Probirbio 4 - Pangasinan Meaning-Based Bible(MBBPAN83)

Saray Kaabigan ya Iiter na Kakabatan

1Anak, dengel yoy ibabangat na ama yo. Asikaso yo, et nawalaan kayoy pakatalus.

2Maung iray ibabangat ko, kanyan ag yo ra lilingwanan ya amin.

3Nen ogaw ak nin melag, a bukbukor koy anak na saray ateng ko,

4binabangatan ak nen amak. Inkuanda, “Nunot mo ray ibabagak tan ag mo ra lilingwanan. Onur mo ray ganggan ko, et mambilay ka.

5Anap mo so kakabatan tan say pakatalus! Ag mo lilingwanan o ipopolisay iray ibabagak.

6Ag mo ikakaindan so kakabatan, et iyagel to ka; arom, et iyarawi to kad kaatapan.

7Say sankamanonaan a nayarin gawaen mo et say pananap moy kakabatan. Gawam so anggaay nayarian mo a mananap na pakatalus.

8Arom so kakabatan, et pagmaliwen to kan matalonggaring. Lakap mo, et itdan to kay kagalangan.

9Say kakabatan so koronam a napnoy kagalangan.”

10Dengel mo ak, anak ko. Ipapusom ya awaten iray salitak, et andokey so pambilay mo.

11Imbangat kod sikay kakabatan tan inwanwan ta kad dalan na matonung a panagbilay.

12No manakar ka, anggapoy makasarad dalan mo tan no ombatik ka, ag ka nipatakba.

13Nunot mo lawas so naaral mo. Say aral mo sikatoy bilay mo—simpitan mon maung.

14Ag ka oonla ed lalaen da ray totoon maoges odino aaligen so kagagawa ra.

15Ag mo gagawaen! Arawian moy antokaman a kaogsan! Ipolisay mo tan ituloy moy kurang mo.

16Ag makaogip iray totoon maoges no ag ni ra akapanggaway kaogsan. Ag ira makalirep no anggapo niy apasakitan dan too.

17Diad sikara say kaogsan tan karuksaan et singa kakanen tan iinomen.

18Say dalan a pankukurangan da ray totoon matonung et singa ombubutay ya agew ya onliliwawa lan onliliwawa ya anggad maliwliwawa la.

19Balet say dalan a pankukurangan da ray totoon maoges et ambilonget a singa labi. Natumba ra, ta ag da nanengneng so akapateran da.

20Anak ko, dengel moy ibabagak. Talineng mo ray salitak.

21Ag mo aabuloyan a nalingwanan mo ra. Nudnunot mo ra tan yan mo rad pusom.

22Itdan da na bilay tan abig-laman so siopaman a makatatalus ed sikara.

23Alwaran moy panagnunot mo; say panagnunot mo so mangooksuy na bilay mo.

24Ag kan balut mansasalita na aliwan tua. Ag ka mibabali ed palikdo.

25Nengneng ka lawas a sitatalek ed lalaen mo; ag mo itetewek so olom diad kababaingan.

26Iplanom a maung so gagawaen mo, pian maabig so pansumpalan na antokaman a gawaen mo.

27Arawian moy kaogsan tan mankurang kan mapmaptek. Ag ka onsuasuawi na anggan sakey a kutdang ed maptek a dalan.