Say Kakabatan nen Solomon 17 - Pangasinan Meaning-Based Bible(MBBPAN83)

Sinmabid Labi so Baleg a Takot ed saray Egipsio

1Makapakelaw, O Katawan, iray sintinsiam tan mairap iran ipalawawa; sikato yay makasengeg ya abalang iray totoon ag nibangat nipaakar ed sikara.

2Nen saray totoon ag mangingalngalep ed ganggan et abaloan dan walad pakaoley da so masanton bansam, sikaran diliy apriso diad andokey a labi na bilonget. Mandokdokul irad dilin kaabungan da tan apokuk iran ag nasabi na andi-anggaan a panangasikasom.

3Abaloan dan maamut iray kasalanan da tan anggapoy makaamta, ya asaniban na ambilonget a kurtina na inkalingwan, balet natan mapalaloy panggiwgiw da, agewgew ira, tan ontan lay panataktakot ed sikara na saray bengatlan singa anyani.

4Ag ira niagel ed takot na anggan saray ambilonget a sokung a dodokulan da. Aliber ira na makapataktakot ya ingalan; pinmatnag ed arap da iray makapakebyew ya anyanin maermen so lupa ra.

5Anggapoy apoy a walay pakayari ton manliwawad sikara, tan anggapoy agawaan na saray maliwawan bitewen ed pamaandi na samay makapatey a bilonget.

6Wala labat so makapataktakot ya apoy, ya ag sinelselan na limay too, a sinminag ed sikara, tan diad gaway takot da sinisia ra a say tuan mundo et maoges ni nen say mundon walad kanunotan da.

7Nagmaliw a makapabaing iray palikdon gagawaen a panagsalamangka ra, tan nagmaliw ya andi-kakanaan so amin a kakabatan ya inkikinon da.

8Inkuandan nayarian dan paandipaten ya amin iray takot tan sakit na kanunotan, balet natan sikaran diliy mansasakit na saray inaambagel tan anggapoy makasengeg a takot.

9Anggaman ya anggapoy peteg ya agawan maatap, ataktakot irad tanul na saray oleg tan saray ayayep ya abaloan dan onsisingger ed sikara.

10Kanyan inaatey ira a manggiwgiw ed takot tan antakot day onlimata balet ag da met nayarian so onlikdem.

11Say kaogsan et matakot tan sisintinsiaan toy sikaton dili. Siopamay gugunigonen na konsinsia to et nunoten to lawas a lalon maoges ni iray bengatla nen say tuan kipapasen da.

12Say takot et say ag pakapangikana na tulong ya iiter na panagnunot.

13No kulang so biskeg na linawam a manmatalek ed panagnunot, aabuloyan mon manari ed sika iray takot a manlalapud ag pakaamta.

14Nilabi-labi ya ag makaogip tan makapainawa ira man a totoo, anggaman ya anggapoy pakayari na labi ed sikara, bangta nanlapud anggapoy pakayarin kaaraleman na panaayaman da ray inatey.

15Inosilan ira na saray bengatlan aliwliway nengneng da, tan mandokdokul iran ag makagalaw nen insuko ray sikaran dili ed samay bigla tan ag ilaloan a takot a sinmabid sikara.

16Biglan natumba iray totoo tan niparokul ira ya asinger na golunggolung na dilin takot da.

17Adakep na namparan ag nabaat a kapalaran iray dumaralus, saray pumapastol, tan saray kumikimey, tan asingger irad kabilongetan na samay namparan ag nanengneng a golunggolung.

18-19Sinmabid sikaray takot tan gewgew, lapud banesbes na dagem, odino kanta da ray kamanokan ed kakiewan, odino ungol na maples a danum, odino tanul na saray baton-dampay a napepelag, odino tanul na saray ag nanengneng a pinalsan mambabatik-batik, odino masebeg a pangwam na saray ayayep ed katakelan, odino tanul ya ipopoktal na kapalandeyan.

20Diad kaskasnagay liwawa na agew, ag asigensigen iray arum a totood mundo diad impanggagawa ray kimey da.

21Saraman a totoo labat so asakuban na sayan ambelat a labi, say ononan pakataway dad bilonget na patey a manaalagar ed sikara. Sikaray makabelbelat ed sikaran dili ya ambelat ni nen samay bilonget.