Job 3 - Pangasinan Meaning-Based Bible(MBBPAN83)

Say Riklamo nen Job ed Dios

1Kayari to ya, nansalitay Job; insamba toy agew na inkianak to.

2Inkuanto:

3“Nisamba komun so agew na inkianak ko;

tan say labi na inkinginew ko.

4Magmaliw komun a bilonget iman ya agew;

ag la komun nanunotan na Dios iman ya agew;

ag lan balut komun naliwawaan.

5Nakobutan komun na ermen tan makapal a bilonget iman ya agew;

nasakuban komun na lorem tan nasaniban so agew.

6Naekal komun iman a labi ed taon,

tan ag lan balut nibilang ed saray bulan;

7magmaliw komun ya andi-kakanaan tan anggapoy liket.

8Isamba komun na saray managsamba iman ya agew,

saray totoon makapatoluk ed Libiatan.

9Ag la komun onsinag so kabontalala ed kabwasan;

naandian la komun na ilalo iman a labi ya onsabiy palbangon.

10Nisamba komun iman a labi lapud inyabuloy to ak a nianak,

tan imparontal to ak ed gunigon.

11Inatey ak la komun ed dalem na eges nen inak

odino diad samay bektan nianak ak.

12Akin et inampupo ak ni nen inak?

Akin et pinapasoso to ak ni?

13No inatey ak la nen saman,

mampapainawa ak la komun natan,

14nanaogip a singa saray arari tan saray manoley

ya amasimbalon nampapaalagey na saray dagdaan a palasio.

15On, nanaogip ak la komun a singa saray prinsipi

a nampapano ed saray kaabungan da na balituk tan pilak;

16odino singa ogaw ya inatey lan nianak.

17Diad lobuk ag la makagaway kaogsan iray maoges a totoo,

tan makapanpainawa la ray kumikimey a naknaksawan.

18Kareenan met lay niwalad saray anggan priso,

ag la ra naingal-ingalan tan nigangganggan.

19Atagey may abebay kipapasen wadman ira,

tan saray aripen bolus la ran siansia.

20Akin et mambilay ni ray totoon maniirap?

Akin et naitdan niy liwawa iray totoon maneermen?

21Pampirawatan day patey, balet ag onsabi;

pampilalekan da niy ompatey nen say makagamur na kayamanan.

22Ontan lay liket tan gayaga ra

no lobuk la so narapat da.

23Iyaamut na Dios so arapen da

tan sasaniban toy kawalaan da.

24Ag ak mamangan lapud ermen ko;

ag ontonday panay-ay ko.

25Onsasabid siak iray amin a tatakotan ko,

tan pampapagaan ko.

26Anggapoy kareenan tan painawak,

tan ag mangangga ray gunigon ko.”