan so sikaton dili ed saray Egipsio; birbiren dad satan tan igalang da, tan isaklangan da na saray bagat. Masimsimoon irad satan a mansipan tan sumpalen da ray sipan da.

22Dusaen na Katawan iray Egipsio, insan to ra balet paabigen. Ompawil irad sikato, dengelen to ray pikakasi ra tan paabigen to ra.

23No onsabiy tan a panaon, nagawa so maawang a dalan a manlapud Egipto ya anggad Asiria. Makaonlad satan ed Asiria iray Egipsio tan makaonlad Egipto iray taga Asiria. Mankasakey ira yan duan bansa a mangigalang ed Katawan.

24No onsabiy tan a panaon say Israel mipara ed bansa na Egipto, tan Asiria, tan magmaliw ira yan taloran bansa a bindision ed intiron mundo.

25Bindisionan ira na Katawan a Makapanyarin-amin a kuanto, “Bindisionan ta ka Egipto, sika a took; Asiria, sika a pinalsak; tan Israel, sika a toon pinilik.”