Exodo 36 - Pangasinan Meaning-Based Bible(MBBPAN83)

1“Si Bezalel, si Oholiab, tan amin nin arum a marunong a kumikimey, ya angiteran na Katawan na karunongan tan pakatalus a manggawa na antokaman a nakaukolan ed pangipaalagey na Tuldan Ayamay Katawan, et nepeg a gawaen day amin a bengatla onung na ingganggan na Katawan.”

Saray Totoo Angyakar iray Amayamay a Rigalo

2Si Moises tinawag to ra di Bezalel, Oholiab tan amin nin arum a lalakin marunong a mankimey ya angiteran na Katawan na karunongan tan maliket iran ontulong, tan imbaga nen Moises ed sikara ya igapo da lay mankimey.

3Inawat dad kinen Moises iray amin a bagat a maliket ya inyaakar na saray Israelita ya ikanad pangipaalagey na masanton Tulda. Balet saray Israelita intuloy day angyaakar ed kinen Moises na saray bagat da kapag kabwasan.

4Insan saramay marunong a kumikimey a manggagawad santuario linma rad kinen Moises

5tan kuandad sikato, “Saray totoo et mangyaakar ira na masoluk nen say nakaukolan ed kimey ya ingganggan na Katawan a gawaen.”

6Kanyan si Moises ingganggan to ed intiron kampo ya ag la aruman na siopaman so bagat a para masanton Tulda; ag la sirin angyakar na bagat iray totoo.

7Saray niyakar lan bagat et masoluk la a panumpal na amin a kimey.

Say Impanggawa na Tuldan Ayamay Katawan

8Amin iray sankarunongan ed saramay mankikimey et sikaray nanggawa na Tuldan Ayamay Katawan. Ginawa ra ed samploran kurtina a pinon linen. Asul, purpura, tan ambalanga so tinebey da, tan binordaan da ra na saray kirubin.

9Nampapara so kabaleg na balang sakey a kurtina; labinapat a yarda so dokey da tan duaran yarda so benlag da.

10Impansasaip dan dinait so limara tan ontan met so ginawa ra ed limara.

11Nanggawa rad gilig na samput na kapag samay impansasaip na saray panagkawitan ya asul ya abel.

12Pineketan da na limamplon panagkawitan so onaan a kurtina ed sakey ya impansasaip tan limamplo met so samput a kurtina ed samay sakey; impanpepetekan da ra.

13Nanggawa ra na limamplon balituk a panagkawit a sikaray amakasakey ed saramay duaran impansasaip a kurtina.

14Insan nanggawa ra na labinsakey a kurtina a bagoy kanding a para sakbung na Tulda.

15Ginawa da ran nampaparay kabaleg, labinliman yarda so dokey da tan duaran yarda so benlag da.

16Impansasaip dan dinait so limara tan ontan met so ginawa ra ed saramay anemira.

17Pineketan da na limamplon panagkawitan so gilig na samput a kurtina ed samay sakey ya impansasaip tan limamplo met so samput a kurtina ed samay sakey.

18Nanggawa ra na limamplon gansan panagkawit a mamakasakey ed saramay duaran impansasaip, pian nagawa ran sakey a sakbung.

19Nanggawa ni ray duaran sakbung, sakey so pinabalanga tan pinamagan katat na karniron kalakyan tan say sakey a pinon katat; inkana da ran sakbung ed tapew.

20Nanggawa ra na saray tablan akasia a pamaalagey na Tulda.

21Limaran mitro so dokey na kapag tabla tan duamplo tan piton pulgada so lapar to,

22tan walay duaran kagur to, pian makapantetekep ira yan tabla. Amin a tabla wala ray kagur da.

23Nanggawa ray duamplon tabla a para bandad abalaten na Tulda,

24tan nanggawa ra met na apataplon pilak a dapan na tabla, duaran dapan ed silong na kapag tabla a sikaray pineketan na duaran kagur.

25Nanggawa ra na duamplon tabla a para bandad baybay na Tulda,

26tan nanggawa ra met na apataplon pilak a dapan, duaran dapan ed silong na kapag tabla.

27Nanggawa ra na anemiran tabla para beneg na Tulda diad bandad sagur

28tan duaran tabla a para saray sokung.

29Sarayan tabla ed sokung et asangal ira manlapud leksab ya anggad tagey. Onyay impakagawa na saray duaran tabla a sikaray duaran sokung.

30Kanyan walay waloran tabla a walay labinanem a pilak a dapan da, duara ed silong na kapag tabla.

31Nanggawa ra na labinliman balewet ya akasia, limara so para saray tabla ed sakey a diking na Tulda,

32limara so para saray tabla ed sananey a diking, tan limara so para saray tabla ed bandad sagur na Tulda diad beneg to.

33Say karokey na pegley a balewet, a nilira ed pegley da ray tabla, et manlapud sakey a samput ya anggad sakey a samput na Tulda.

34Inokupan da na balituk iray tabla tan pineketan da na saray balituk a liken a mangegnad saray balewet a naokupan met na balituk.

35Nanggawa ra na kurtina a pinon linen. Asul, purpura, tan ambalanga so tinebey to tan binordaan da ra na saray kirubin.

36Nanggawa ra na apatiran lusek ya akasia a pangibitinan ed samay kurtina, inokupan da ra na balituk, tan pineketan da ra na saray panagkawit a balituk. Insan ira nanggawa na apatiran dapan a toonan na sarayan lusek.

37Inggawaan da na kurtina a pinon linen so lolooban na Tulda; asul, purpura, tan ambalanga so tinebey to tan binordaan da.

38Para sayan kurtina nanggawa ra na limaran lusek ya akasia a wala ray nipeket a panagkawit, inokupan da na balituk iray toktok da tan saray tekang da, tan nanggawa ra na gansan dapan para sarayan lusek.