Say Kakabatan nen Solomon 5 - Pangasinan Meaning-Based Bible(MBBPAN83)

Say Pagbabawi na saray Totoon Maoges

1Diad satan ya agew, say toon matonung et mataletalek a manalagey ed arap da ray nampairap ed sikato tan nanleglemew ed saray kimey to.

2Nikelawan irad pakanengneng da ya anggapoy maoges ya agawad sikato tan onggiwgiw irad mapalalon takot da.

3Insan da pagbabawian so ginawa ra, tan managlem irad ermen a mangikuan ed sakey tan sakey:

4“Sikato ya may inelek-elekan tayo. Abaloan tayon sakey a lurey. Agaylay inkakulang-kulang tayod saman! Abaloan tayon sakey ya ambagel lapud impanbilay to, tan nen inatey, ag tayo pinagalangan.

5Et wadya natan, sakey ed saray dilin anak na Dios, a walay pasen tod saray dilin totoo na Dios.

6Sikatayoy sinmian ed dugan dalan. Ag itayon balut nambilay ed liwawa na inkatonung; ag tayon balut akasagap na wandag na liwawa to.

7Legay bilay tayo nanakar-akar itayod anggapoy tandan kalawakan, anta nepeg tayo komuy nankurang ed dalan a labay na Katawan a panakaran tayo. Sayan ag pangingalngalep ed ganggan et inyakar to itayod deral.

8Agaylay panangikinon tayod sikatayon dili—inlalastug tayoy ontan lan inkayaman tayo—et natan, antoy kamaungan ya agawaan tod sikatayo?

9Natan naandi lan amin ira man a bengatla; naandipat la ran singa anino, a singa bengatlan narengel mo insan mo nalingwanan.

10“Ombabaliw ed saray daluyon na dayat so sakey a bapor, balet no akadalan la, anggapoy bakat a pakatontonan. Ag mo nibagan dinmalan diman.

11Ontitikyab ed tagey so sakey a manok, balet anggapoy ititilak ton tanda a nanlapud man. Maples ya ontitikyab; onsosorub ed dagem diad panamegley na biskeg na saray payak to, ya anggapoy ititilak ton pakapatnagay indalan to.

12Bebelsayen na pana so dagem no nibolus ed sakey a kekenaen, balet tampol a mansaip so dagem a dinalan to, tan anggapoy makapangibaga no iner so dinalan to.

13Ontan met so agawad sikatayo; nianak itayo, insan tinmonda itayo lan nambilay. Anggapoy tanda na masimpit a panagbilay ya intilak tayo; dineral itayo na inkaoges tayo.”

14Antoy ilalon walad saray totoon maoges? Say ilalo labat na dayamin itiktikyab na dagem, say ilalo na borad dayat a nanaandid bagyo, say ilalo na asewek ed palayupoy na dagem. Ag mambabayag so ilalo ra, a singa say pakanudnunotan ed toon sinangkailid sayan agew tan tinmaynan ed ontombuk ya agew.

15Balet mambibilay ya andi-anggaan iray totoon matonung. Tumangan ira na Katawan; iyagel ira na Sankatageyan.

16Itdan to ra na kagalangay ari tan say marakep a korona. Salimbengan to ra na saray makapanyarin taklay to.

17Onlan mibakal a ginetma ton taloen iray kalaban to, tan ikana ton armas iray dilin pinalsa.

18Say inkatonung so kawes ton para bakal, say petepeteg a kaptekan so hilmit to,

19tan say inkasanto so ag natalon samper to.

20Obulen ton sakey ya ispada so mapalalon pasnuk to, tan mikasakey ed sikato iray biskeg na pinalsa diad pilaban tod saray anggapoy kalakal ya onsumpad sikato.

21Ompogtad kekenaen iray laris na kirmat, a singa nanggawa so Katawan na panan lorem tan mangipapana.

22Makmaksil ya ondapod saray kalaban to iray oran a kristal. Mapmaples ya onsabid sikara so makaderal a delap na saray dayat tan saray ilog.

23Mabiskeg iran bagyo so ombasig ed sikara, et ombantak iran singa dayami. Say ag pangingalngalep ed ganggan so kaderalan na intiron mundo. Saray maoges a gawa so kapelagan na saray gobirno.