Jeremias 9 - Pangasinan Meaning-Based Bible(MBBPAN83)

1Bobun na danum la komun yay olok,

tan sobul na lua iray matak,

pian makapanakis ak ed agew tan labi

lapud saray totood bansak ya apatey-patey.

2Wala komuy pasen a napanayaman kod kalawakan,

pian niarawian ko ray totook.

Aliwa ran matoor;

olup iray traidor.

3Sipaparaan ira lawas a mantila;

katilaan, aliwan katwaan, so manooley ed intiron bansa.

Say Katawan kuanto,

“Mansosoblayan a kaogsan so gagawaen na saray totook,

tan ag da ak bibirbiren a Dios da.”

4Say balang sakey nepeg a manalwar ed anggan kaaro to,

tan ag napampiaan na anggan siopa so agi to;

ta managpalikdon singa si Jacob so balang agi,

tan papaogesen na balang sakey iray kakaaro to.

5-6Papalikdoen na amin iray kakaaro ra,

tan anggapoy mangibabagay katwaan;

impasal dan mantila iray dila ra

tan ag da tondaay mankasalanan.

Mantotombukan lay inkaruksa a gagawaen da,

tan say pampapalikdo ra.

Ibabaga na Katawan a sikatoy ipopolisay na saray totoo to.

7Lapud saya say Katawan a Makapanyarin-amin kuanto,

“Pasilingen kon singa mital iray totoo,

tan suboken ko ra.

Nanggagaway kaogsan iray totook—

anto niy nagawaan kod sikara?

8Singa makapatey a pana iray dila ra;

tila lawas so sasalitaen da.

Maumaung so panagsalita na balang sakey ed kapara ton too,

balet diad tuay tua sisiliban to.

9Ag ko ra dusaen lapud sarayan bengatla?

Ag ak ombawi ed bansan singa onya?

Siak, say Katawan, so nansalita.”

10Inkuanko, “Ermenan ko ray kapalandeyan

tan akisan ko ray pastolan,

lapud minmaga-maga ra;

anggapo lay ondadalan ed sikara.

Ag la narengel so tanul da ray ayayep;

tinmitikyab tan naandi la ray manok tan saray ayayep ed katakelan.”

11Say Katawan kuanto, “Gawaen kon bunton na deral-deral so Jerusalem,

sakey a pasen a panayaman da ray asod katakelan;

magmaliw a kalawakan iray siudad na Juda,

tan sakey a pasen ya ag panayaman na totoo.”

12Tinepet ko, “Katawan, akin et aderal-deral so dalin, tan minmagan singa kalawakan, kanyan anggapo lay ondadalan? Siopay makabat a makatalus ed saya? Siopay angipaliwawaan mod saya, pian nibaga to met ed saray arum a totoo?”

13Inmebat so Katawan, “Onyay agawa, lapud inkaindan na saray totook so bangat ya inter kod sikara. Ag da ak inonur odino sinumpal so imbagak ed sikara.

14Anawet so olo ra, kanyan inonur day labay dan dili. Inggalang da ray talintao nen Baal onung na imbangat na saray lalaki ra a gawaen da.

15Kanyan dengel kad ibagak a gawaen ko, siak a Makapanyarin-amin a Katawan, say Dios na Israel. Itdan ko ray totook na saray ampait a tanaman a kanen da. Itdan ko met iray makasamal a danum ya inomen da.

16Ikaykayat ko rad saray bansa a sikara tan saray lalaki ra et ag da ni nadngelan tan mangibaki ak na saray sondalo sumpad sikara, anggad sigput a naderal ko ra.”

Kinmerew na Tulong iray Totood Jerusalem

17Say Katawan a Makapanyarin-amin kuanto,

“Imano yo ray nagagawa!

Tawag yo ray managermen,

saray bibiin kumakanta no tolur.”

18Saray totoo inkuanda,

“Pangganat yo ra, ta kantaan da kami na kantan para tolur,

anggad onterter iray lua mi,

tan nabasa-basa ray goyamgoyam mi lapud kakaakis.”

19Dengel moy panaakisan da ray totoo ed Sion:

“Aderal-deral itayo!

Sigput a naplag itayod kababaingan!

Nepeg tin taynan so dalin tayo;

aderal-deral tan atumtumba iray kaabungan tayo.”

20Inkuanko,

“Dengel kayod Katawan, sikayon bibii,

tan talineng yo ray salita to.

Ibangat yon manermen iray anak yon bibii,

ibangat yo met a mankanta na kantan para tolur iray kakaaro yo.

21Linmoob ed saray bintana tayo so patey

tan nilooban to ray palasio tayo;

pinagit tod saray dalan iray ogogaw

tan saray lalakin tobun-balo diad saray tindaan.

22Ataytayak iray bangkay na saray totoo,

singa ra nikaykayat a tai na ayayep ed kaalogan,

singa ra ginapas tan intilak na saray umaani,

tan anggapoy manipon na ilik.

Sikato yay papaibaga na Katawan ed siak.”

23Say Katawan kuanto,

“Ag nepeg ya ipasirayew na saray makabat a totoo so kakabatan da,

odino saray mabiskeg a totoo so biskeg da,

odino saray mayaman a totoo so kayamanan da.

24No walay labay toy mampasirayew,

nepeg ya ipasirayew to ya amta to ak tan natalusan to ak,

ta ag mangoman so panangarok,

tan gagawaen ko so katonungan tan kaptekan ed intiron mundo.

Sikara yay bengatlan panliketan ko.

Siak, say Katawan, so nansalita.”

25-26Say Katawan kuanto, “Onsabiy panaon a dusaen ko ray totood Egipto, Juda, Edom, Ammon, Moab, tan amin a manaayam ed kalawakan a pinoputotan da ray buek da. Asegat ira yan amin a totoo, balet ag da tinoor so siopaman ya ipapamorya na segat. Amin da ra yan totoo tan amin a totood Israel et ag da sinumpal so impisipanan kod sikara.”