1 Saray Arari 4 - Pangasinan Meaning-Based Bible(MBBPAN83)

Saray Opisyal nen Solomon

1Si Solomon so ari ed intiron Israel,

2tan saraya so atagey ya opisyal to:

Say pari: si Azarias a lakin anak nen Sadoc

3Saray sikritario na korti: di Elihoref tan Ahias a lalakin anak nen Sisa

Say makaoley ed saray walan nisulat: si Josafat a lakin anak nen Ahilud

4Say manonan pangulo da ray sondalo: si Benaya a lakin anak nen Joiada

Saray papari: di Sadoc tan Abiatar

5Say manona ed saray gobirnador na distrito: si Asarias a lakin anak nen Natan

Say sumisimbawa na ari: si Zabud a pari tan anak nen Natan

6Say makaoley ed saray aripen ed palasio: si Ahisar

Say makaoley ed impasoot a kimey: si Adoniram a lakin anak nen Abda

7Anoroy Solomon na labinduan gobirnador na saray distrito na Israel. Manlapud saray distrito ra so iiter dan taganoy ari tan say pamilya to; balang sakey ed sikara sakey bulan so paniter to na tagano kapag taon.

8Saraya so kangaranan da ray gobirnador tan saray distriton ooleyan da:

Ben-hur: say nipokdul a pasen na Efraim

9Ben-deker: saray siudad na Macaz, Saalbim, Bet-semas, Elon, tan Bet-hanan

10Ben-hased: saray siudad na Arubot, tan Soco, tan say intiron dalin na Hefer

11Ben-abinadab ya asawa toy Tafat ya anak nen Solomon: say intiron dalin na Dor

12Baana a lakin anak nen Ahilud: saray siudad na Taanac, Megido, tan amin a dalin ya asingger ed Bet-sean, say asingger ed baley na Zaretan, say sagur na baley na Jesreel, tan anggad siudad na Abel-menhola tan say siudad na Jocneam

13Ben-geber: say siudad na Ramot-galaad, tan saray bario na Galaad a sakop na boleg nen Jair a lakin kabyangay boleg nen Manases, tan say dalin na Argob diad Basan, anemaplon ankakabaleg a baley ya amin, apaliberan iray padir tan gansa iray balewet na puirta ra

14Ahinadab a lakin anak nen Iddo: say distrito na Mahanaim

15Ahimaaz ya asawa nen Basemat a sakey nin anak nen Solomon: say dalin na Neftali

16Baana a lakin anak nen Husai: say dalin nen Aser tan say baley na Bealot

17Josafat a lakin anak nen Parua: say dalin nen Isacar

18Simei a lakin anak nen Ela: say dalin nen Benjamin

19Geber a lakin anak nen Uri: say dalin na Galaad a nanoleyan nen Sehon ya ari na saray Amorreo tan si Ari Og na Basan

Likud ed sarayan labindua, walay sakey a gobirnador na intiron bansa na Israel.

Say Maaligwas ya Impanoley nen Solomon

20Singa la karakel na buer ed gilig na dayat so karakel na saray totood Juda tan Israel. Daakan so kakanen tan iinomen da; maliket so panagbilay da.

21Sakop na nanarian nen Solomon iray amin a bansa a manlapud bokig na Ilog na Eufrates ya anggad sagur na Filistia, tan anggad ketegay Egipto. Nambabayar iray buis ed sikato tan wala rad silong na pakaoley to legan ton nambilay.

22Say inagew-agew a taganon nakaukolan nen Solomon et a sanlasus tan limamplon sako a pinon arina tan talon lasus a salup a magasal ya sako;

23samploran pinataban baka, duamplon ipapastol a baka, tan sanlasus a karniro, a andi-bali ray ankabaleg tan ankelag ya ulsa, tan saray pinataban manok.

24Manoley si Solomon ed saray dalin ed sagur na Ilog na Eufrates, manlapud Tifsa ya anggad Eufrates tan anggad sagur na siudad na Gaza. Walad silong na pakaoley to ray amin ya ararid sagur na Eufrates, tan maung so pipiolup tod saray kakaabay ton bansa.

25Legan ton nambilay, arawid kaatapan iray totood Juda tan Israel; balang pamilya wala ray tanaman ton ubas tan kakiewan ya igos.

26Si Solomon walay apataplon libo a kabayo to a para karwahi tan labinduan libo a lalakin kumakabayo.

27Sakey bulan ed kapag taon, say sakey ed saray labinduan gobirnador to so makaoley a mangiter na taganon nakaukolan nen Solomon tan amin da ray mamangakan ed palasio to; iniiter da lawas iray amin a nakaukolan.

28Sikara met so makaoley a mangiter na sibada tan dayamin nakaukolan na saray kabayon para karwahi tan saray ayayep a panagkimey; no iner so kawalaay pankaukolan ed saraya dimay pangyakaran da.

29Initdan na Dios si Solomon na nidoma-doman kakabatan tan pakatalus, tan say karunongan ya ag natokur.

30Makabat si Solomon nen saray makabat a totood Bokig odino saray makabat a totood Egipto.

31Sankakabatan ed amin da ray totoo: makabat nen si Etan ya Ezrahita, tan di Heman, Calcol, tan Darda a lalakin anak nen Mahol. Binmantug ed saray bansad kaliber-liber na nanarian to.

32Nanggawa na talon libon probirbio tan sanlibo tan limaran kanta.

33Nansasalita na nipaakar ed saray kiew tan saray tanaman, manlapud saray sidro ed Libano ya anggad isopo ya ontutubod saray padir; nansasalita met na nipaakar ed saray ayayep, saray manok, saray ayayep ya onkokorung, tan saray sira.

34Nadngelan na amin da ray arari ed intiron mundo so kakabatan nen Solomon, kanyan angibaki ray totoon ondengel ed sikato.