1-2Insan imbaga na Katawan ed saray totood Israel diad panamegley nen Josue, “Mamili kayo na saray siudad a salimbengan onung na imbagak ed sikayo diad panamegley nen Moises.
3Say toon makapatey ya ag to ginagala nayarin onlad siudad a salimbengan et nibatikan to la so toon labay toy ombawid sikato.
4Nayarin ombatik ed sakey ed sarayan siudad, onlad pasen a panagsalaysayan diad lolooban na siudad, tan diman to ipaliwawad saray pangulo no antoy agawa. Palooben dad satan ed siudad, itdan day pasen a panayaman to, pian makapanayam diman.
5No say toon labay toy ombawid sikato et tombuken tod man, saray totood siudad et ag da nepeg ya ipalima ed sikato imay toon sinmalimbeng. Nepeg da ya iyagel ta akapatey na too ya ag to ginagala, aliwan lapud pambosul to.
6Nayarian toy manayam diman ya anggad nasalaysay tan nasintinsiaan na karaklan tan anggad ipatey na Pangulon Pari ed saman a panaon. Insan samay too nayarin to lay onsempet la ed dilin baley to a nanlapwan to nen binmatik.”
7Kanyan diad sagur na Jordan imbiig day Kedes na Galilea, diad kapokdulan a dalin na Neftali; Sikem, diad kapokdulan a dalin na Efraim; tan Hebron, diad kapokdulan a dalin na Juda.
8Diad bokig na Jordan, diad niatagey a patar ed kalawakan a walad bokig na Jerico, pinili ray Bezer, diad dalin na Ruben; Ramot na Galaad, diad dalin na Gad; tan Golan na Basan, diad dalin na Manases.
9Sikara yay siudad a salimbengan ya apili ran para saray amin a totood Israel tan para amin a sangkailin manaayam ed dalin da. Siopamay makapatey ya ag to ginagala niagel diman ed toon labay toy ombawid sikato; ag napatey no sikatoy ag ni asalaysay na karaklan.
Who We AreWhat We EelieveWhat We Do
2025 by iamachristian.org,Inc All rights reserved.
