Isaias 46 - Pangasinan Meaning-Based Bible(MBBPAN83)

1“Sikato la yay anggaan na saray diriyos na Babilonia!

Nen saman inggalang na saray totoo si Bel tan Nebo,

balet natan akalogan irad beneg na asno,

makabelbelat irad saray naksawan lan ayayep.

2Saray talintaoy diriyos et ag da nilaban so sikaran dili;

adakep ira tan niakar irad arawi.

Sikato la yay anggaan na saray diriyos na Babilonia.

3“Dengel kayod siak, sikayon kabyangan na boleg nen Jacob,

amin yon atilak a totook.

Inasikaso ta kayo nanlapu lad inkianak yo.

4Siak so Dios yo tan asikasoen ta kayo

anggad ontakken kayo tan ompoti lay buek yo.

Ginawa ta kayo tan asikasoen ta kayo;

tulongan tan iyagel ta kayo.

5“Siopay pangiparaan yod siak?” kuay Katawan.

“Wala niy arum a singa siak?

6Lolokasan na saray totoo iray supot da insan da ikakalbo ray balituk da;

isisimbang da ray pilak ed simbangan.

Manguupa ray platiron manggawa na dios;

insan da dadakmomoan tan gagalangen so sakey a dios.

7Sasakbaten tan aawiten da;

ililira rad sakey a pasen, tan manalagey diman,

ag makaalis ed kawalaan to.

No walay mampikasi ed sikato ag makaebat

odino makapangilaban ed gunigon to.

8“Tandaan yo ya, sikayo ran makasalanan;

nudnunot yo ray ginagawak.

9Tandaan yo ray agawa nen saman;

birbir yon bukbukor koy Dios

tan anggapo lay arum a singa siak.

10Nanlapud gapo impasakbay koy pansumpalan;

abayag ko lan impasakbay no antoy nagawa.

Imbagak a nasumpal a nasumpal iray planok;

imbagak a gawaen kon gawaen iray amin a ginetmak a gawaen.

11Tatawagen kon ondago so toon manlapud bokig;

onsibar a singa sakey ya agila

tan gawaen to so implanok.

Nansalita ak, et tuan nagawa so

sinalitak.

12“Dengel kayod siak, sikayon totoon anawet ya impanpuso,

ya abaloan yon arawi ni so pananalo.

13Papaasinggeren koy agew na pananalo—

aliwa lan arawi lamlamang.

Ag la naabala so panalok.

Ilaban ko so Jerusalem

tan iter kod man so kagalangan na Israel.”