Josue 19 - Pangasinan Meaning-Based Bible(MBBPAN83)

Say Dalin a Nipabetang ed kinen Simeon

1Say kumadwan apabetangan na dalin et saray pamilya na tribu nen Simeon. Say dalin da et walad loob na dalin a nipabetang ed tribu nen Juda.

2Sakop to so Beer-seba, Seba, Molada,

3Hazar-sual, Bala, Ezem,

4Eltolad, Betul, Horma,

5Siclag, Bet-marcabot, Hazar-susa,

6Bet-lebaot tan Saruhen; talomplon siudad iran amin, a pati saray baley a kaliber-liber da.

7Sakop to met ni so Ayin, Rimon, Eter, tan Asan; apatiran siudad iran amin, a pati saray baley ed kaliber-liber da.

8Sakop to ray amin a baley ed kaliber-liber na sarayan siudad ya anggad Baalat-beer (odino Rama) diad abalaten. Sikato yay dalin a naawat na saray pamilya na tribu nen Simeon.

9Bangta say nipabetang ed Juda et baleg nen say nakaukolan da, niiter ed tribu nen Simeon so arum a parti na dalin da.

Say Dalin a Nipabetang ed kinen Zabulon

10Say kumatlon apabetangan na dalin et saray pamilya na tribu nen Zabulon. Say dalin a naawat da et nasabi toy anggad Sarid.

11Manlapud man say ketegan mampasagur ya anggad Marala tan makasabid Dabeset tan say kolus a nibokig na Jocneam.

12Manlapud biek a dapag na Sarid ontuloy ed bokig ya anggad ketegan na Kislot-tabor, insan ontuloy ed Daberat tan mampaatagey ed Jafia.

13Manlapud man mampabokig ya anggad Gat-hefer tan Et-kazin, onlikon mamaarap ed Nea tan ontalus ed Rimon.

14Diad baybay say ketegan onlikon mamaarap ed Hanaton tan mansamput ed Patar na Ifteel.

15Sakop na dalin da so Catat, Nahalal, Simron, Idala, tan Betlehem; labinduan siudad iran amin a pati saray baley ed kaliber-liber da.

16Sarayan siudad tan saray baley da et sakop ira na dalin a nipabetang ed saray pamilya na tribu nen Zabulon.

Say Dalin a Nipabetang ed kinen Isacar

17Say kumapat ya apabetangan na dalin et saray pamilya na tribu nen Isacar.

18Say dalin da et sakop toy Jezreel, Kesulot, Sunem,

19Hafaraim, Shion, Anaharat,

20Rabit, Cision, Ebez,

21Remet, En-gannim, En-hada, tan Bet-pazez.

22Nasabi na ketegan da so Tabor, Sahazuma, tan Bet-semes, insan mansamput ed Jordan. Sakop to so labinanem a siudad a pati saray baley ed kaliber-liber da.

23Sarayan siudad tan saray baley da et sakop na dalin a nipabetang ed saray pamilya na tribu nen Isacar.

Say Dalin a Nipabetang ed kinen Aser

24Say kumaliman apabetangan na dalin et saray pamilya na tribu nen Aser.

25Say dalin da et sakop toy Helcat, Hali, Beten, Acsaf,

26Alamelec, Amad, tan Misal. Diad sagur nasabi toy Carmelo tan Sihor-libnat.

27Diad iliko na ketegan da ed bokig ontuloy ed Bet-dagon tan nasabi toy Zabulon tan patar na Ifteel, insan ontuloy ed Bet-emec tan Neiel diad baybay. Diad baybay nadalan toy Cabul,

28Hebron, Rehob, Hamon, Cana, ya anggad Sidon.

29Insan say ketegan onlikod Rama tan nasabi toy siudad na Tiro ya apaliberan na padir. Insan onlikod Hosa tan mansamput ed Dayat na Mediteraneo. Sakop to met so Mahalab, Aczib,

30Uma, Afec, tan Rehob; duamplo tan duan siudad iran amin, a pati saray baley ed kaliber-liber da.

31Sarayan siudad tan saray baley da et sakop ira na dalin a nipabetang ed saray pamilya na tribu nen Aser.

Say Dalin a Nipabetang ed kinen Neftali

32Say kumanem ya apabetangan na dalin et saray pamilya na tribu nen Neftali.

33Say ketegan na dalin da et manlapud Helef ya anggad kiew a robli ed Zaananim, insan mamaarap ed Adamineceb tan diad Jabneel ya anggad Lacum, insan mansamput ed Jordan.

34Manlapud man onlikod sagur a mamaarap ed Aznot-tabor insan ontuloy ed Hucoca tan nasabi toy Zabulon diad abalaten, Aser, diad sagur, tan Jordan diad bokig.

35Saray apaliberan na padir a siudad et saraya: Sidim, Ser, Hamat, Racat, Cineret,

36Adama, Rama, Hazor,

37Kedes, Edrei, En-hazor,

38Jiron, Migdal-el, Horem, Bet-anat, tan Bet-semes; labinsiam a siudad iran amin a pati saray baley ed kaliber-liber da.

39Sarayan siudad tan saray baley da et sakop na dalin a nipabetang ed saray pamilya na tribu nen Neftali.

Say Dalin a Nipabetang ed kinen Dan

40Say kumapiton apabetangan na dalin et saray pamilya na tribu nen Dan.

41Say dalin da sakop toy Zora, Estaol, Ir-semes,

42Saalabin, Ayalon, Itla,

43Elon, Timna, Ecron,

44Elteke, Gibeton, Baalat,

45Jehud, Bene-berac, Gatrimon,

46Me-jarcon, tan Racon; ontan met ed kaliber-liber na Jope.

47Nen abalang na saray totoo na Dan so dalin da, linma rad Lesem tan dinogpaan da. Adakep da, pinapatey da ray totoo to, tan kinayaryan da. Nanayam irad man tan impagmaliw da a Dan so ngaran to may siudad; impara ra ed ngaran na laki ran si Dan.

48Sarayan siudad tan saray baley da et sakop na dalin a nipabetang ed saray pamilya nen Dan.

Say Kaonuran ya Apabetangay Dalin

49Nen kayarin inapag-apag na saray totood Israel so dalin, initdan day Josue a lakin anak nen Nun na sakey a parti na dalin.

50Onung na ingganggan na Katawan, inter dad sikato so siudad a kinerew to: say Timnat-sera diad kapokdulan a dalin na Efraim. Pinasimbalo ton impaalagey imay siudad tan nanayam diman.

51Si Eleazar a pari, si Josue a lakin anak nen Nun, tan saray pangulo da ray pamilya na saray tribu na Israel et impapabetang da ra yan parti na dalin diad panamegley na pampapalaranan da diad impangipanon dad Katawan diad Silo, diad lolooban na Tuldan Ayamay Katawan. Diad onya asumpal dan inaapag-apag so dalin.