1Saray totoo nanriklamo ra ed Katawan nipaakar ed saray gunigon da. Nen nadngel na Katawan so riklamo ra, akapasnuk tan angibaki na apoy ed saray totoo. Pinmool ed pegley da tan dineral toy sakey a samput na kampo.
2Saray totoo et kinmerew ira na tulong ed kinen Moises; nampikasiy Moises ed Katawan, et narep imay apoy.
3Samay pasen et atawag na Tabera, lapud say apoy na Katawan et pinmool ed pegley da.
Amili na Pitomplon Pangulo si Moises4Wala ray sangkailin kaolup na saray Israelita diad pankukurang ra. Nampilpilalekan day makasira na karni, tan anggan saray dilin Israelita nanriklamo ra: “Oy la komun ta makasira itayo la na karni!
5Nen saman dimad Egipto sawaan so impapangan tayon sira, tan ag tayon balut ira nanggasgastosan. Nanunotan yo ni ra may pipino, pakuan, kutsay, sibuyas, tan bawang a kinakakan tayo?
6Balet dia, makapkapoy itayo la. Anggapo diay naakan—mana lan mana labat ya inagew-agew so kakanen tayo!”
(
7Say mana et singa ankekelag a bokel; potipotiyan a doyaw so kolor to.
8-9Kaolup na linaew ya ompepelag ira ed kampo no labi. Diad ontombuk a kabwasan saray totoo et manliber iran mandokdok, gilingen da odino bayoen da ran pino-pino a singa arina, insan da ilambung tan gawaen dan maimpis iran tinapay. Say taway to et singa tinapay ya inlotod larak na oliba.)
10Nadngel nen Moises iray amin a totoon manririklamo nen agrupo-grupo ran nanalagey ed saray lolooban na saray tulda ra. Agunigon si Moises lapud akapasnuk so Katawan ed sikara.
11Inkuantod Katawan, “Akin et aliwliway gagawaen mod siak? Akin et naermenan ka ed siak? Akin et impasakbat mod siak so pangasikaso ed sarayan amin a totoo?
12Ag ko pinalsa odino inyanak ira! Akin et pagmaliwen mo ak a sakey ya umaasikasod sikara tan ampopoen ko rad taklay kon singa ra melag ya ogogaw ya anggad dalin ya insipan mon iter ed saray lalaki ra?
13Iner so pakalaan koy karnin para sarayan amin a totoo? Mikakasi ra lawas ya onkerew ed siak na karni.
14Ag ko nayarian a bokur koy makaoley ed sikaran amin; ag ko la ya nayarian a songduan!
15No onya niy gawaen mod siak, panangasim ta patey mo ak la, pian ag ak la mantepel na inkaruksam ed siak.”
16Say Katawan kuantod kinen Moises, “Manipon ka na pitomplon lalakin nabibirbir a pangulo na saray totoo, iyakar mo rad mad Tuldan Ayaman ko, tan ibagam ed sikaran manalagey irad abay mo.
17Onakseb ak tan mitongtong ak ed sikad man, insan mangala ak ed ispiritun inter kod sika tan iter kod sikara. Diad satan natulongan da kan mangasikaso ed sarayan totoo, et ag mo la bukor so mangasikaso.
18Ikuanmo natan ed saray totoo, ‘Linisan yo ray sikayon dili para nabwas; et nawalaan kayoy kanen yon karni. Say Katawan nadngel to kayon nantagleey ya imbaga yon makapangan kayo komun na karni tan maung niy kipapasen yo nen wala kayod Egipto. Say Katawan itdan to kayo la na karni a kanen yo.
19Ag kayo mangan na karni ed loob na sanagew labat, odino duaran agew, odino limaran agew, odino samploran agew, odino duamplon agew,
20no ag ingen diad loob na intiron sakey bulan. Mangan kayo na sawasawaan ya anggad natama kayo. Onyay nagawa lapud impolisay yo so Katawan a kaibiba yo tan nanriklamo kayod sikato a lablabay yo lan ag kayo komun tinmaynan a manlapud Egipto.’”
21Si Moises kuantod Katawan, “Wadia ak a mangiwawanwan na anem a lasus a libon totoo, et ibabagam ya itdan mo ra na karni ed loob na sakey bulan.
22Wala ra kasiy baka tan karniro a patasen ya ondugan kanen da? Duga kasin kanen da so amin a sira ed dayat?”
23“Wala sirin so ag ko nagawaan?” ebat na Katawan. “Ag mabayag nanengneng mo no kasi nasumpal so sinalitak odino andi!”
24Kanyan pinmaway si Moises tan imbaga tod saray totoo so impaibaga na Katawan: Impantitipon to ray pitomplon pangulo na Israel tan impasen to rad kaliber-liber na Tulda.
25Insan inmakseb a walad lorem so Katawan tan akisalitad kinen Moises. Angala ed ispiritu ya inter tod kinen Moises tan inter tod sikara. Nen dinmapod sikara so ispiritu, ginapwan day inmeyag a singa saray propita, balet ag nambayag.
26Saray duara ed saramay pitomplon pangulo, di Eldad tan Medad, et nanayam ira ed dalem na kampo tan ag ira linma ed kawalaan na samay Tulda. Dimad dalem na kampo dinmapod sikara so ispiritu, et ginapwan da met so inmeyag a singa saray propita.
27Walay sakey a lakin tobun-balo a batik ed kinen Moises tan imbaga tod sikato so gagawaen di Eldad tan Medad.
28Insan si Josue a lakin anak nen Nun, tan nanlapud impanbalolaki to et katulongan la nen Moises, nansalita tan kuantod kinen Moises, “Patondam ira!”
29Inmebat si Moides, “Nununoten mo so pankaabigan ko? Oy la komun a say Katawan et iter tod amin a totoo to so ispiritu to tan paeyagan to ran amin a singa saray propita!”
30Insan si Moises tan saramay pitomplon pangulo na Israel et pinmawil la ra ed kampo.
Say Katawan Angibaki na saray Pugo31Kabebekta say Katawan pinasuplug toy sakey a mabiskeg a dagem ya angawit na saray pugon nanlapud dayat, a say tikyab da et sakey mitro so kaatagey da ed dalin. Pinanatan da so kampo tan diad kaliber-liber to ya anggad pigapigan kilomitroy kaarawid balang dapag.
32Kanyan diad saman ya agew, sanagew tan sanlabi, insan sanagew lamet ed ontombuk ya agew so impanerel na saray totoo ed saramay pugo; anggapod sikaray akarel na limlimamplon tiklis. Impapaagew da ra ed kaliber-liber na kampo.
33Nen daakan niy karnin kakanen da, akapasnuk ed sikara so Katawan tan pinadalan tod sikaray salot.
34Atawag iman a pasen na Kibrot-hattoava, lapud impompon dad man iray totoon nampilalek a makapangay karni.
35Manlapud man saray totood Israel inmalis irad Hazerot tan dimay nankampoan da.
Who We AreWhat We EelieveWhat We Do
2025 by iamachristian.org,Inc All rights reserved.
