Job 10 - Pangasinan Meaning-Based Bible(MBBPAN83)

1Onsasawa ak lan mambilay.

Dengel kayo ed ibalikas kon ampait a riklamo.

2Ag mo ak kari dudusaen, O Dios.

Ibagam pad siak no antoy ipapakasalanan mod siak.

3Manepeg kasin maruksa ka?

Manepeg kasin balawen moy dilin pinalsam?

Insan panliketan mo ray plano na saray maoges a totoo?

4Singa kasi panangipasen mi so panangipasen mo ed saray bengatla?

5Singa kasi katikey na bilay mi so katikey na bilay mo?

6Akin sirin et aanapen moy amin a kasalanan ko tan sosokayan moy balang kaogsan ko?

7Amtam ya anggapoy kasalanan ko,

tan anggapoy makapangyagel ed siak ed sika.

8Minoli ak na saray liman tan ginawa mo ak,

et natan saratan nin limam so manederal ed siak.

9Nunot mo a pinalsa mo ak ed pitek;

pagmaliwen mo ak kasi a dabuk lamet?

10Initdan moy pakayari so amak a mangilalak ed siak;

pinabaleg mo ak ed eges nen inak.

11Saray pokel tan saray olat so impanogyup mod laman ko;

say laman tan say baog so impamalkut mod saray pokel ko.

12Initdan mo ak na bilay tan ag mangoman a panangaro;

lapud panangasikasom mabilay ak ni ya anggad natan.

13Balet amtak la natan a nanlapud saman

wala lay maamut a getmam a mamasakit ed siak.

14Babantayan mo ak ta nengnengen mo no mankasalanan ak,

pian walay makasengeg na ag mo pamirdonad siak.

15No mankasalanan ak pangaskasiyay kipapasen ko,

balet no manggawa ak na katunongan anggapoy nagunggonak,

Nanairapan ak tan napno ak na kababaingan.

16No siak so onaligwas osilan mo ak a pateyen a singa lion;

manggagawa ka na anggan saray milagro a mamasakit ed siak.

17Wala lawas so tasim sumpad siak;

mampetang lan mampetang so olom ed siak;

wala lawas so kairapan ya iiter mod siak.

18O Dios, akin et inyabuloy mo nin nianak ak?

Inatey ak la komun kasakbayan a walay akanengneng ed siak.

19Nipompon ak la komun a tampol kapaway kod eges nen inak,

pian singa ak ni lamlamang ag nambilay diad tapew na dalin.

20Ag ta pigpigara lay nakdaan ya agew a pambilay ko?

Pambukbukor mo ak la, pian naligliwa ak na daiset.

21Magano lay itaynan ko tan ag ak lan balut ompawil;

onla ak ed ambilonget tan maermen a dalin,

22dalin a walay kabilongetan, tan gewgew,

dalin ya anggan say liwawa et bilonget.”