Isaias 54 - Pangasinan Meaning-Based Bible(MBBPAN83)

Say Panangaro na Katawan

ed Israel

1Jerusalem, singa ka biin lepes,

balet natan makapankanta tan makapaneyag ka lapud liket.

Nawalaan ka natan na saray anak

a dakel ni nen saray anak na biin ag balut tinaynan na asawa to.

2Pabaleg moy tuldan panaayaman mo;

parokey moy singer to tan paletan mo ray palpal to!

3Paawangen moy ketegan mo ed amin a dapag;

nabawi na saray totoo so dalin

a panaayaman natan na saray arum a bansa.

Napano na saray totoo iray

siudad ya ataynan ira natan.

4Ag ka natatakot—ag ka la napelag ed kababaingan;

ag ka la napaabeba.

Nalingwanan moy kalamangan mo nen malangwer ka nin asawan bii,

tan say ontan lan kaermenan mon sakey a balo.

5Magmaliw a singa asawam a laki so Amalsad sika—

Yahweh a Makapanyarin-amin so ngaran to.

Ilaban ka na masanton Dios na Israel—

sikatoy manoley ed intiron mundo.

6Israel, singa ka malangwer ya asawan bii,

a tinaynan na asawa to kanyan mapalaloy segsegang mo.

Balet tinawag ka lamet na Katawan a kuanto,

7“Diad maganon bekta tinaynan ta ka;

balet lapud ontan lan panangarok ed sika sayakopen ta ka.

8Diad maganon bekta tinaynan ta kan walay pasnuk ko,

balet andi-anggaan kon ipanengneng so panangarok ed sika.”

Saya sirin so ibabaga na Katawan a mangilalaban ed sika.

9“Nen panaon nen Noe insipan ko

ya ag ko la delapen so intiron mundo.

Isipan ko natan ya ag ak la mampasnuk ed sika;

ag ta ka la pampasnukan odino dusaen.

10Nayarin nakusbo ray kapalandeyan tan saray kapokdulan,

balet ag manganggay panangarok ed sika;

Ando lan andon sumpalen koy sipan kon mangiter na kareenan.”

Saya sirin so ibabaga na Katawan a mangaarod sika.

Say Balon Jerusalem

11Say Katawan kuanto,

“O Jerusalem, sika a maniirap tan kaskasian a siudad,

tan anggapoy manligliwad sika,

saray mabmablin bato so ikanak ed pamaalagey ko lamet na saray pundasion mo.

12Rubi ray ikanak ed pangipaalagey kod saray torim,

bato ran mankidyam a singa apoy iray ikanak ed saray puirtam,

tan alahas iray ikanak ed padir.

13“Siak a dili so mambangat ed saray totoom

tan mangiter ed sikara na ontan lan aligwas na bilay.

14Say inkatonung tan say kaptekan so mamabiskeg ed sika.

Niarawi ka ed kaatapan na panamairap tan panagtaktakot.

15No walay ondogpad sika,

ondogpa ya anggapoy abuloy ko;

Natumba so siopaman ya onlaban ed sika.

16“Pinalsak so pumapanday

a mampaparlang na apoy tan mamipitpit na saray gawaen ya armas.

Pinalsak met iray sondalo,

a mangikakana na saray armas a pamatey.

17Balet anggapoy armas a makapasakit ed sika;

walay niebat mo ed amin a mangakusa ed sika.

Iyagel ko ray aripen ko tan panaloen ko ra.”

Say Katawan so nansalita.